ចិនចាប់ខ្លួនអ្នកនេសាទវៀតណាម៦រូប
អ្នកទទួលខុសត្រូវវៀតណាមបានប្រកាសនៅថ្ងៃសុក្រនេះថា កប៉ាល់ល្បាតចិនច្រើនគ្រឿងបាននាំគ្នាចាប់ខ្លួនអ្នកនេសាទវៀតណាម៦នាក់។ តែកាសែតរដ្ឋវៀតណាម Tuoi Tre បានចុះផ្សាយថាអ្នកនេសាទវៀតណាមទាំងនេះ ត្រូវបានកប៉ាល់ចិនមួយគ្រឿងដែលត្រួតពិនិត្យសកម្មភាពនេសាទ នៅឈូងសមុទ្រតុងកឹង នៅសមុទ្រចិនខាងត្បូង ចាប់ខ្លួន។ រហូតមកដល់ពេលនេះ ក្រសួងការបរទេសវៀតណាម នៅមិនទាន់ចេញប្រតិកម្មអ្វីទាក់ទងនឹងការចាប់ខ្លួននេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៩
ហេតុការណ៍កប៉ាល់ល្បាតចិន ចាប់ខ្លួនអ្នកនេសាទវៀតណាម៦រូប នៅសមុទ្រចិនខាងត្បូងពេលនេះ ចៀសមិនផុតនឹងធ្វើអោយវៀតណាមនិងចិនផ្ទុះកំហឹងនឹងគ្នាជាថ្មីទៀតនោះទេ។ ប៉ុន្តែ អ្នកនាំពាក្យក្រសួងការបរទេសចិនបានអះអាងថា ចិនចាប់ខ្លួនអ្នកនេសាទទាំងនោះ ដោយសារតែពួកគេបានធ្វើប្រតិបត្តិការខុសច្បាប់ ចូលក្នុងដែនទឹករបស់ចិន នៅភាគខាងត្បូង កោះហៃណាន។
ក្រុងហាណូយតែងចោទក្រុងប៉េកាំង ថាបានចាប់ខ្លួនក្រុមអ្នកនេសាទវៀតណាមរាប់រយកប៉ាល់មកហើយ ប៉ុន្មានឆ្នាំចុងក្រោយនេះ។ ប៉ុន្តែ ការចាប់ខ្លួនអ្នកនេសាទវៀតណាម៦រូបពេលនេះ ជាហេតុការណ៍គួរអោយកត់សម្គាល់ គិតចាប់ពីខែឧសភាមក ពេលចិនធ្វើសកម្មភាពខួងបូមប្រេងនៅបាតសមុទ្រ នៅដែនទឹកជម្លោះជាមួយវៀតណាម ជិតប្រជុំកោះប៉ារ៉ាសែល។
គួររំលឹកថា សកម្មភាពបោះគ្រឿងចក្រដើម្បីខួងបូមប្រេងរបស់ក្រុងប៉េកាំង បានបង្កអោយមានបាតុកម្មហិង្សាបះបោរនៅវៀតណាម ប្រឆាំងរោងចក្រចិន និងរោងចក្របរទេសផ្សេងទៀត ធ្វើអោយមានមនុស្សស្លាប់និងរបួស បង្ខំអោយក្រុងប៉េកាំងជម្លៀសពលរដ្ឋខ្លួនរាប់ពាន់នាក់ ចេញពីទឹកដីវៀតណាម។ ក្រោយហេតុការណ៍ប៉ះទង្គិចនេះមក ក៏មានហេតុការណ៍ប៉ះទង្គិចរវាងកប៉ាល់ចិន និងកប៉ាល់វៀតណាមជាង១០គ្រឿងមកហើយដែរ។ ក្រសួងការបរទេសវៀតណាមប្រកាសថា នឹងពិនិត្យមើលពីលទ្ធភាពប្តឹងក្រុងប៉េកាំងតាមផ្លូវច្បាប់ ទាក់ទងនឹងសកម្មភាពបូមប្រេងរបស់ចិន។
ចិននិងវៀតណាមឈ្លោះគ្នា ដណ្តើមបូរណភាពប្រជុំកោះប៉ារ៉ាសែល Paracels និងសាប្រាតថ្លី Spartleys។ ដែនទឹកនៅតាមប្រជុំកោះទាំងនេះ សម្បូរដោយធនធានប្រេង ហើយទីកន្លែងទាំងនេះទៀតសោត ក៏ជាផ្លូវទឹកដ៏មានសារៈសំខាន់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ