ចិន និងរុស្ស៊ីច្រានចោលការធ្វើអន្តរាគមន៍យោធាលើប្រទេសស៊ីរី
នៅថ្ងៃពុធ ទី៣០ ឧសភានេះ ប្រទេសរុស្ស៊ី និងចិនបានបញ្ជាក់ជាថ្មីម្តងទៀតថា ខ្លួននឹងមិនយល់ព្រមឲ្យមានអន្តរាគមន៍យោធាលើប្រទេសស៊ីរីទេ។ សេចក្តីបញ្ជាក់នេះបានធ្វើឡើង បន្ទាប់ពីមានការប្រកាសរបស់លោកប្រធានាធិបតីបារំាង François Hollande ដែលថា លោកគំាទ្រឲ្យមានអន្តរាគមន៍តាមផ្លូវយោធាលើប្រទេសស៊ីរី តែត្រូវធ្វើឡើងដោយមានការយល់ព្រមពីក្រុមប្រឹក្សាសន្តិសុខអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០២:០៥
« ទីក្រុងម៉ូស្គូប្រឆំាងដាច់ខាតនឹងគ្រប់អន្តរាគមន៍តាមផ្លូវយោធាលើប្រទេសស៊ីរី។ អន្តរាគមន៍យោធាដែលនឹងធ្វើឲ្យស្ថានការណ៍នៅស៊ីរីកាន់តែដុនដាប ព្រមទំាងជះផលវិបាកធ្ងន់ធ្ងរនៅក្នុងតំបន់ » នេះជាការថ្លែងរបស់លោក Guennadi Gatilov អនុរដ្ឋមន្រ្តីក្រសួងការបរទេសរុស្ស៊ី។ នៅប្រទេសចិនឯណោះ អ្នកនំាពាក្យក្រសួងការបរទេស លោក Liu Weimin បានរម្លឹកជាថ្មីម្តងទៀតថា ទីក្រុងប៉េកំាងជំទាស់យ៉ាងដាច់អហង្ការទៅនឹងគ្រប់អន្តរាគមន៍យោធាលើស៊ីរី និងមិនគំាទ្រការផ្លាស់ប្តូរទំាងបង្ខំណាមួយនៅស៊ីរីទេ។
ការដែលរុស្ស៊ី និងចិនបានបញ្ជាក់ជាថ្មីពីជំហររបស់ខ្លួនពាក់ព័ន្ធនឹងវិបត្តិនៅស៊ីរីបានធ្វើឡើង បន្ទាប់ពីលោកប្រធានាធិបតីបារំាង François Hollande បានថ្លែងថា លោកគំាទ្រឲ្យមានអន្តរាគមន៍តាមផ្លូវយោធាលើប្រទេសស៊ីរី តែត្រូវធ្វើឡើងដោយមានការយល់ព្រមពីក្រុមប្រឹក្សាសន្តិសុខអង្គការសហប្រជាជាតិ។
គួរជម្រាបជូនថា តំាងពីវិបត្តិនៅស៊ីរីបានចាប់ផ្តើមមក ចិន និងរុស្ស៊ីដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ និងដែលមានសិទ្ធិវេតូ ធ្លាប់បានបោះឆ្នោតប្រឆំាង ២លើកទៅនឹងគម្រោងសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិដែលបានថ្កោលទោសអំពើហិង្សានៅស៊ីរី។ តែទន្ទឹមគ្នានេះ ទីក្រុងប៉េកំាង និងម៉ូស្គូបានបោះឆ្នោតគំាទ្រឲ្យបង្កើតបេសកកម្មត្រួតពិនិត្យរបស់សហប្រជាជាតិមួយនៅស៊ីរី តាមរយៈសេចក្តីសម្រេចចិត្តលេខ ២០៤៣ ដើម្បីឃ្លំាមើលការឈប់បាញ់ដែលបានចូលជាធរមានកាលពីថ្ងៃទី ១២ មេសាកន្លងទៅ។
ថ្មីៗនេះ និងបន្ទាប់ពីមានព្រឹត្តិការណ៍សម្លាប់រង្គាលនៅ Houla មក ចិន និងរុស្ស៊ីបានអនុម័តសេចក្តីថ្លែងការណ៍មួយដោយគ្មានលក្ខណៈចាប់បង្ខំ ដែលបានទិតៀន រិះគន់របបស៊ីរីរបស់លោកប្រធានាធិបតី Bachar al Assad និងអំពាវនាវឲ្យគ្រប់ភាគីបិទបញ្ចប់អំពើហិង្សា។ សម្រាប់លោកអនុរដ្ឋមន្ត្រីការបរទេសរុស្ស៊ី សេចក្តីថ្លែងការណ៍របៀបនេះពិតជាសញ្ញាព្រមានមួយចំពោះគ្រប់ភាគីពាក់ព័ន្ធនៅស៊ីរី និងក៏ជាប្រតិកម្មគ្រប់គ្រាន់ពីសំណាក់ក្រុមប្រឹក្សាសន្តិសុខដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ