ដំណើរឆ្ពោះទៅរកការបើកជំនួបកំពូលចិន-ជប៉ុន ឡើងវិញ
នាយករដ្ឋមន្ត្រីជប៉ុន ស៊ីនហ្សូ អាបេ និងប្រធានាធិបតីចិន ស៊ី ជិនពីង ទំនងជានឹងអាចជួបពិភាក្សាគ្នា ក្នុងជំនួបទ្វេភាគី ជាលើកទីមួយ នៅសប្តាហ៍ក្រោយ នៅទីក្រុងប៉េកាំង នាឱកាសដែលចិនកំពុងធ្វើជាម្ចាស់ផ្ទះទទួលរៀបចំវេទិកាសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក ឬហៅថា APEC។ នេះបើយោងតាមសារព័ត៌មានជប៉ុនចេញផ្សាយនៅថ្ងៃសុក្រទី ៧ វិច្ឆិកា ២០១៤។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
មហាអំណាចសេដ្ឋកិច្ចប្រចាំតំបន់អាស៊ី ទាំងពីរ ចិន និងជប៉ុន បែរខ្នងដាក់គ្នា តាំងពីចុងឆ្នាំ ២០១២មក ដោយហេតុតែគំនិតជាតិនិយម ប្រជែងគ្នាក្នុងជម្លោះដែនដី និងប្រវត្តិសាស្ត្រ។ ឡើងកាន់តំណែងជាអ្នកដឹកនាំប្រទេសរៀងខ្លួន ក្នុងពេលទន្ទឹមគ្នា ម្នាក់នៅចុងឆ្នាំ២០១២ ម្នាក់ទៀតនៅដើមឆ្នាំ២០១៣ លោកស៊ីនហ្សូ អាបេ និងលោក ស៊ីជិនពីង មិនបានរៀបចំជំនួបទ្វេភាគី អស់រយៈពេលបីឆ្នាំហើយ។
ប៉ុន្តែនៅថ្ងៃនេះ បើតាមទូរទស្សន៍ជប៉ុន NHK មានការរៀបចំជាលក្ខណៈជាក់ស្តែងហើយ ដើម្បីឈានដល់ការបើកកិច្ចប្រជុំជាន់ខ្ពស់ចិន-ជប៉ុន។ សូមបញ្ជាក់ថា លោកស៊ីនហ្សូ អាបេ នាយករដ្ឋមន្ត្រីជប៉ុន ធ្លាប់បានបង្ហាញចេតនា ចង់បើកកិច្ចចរចាជាមួយចិន ប៉ុន្តែប៉េកាំងតែងបដិសេធរហូតមក។
នៅពេលនេះ ទាំងរដ្ឋាភិបាលចិន និងទាំងរដ្ឋាភិបាលជប៉ុន មិនបានបញ្ជាក់ព័ត៌មានស្តីអំពីជំនួបទ្វេភាគីចិនជប៉ុនទេ។ មានតែសេចក្តីថ្លែងការណ៍ដាច់គ្នាពីរ តែមានខ្លឹមសារក្នុងទិសតែមួយថា តូក្យូនិងប៉េកាំងព្រមព្រៀង បើកឱ្យមានការចរចានយោបាយ ការទូត និងសន្តិសុខ ឡើងវិញបន្តិចម្តងៗ។
ជំនួបជាន់ខ្ពស់ចុងក្រោយបង្អស់រវាងចិននិងជប៉ុន បានប្រព្រឹត្តទៅកាលពីខែធ្នូ ឆ្នាំ២០១១ រវាងលោកនាយករដ្ឋមន្ត្រីជប៉ុន សម័យនោះ គឺលោក យូស្ហ៊ីហ៊ីកូ ណូដា ជាមួយប្រធានាធិបតីចិន លោក ហ៊ូ ជីនតាវ បន្ទាប់មកម្តងទៀត នៅខែឧសភា ឆ្នាំ២០១២ រវាងនាយករដ្ឋមន្ត្រីជប៉ុនដដែលជាមួយសមភាគីចិន លោក វេន ជាប៉ាវ។
ទំនាក់ទំនងជប៉ុនជាមួយប្រទេសជិតខាង មិនដែលល្អ ដោយហេតុតែប្រវត្តិសាស្ត្រ ជប៉ុនធ្លាប់ឈ្លានពាន ចិន ពីឆ្នាំ១៩៣១-១៩៤៥ និងឧបទ្វីបកូរ៉េ ពីឆ្នាំ ១៩១០-១៩៤៥។ ដើម្បីប្រារព្ធខួបមួយឆ្នាំនៃការវិលមកកាន់តំណែងនាយករដ្ឋមន្ត្រី លោក ស៊ីនហ្សូ អាបេ បានអញ្ជើញទៅវិហារយ៉ាស៊ូគូនី ដែលមានកប់សពឧក្រិដ្ឋជនក្នុងសម័យសង្គ្រាម និងដែលបានបញ្ចេះកំហឹង ប៉េកាំងនិងសេអ៊ូល ឱ្យដុតរោល និងច្រានទម្លាក់ទំនាក់ទំនងជប៉ុនជាមួយប្រទេសជិតខាងទាំងនេះឱ្យធ្លាក់ស្ទើរដល់បាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ