អតីតមន្ត្រីជាន់ខ្ពស់ចិនម្នាក់ទៀតជាប់ចោទពីបទពុករលួយ
នៅប្រទេសចិនលោក Liu Tienan អតីតនាយកនៃគណៈកម្មការទទួលបន្ទុកខាងកំណែទម្រង់និងអភិវឌ្ឍន៍ជាតិ(NDRC) ជាមន្ត្រីជាន់ខ្ពស់ម្នាក់ទៀត ដែលត្រូវចូលបង្ហាញខ្លួននៅមុខតុលាការក្នុងភាគខាងជើងប្រទេសចិននៅថ្ងៃពុធទី២៤កញ្ញានេះ ។ការចូលខ្លួននៅមុខតុលាការដោយមកពីលោកជាប់ចោទពីបទស៊ីសំណូកសូកប៉ាន់ចំនួនទឹកប្រាក់ ៤លាន៥ម៊ីនអឺរ៉ូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
លោក Liu Tienan អតីតមន្រ្តីជាន់ខ្ពស់ចិនម្នាក់ទៀតដែលមានតួនាទីស្មើនឹងអនុរដ្ឋមន្ត្រីដែរ ត្រូវបានចូលខ្លួននៅមុខតុលាការចិននៅថ្ងៃពុធ២៤កញ្ញានេះពីបទជាប់ចោទប្រព្រឹត្តអំពើពុករលួយ។
ម្យ៉ាងទៀត ជាបទចោទប្រកាន់ច្រើនករណីយដែលរដ្ឋអាជ្ញាបានដាក់បន្ទុកលើលោក Liu នឹងជំរុញឲ្យអតីតមន្ត្រីជាន់ខ្ពស់នេះ រងទោសឧក្រិដ្ឋជាប់ពន្ធនាគារអស់មួយជីវិត-នេះបើយោងតាមសេចក្តីជូនដំណឹងមួយដែលផ្សព្វផ្សាយដោយតុលាការនៅ Langfang ខេត្តហេបី (Hebei) ភាគខាងជើងប្រទេសចិន។
នៅលើ microblogs របស់ខ្លួន តុលាការចិន បានផ្សព្វផ្សាយរូបថតរបស់លោក Liu អតីតមន្ត្រីជាន់ខ្ពស់ចិននេះ ឈរនៅក្នុងសាលសវនាការ អមដោយបូលិសពីររូប។ ក្រៅពីមុខតំណែងជាអតីតនាយកនៃគណៈកម្មការទទួលបន្ទុកខាងកំណែទម្រង់និងអភិវឌ្ឍន៍ជាតិ(NDRC)ដែលជាស្ថាប័នសម្រេចអារកាត់លើគម្រោងឧស្សហកម្មសំខាន់ៗនៅក្នុងប្រទេសចិន លោក Liu ក៏ជាអ្នកដឹកនាំផងដែរទីភ្នាក់ងារជាតិទទួលបន្ទុកផ្នែកឋាមពល។
លោក Liu ត្រូវជាប់ចោទប្រកាន់ពីបទ រំលោភលើអំណាចដោយបានប្រគល់កុងត្រាការងាររដ្ឋនានាឲ្យដល់មនុស្សជំនិតខ្លួន។ បើយោងតាមតុលាការ សំណូកសូកប៉ាន់ទាំងនោះ មានជាលុយសុទ្ធ អំណោយផ្សេងៗសំរាប់កូនប្រុសលោក ផ្ទះមួយនៅទីក្រុងប៉េកាំង និង រថយន្តធុនថ្លៃម៉ាក Porscheជាដើម។
ស្ថិតនៅក្រោមការស៊ើបអង្កេតរបស់តុលាការតាំងពីឆ្នាំមុនពីបទពុករលួយ លោក Liu ត្រូវបានគេហូតតំណែងលោកទាំងអស់នៅខែឧសភាឆ្នាំ២០០១៣ ព្រមទាំងដកចេញពីជួរគណៈបក្សកុម្មុយនិស្តចិននៅដើមខែសីហា។
គួររំលឹកថា អំពើពុករលួយនៅតែជារោគរាតត្បាតយ៉ាងត្រាំត្រែងមួយនៅក្នុងសង្គមចិន ដែលត្រូវបានអ្នកជំនាញនានាមើលឃើញថា ទោះបីជាមានការប្រឹងប្រែងពីសំណាក់អាជ្ញាធរចិនក្នុងការប្រយុទ្ធប្រឆាំងនឹងអំពើពុករលួយយ៉ាងណាក្តី ជំងឺពុករលួយនេះ ក៏វាពិបាកនឹងជាសះស្បើយភ្លាមៗណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ