ចិន
ស្ថានីយ៍យានអវកាសលើកទីមួយរបស់ចិន
ប្រទេសចិននឹងបាញ់បង្ហោះយានអវកាសមួយ នៅថ្ងៃព្រហស្បតិ៍ស្អែកនេះ ចេញពីតំបន់វាលខ្សាច់មួយដែលស្ថិតនៅភាគពាយ័ព្យប្រទេស។ យានអវកាសគ្មានមនុស្សបើក ឈ្មោះ វិមានអាកាស នឹងទៅបោះទីតាំងមុនគេ ក្នុងគំរោងសាងសង់ស្ថានីយ៍យានអវកាស ចិន ដែលនឹងចេញជារូបរាង នៅឆ្នាំ ២០២០។
ចុះផ្សាយនៅថ្ងៃ៖
ស្តាប់ - ០១:៥២
ផ្សាយពាណិជ្ជកម្ម
ចិនប្រជាមានិតចាប់ផ្តើមអភិវឌ្ឍបច្ចេកវិទ្យាផ្នែកអវកាសរបស់ខ្លួន តាំងពីឆ្នាំ ១៩៩០។ ជាបន្តបន្ទាប់ ចិនបានសាកល្បងបញ្ជូនយានរបស់ខ្លួន ទៅក្នុងអវកាស។ នៅឆ្នាំ ២០០៣ ចិនបានសម្រេចជោគជ័យក្នុងការបញ្ចូនយានអវកាសដែលមានដឹកអ្នកបើកបរបីនាក់។ ក្នុងមួយ ទសវត្សរ៍ចុងក្រោយនេះ ចិនបានបញ្ជូនជាទៀងទាត់ គឺរាល់ពីរឆ្នាំម្តង អវកាសយានិករបស់ខ្លួន ទៅក្នុងអវកាស។
ចិនអភិវឌ្ឍផ្នែកអវកាសវិទ្យារបស់ខ្លួនដោយបានចំណាយប្រមាណ ជាង ២ពាន់ ៥រយលានដុល្លារក្នុងមួយឆ្នាំៗ លើផ្នែកនេះ។ គម្រោងរបស់ចិនលើ ផ្នែកអវកាសនេះ មានតម្លៃតិចតួច បើប្រៀបធៀបនឹងរុស្ស៊ី ដែលឈានមុខគេខាងផ្នែកអវកាស និងប្រទេសអាមេរិក ដែលមានថវិកាសម្រាប់ផ្នែកនេះ ដល់ទៅ ៣២ពាន់លានដុល្លារ។ ប៉ុន្តែ ចិនធ្វើដំណើរយឺតដូចអណ្តើកវារ ប៉ុន្តែ ថេរ និងបោះជំហានទៅមុខដោយប្រសិទ្ធិភាព។ ការបាញ់បង្ហោះយានអវកាសគ្មានមនុស្សបើក ឈ្មោះវិមានអាកាស នៅថ្ងៃស្អែកជាឧទាហរណ៍ស្រាប់។
យានអវកាស”វិមានអាកាស” នឹងទៅហោះអណ្តែតជុំវិញផែនដី រយៈពេលពីរឆ្នាំ ដើម្បីទៅរង់ចាំទទួលភ្ជាប់យានអវកាសបីផ្សេងទៀត ដែលចិននឹងបាញ់បង្ហោះចាប់ពីឆ្នាំ ក្រោយទៅ។ យានអវកាសដែលមានផ្ទុកអវកាសយានិកបីនាក់ នឹងចេញដំណើរនៅឆ្នាំ ២០១២ ចំណែកយានសម្រាប់ធ្វើពិសោធន៍ ស្រាវជ្រាវពិភពអវកាស នឹងបាញ់បង្ហោះ នៅមុន ឆ្នាំ ២០១៦ ដើម្បីទៅពង្រីកស្ថានីយ៍យានអវកាស។
នៅ ៤០ឆ្នាំ ក្រោយដែលរុស្ស៊ី និងអាមេរិក បានសម្រេចបញ្ជូនមនុស្សរបស់ខ្លួនទៅដល់ឋានព្រះចន្ទ និងបង្កើតស្ថានីយ៍យានអវកាសក្នុងទសវត្សរ៍ទី ៦០ ចិនទើបសម្រេចជោគជ័យបច្ចេកវិទ្យាផ្នែកអវកាសរបស់ខ្លួន។ ចិនបានចំណាយពេលវេលាច្រើនដើម្បីអាច រៀនសូត្រ ដកស្រង់បច្ចេកវិទ្យា ដែលពីមុនជារុស្ស៊ី។
ក្នុងពេលអនាគតខាងមុខ ចិននឹងមានស្ថានីយ៍អវកាសផ្ទាល់ខ្លួន ជាលើកទីមួយ ក្នុងប្រវត្តិសាស្រ្តរបស់ខ្លួន ដែលនឹងធ្វើឲ្យចិនឈរនៅចំណាត់ថ្នាក់លេខបី បន្ទាប់ពីរុស្ស៊ី និងអាមេរិក។
ទោះបីជាមានការយឺតយ៉ាវ ប៉ុន្តែ ជោគជ័យលើកនេះរបស់ចិន បង្ហាញពីសមត្ថភាពថ្មីរបស់ចិនខាងផ្នែកអវកាស។ ជំនាញខាងផ្នែកអវកាស គឺមានន័យថា ប្រជាជនចិនស្វែងយល់ចេះដឹង ពីជំនាញជាយុទ្ធសាស្រ្តជាច្រើន ដូចជារូបវិទ្យា ការប្រើ មនុស្សយន្ត និងផ្នែកទំនាក់ទំនងព័ត៌មានវិទ្យា។ ចិនបានពង្រឹងផ្នែកយោធា។ ចិននៅពេលនេះ បានសម្រេចជោគជ័យរបស់ខ្លួន ខាងផ្នែកបច្ចេកវិទ្យាទៀត។ ជោគជ័យមិនឈប់ឈររបស់ចិន គឺជាក្តីព្រួយបារម្ភរបស់ប្រទេសដែលជាគូប្រជែង ដូចជាអាមេរិកជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ