ចិនចោទអាមេរិកថា ជាអ្នកចិញ្ចឹមភាពតានតឹងនៅក្នុងសមុទ្រចិន
នៅថ្ងៃសុក្រ ទី១០ ឧសភា ក្រសួងការបរទេសចិនបានចោទសហរដ្ឋអាមេរិកថា ជាអ្នកដែលបានយកសំាងទៅចាក់លើពំនូកភ្លើងនៅក្នុងសមុទ្រចិនខាងត្បូង តាមរយៈសេចក្តីថ្លែងមួយចំនួនដែលគ្មានលក្ខណៈទទួលខុសត្រូវ។ ការចោទរបស់ទីក្រុងប៉េកំាងលើទីក្រុងវ៉ាស៊ីនតោនពេលនេះបានធ្វើឡើង ចំពេលដែលភាពតានតឹងនៅក្នុងសមុទ្រចិនខាងត្បូងកំពុងឡើងខ្លំាងរវាងចិន ហ្វីលីពីននិងចិន វៀតណាម។
ចុះផ្សាយនៅថ្ងៃ៖
ស្តាប់ - ០១:៥៧
« យើងបានស្នើសហរដ្ឋអាមេរិកឲ្យបញ្ចេញប្រតិកម្ម និងនិយាយស្តីអ្វីឲ្យមានការប្រយ័ត្នប្រយែងបន្តិច ពិសេសត្រូវបញ្ឈប់ការថ្លែងទំាងឡាយណាដែលគ្មានលក្ខណៈទទួលខុសត្រូវ និងគួរតែធ្វើកិច្ចការអ្វីដែលមានគោលដៅរក្សាសន្តិភាព និងស្ថិរភាពនៅក្នុងតំបន់ » នេះជាការថ្លែងរបស់លោកស្រីហួរ ជុនយីង អ្នកនំាពាក្យរបស់ក្រសួងការបរទេសចិន។ កាលពីសប្តាហ៍កន្លងទៅ ចិនបានប្រកាសឲ្យដឹងពីគម្រោងបញ្ជូនស្ថានីយបូមប្រេងបន្តែតលើទឹកមួយទៅកាន់តំបន់ក្នុងសមុទ្រចិនខាងត្បូងដែលខ្លួនកំពុងមានជម្លោះប្រទាញប្រទង់ជាមួយប្រទេសអាស៊ានមួយចំនួន ពិសេសវៀតណាម។ គឺការប្រកាសរបស់ទីក្រុងប៉េកំាងពេលនោះហើយដែលបានធ្វើឲ្យស្ថានការណ៍រវាងប៉េកំាង និងហាណូយដែលកំពុងតានតឹងស្រាប់រឹតតែធ្លាក់ចុះមួយកម្រិតទៀត។ សម្រាប់អាមេរិកឯណោះ ទីក្រុងវ៉ាស៊ីតោនក៏បានចាត់ទុកជាការប្រកាសរបស់ប៉េកំាងថា ជាការបង្ករឿង។
សូមជម្រាបជូនថា នារយៈពេលប៉ុន្មានថ្ងៃចុងក្រោយនេះ តំបន់នៅជុំវិញកន្លែងដែលចិនគម្រោងបញ្ជូនស្ថានីយបូមប្រេងបន្តែតលើទឹកទៅដាក់នោះបានក្លាយជាការប្រឈមមុខដាក់គ្នាយ៉ាងខ្លំាង រហូតដល់មានការបើកបុកគ្នាទៀតផងរវាងនាវាវៀតណាម និងនាវាចិន និងដែលប៉េកំាង និងហាណូយបានទម្លាក់កំហុសដាក់គ្នាទៅវិញ ទៅមក។ នៅក្នុងសន្និសីទកាសែតមួយកាលពីយប់ថ្ងៃព្រហស្បតិ៍ ទី៨ ឧសភា មន្រ្តីការទូតចិនម្នាក់បានបញ្ជាក់ថា ចិនមិនដែលបានបង្ករឿងអ្វីទំាងអស់ គឺវៀតណាមទេដែលតែងតែបានបង្ករឿងមុនគេជានិច្ច។ ចំណែកអ្នកនំាពាក្យក្រសួងការបរទេសចិនលោកស្រីហួរបានបន្ថែមថា ចិនមានភស្តុតាងគ្រប់គ្រាន់ដែលបង្ហាញពីការទទួលខុសត្រូវរបស់វៀតណាម។
តែយ៉ាងណាក៏ដោយ ការថ្លែងបញ្ជាក់របស់ចិនពេលនេះមិនបានធ្វើឲ្យប្រទេសខ្លះជឿនោះទេ ពិសេសជប៉ុនដែលកំពុងមានជម្លោះជាមួយចិននៅក្នុងសមុទ្រចិនខាងកើតទាក់ទងនឹងទីប្រជុំកោះសេនកាគុដែលកំពុងស្ថិតក្រោយការគ្រប់គ្រងរបស់តូក្យូ តែត្រូវបានប៉េកំាងកំពុងទាមទារជាកម្មសិទ្ធិរបស់ខ្លួន។ សម្រាប់ទីក្រុងតូក្យូ ចិនជាអ្នកទទួលខុសត្រូវទំាងស្រុងចំពោះស្ថានការណ៍ធ្លាក់ចុះនៅក្នុងសមុទ្រចិនខាងត្បូងទាក់ទងនឹងទីប្រជុំកោះ Paracels និង Spratleys ជាមួយវៀតណាមពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ