ចិនដកតំណែងមន្ត្រីជាន់ខ្ពស់សភាប្រជាជនខេត្តហ៊ូណាន ៥៦នាក់
នៅថ្ងៃសៅរ៍នេះ សភាប្រជាជនខេត្តហ៊ូណាន ជាខេត្តស្ថិតនៅភាគកណ្តាលប្រទេសចិន បានប្រកាសថា បានដកតំណែងមន្ត្រីជាន់ខ្ពស់របស់ខ្លួន៥៦នាក់។ មន្ត្រីទាំងនេះជាប់ចោទ ពីបទសូកប៉ាន់សមាជិកក្រុមប្រឹក្សាសាលាក្រុងហេងយ៉ាង ដោយផ្តល់ជាទឹកប្រាក់សំណូកដល់ពួកគេប្រមាណ១៣លានអឺរ៉ូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៤
សភាប្រជាជនខេត្តហ៊ូណាន ជាខេត្តស្ថិតនៅភាគកណ្តាលប្រទេសចិន បានប្រកាសនៅថ្ងៃសៅរ៍នេះ ថាបានដកតំណែងមន្ត្រីជាន់ខ្ពស់របស់ខ្លួន៥៦នាក់ ក្នុងចំណោមសមាជិកសរុបទាំងអស់ ៧៦៣នាក់។
មន្ត្រីទាំង៥៦រូបនេះ ជាប់ចោទ ពីបទសូកប៉ាន់សមាជិកក្រុមប្រឹក្សាក្រុងហេងយ៉ាង ចំនួន៥១៨នាក់។ ក្រុងហេងយ៉ាង ជាក្រុងសំខាន់ទីពីរនៃខេត្តហ៊ូណាន។ ទឹកប្រាក់សំណូកដែលមន្ត្រីទាំង៥៦រូបនេះផ្តល់ទៅអោយសមាជិកក្រុមប្រឹក្សាសាលាក្រុងហេងយ៉ាង មានប្រមាណ១១០លានយ័ន ត្រូវនឹង១៣លានអឺរ៉ូ។ បន្ទាប់ពីមានការប្រកាសនេះមក សមាជិកក្រុមប្រឹក្សាក្រុងហេងយ៉ាង៥១២នាក់ បានលាចេញពីតំណែងរបស់ខ្លួន។
ការដែលសភាប្រជាជនខេត្តហ៊ូណាន ប្រកាសដកតំណែងសមាជិកខ្លួននេះ សបង្ហាញថា ខេត្តហ៊ូណានបានខិតខំសម្របការដឹកនាំរបស់ខ្លួនអោយស្របតាមការសំរេចរបស់គណបក្សកុម្មុយនិស្តចិន ដើម្បីធ្វើយុទ្ធនាការកំចាត់អំពើពុករលួយក្នុងប្រទេស។ យុទ្ធនាការប្រឆាំងអំពើពុករលួយ គឺជាយុទ្ធនាការផ្តួចផ្តើមដោយប្រធានាធិបតី ស៊ី ជិនពីង តាំងពីលោកបានឡើងកាន់អំណាច នៅកំឡុងចុងឆ្នាំ២០១២មក។
កាលពីថ្ងៃសុក្រ អាជ្ញាធរចិនទើបបានប្រកាសបើកការស៊ើបអង្កេតប្រឆាំងនឹងអតីតមេដឹកនាំកំពូលទី២នៃបក្សកុម្មុយនិស្ត នៅតំបន់ស៊ីនជាំង។ បច្ចុប្បន្ន អ្នកទទួលខុសត្រូវចិនដែលមានឋានៈស្មើរឺក៏ខ្ពស់ជាងអនុរដ្ឋមន្ត្រី យ៉ាងហោចក៏១៧រូបដែរ ដែលបានធ្លាក់ពីតំណែងដោយសារតែយុទ្ធនាការកំចាត់អំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ