សង្គមស៊ីវិល ទាមទារឲ្យរដ្ឋាភិបាល បង្ហាញសេចក្ដីព្រាងច្បាប់ស្ដីពីឧក្រិដ្ឋកម្មលើប្រព័ន្ធបច្ចេកវិទ្យាជាសាធារណៈ
ជាថ្មីម្ដងទៀត អង្គការសង្គមស៊ីវិលមួយក្រុម ដែលធ្វើការពាក់ព័ន្ធនឹងសិទ្ធិសេរីភាពនៃការបញ្ចេញមតិ បានទាមទារឲ្យរដ្ឋាភិបាល បង្ហាញសេចក្ដីព្រាងច្បាប់ស្ដីពីឧក្រិដ្ឋកម្មលើប្រព័ន្ធបច្ចេកវិទ្យាជាសាធារណៈ។ ជាការទាមទារ ដែលធ្វើឡើងតាមរយៈយុទ្ធនាការចុះហត្ថលេខាលើញត្តិ តាមប្រព័ន្ធអ៊ីនធឺណែត ដែលបានចាប់ផ្ដើមកាលពីដើមសប្ដាហ៍នេះ។
ចុះផ្សាយនៅថ្ងៃ៖
ស្តាប់ - ០១:៤៣
ញត្តិដែលមានចំណងជើងថា «ដោះលែងប្រព័ន្ធអ៊ីនធឺណែត» ឬជាភាសាអង់គ្លេសថា «Free The Net» ត្រូវបានចែកចាយយ៉ាងទូលំទូលាយ នៅតាមបណ្ដាញសង្គម ក្នុងអំឡុងពេលពីរបីថ្ងៃចុងក្រោយនេះ។ វាជាញត្តិ ដែលរៀបចំដោយអង្គការសង្គមស៊ីវិលមួយក្រុម ដែលធ្វើការពាក់ព័ន្ធនឹងសិទ្ធិសេរីភាពនៃការបញ្ចេញមតិ ដូចជា គណៈកម្មាធិការសហប្រតបត្តិការដើម្បីកម្ពុជា មជ្ឈមណ្ឌលសិទ្ធិមនុស្សកម្ពុជា និងមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យជាដើម។ ញត្តិនេះ រៀបចំឡើងក្នុងបំណងទាមទារឲ្យរដ្ឋាភិបាល បង្ហាញសេចក្ដីព្រាងច្បាប់ស្ដីពីឧក្រិដ្ឋកម្មលើប្រព័ន្ធបច្ចេកវិទ្យាជាសាធារណៈ។
កញ្ញា ឆាយ ឈុនលី មន្ដ្រីសម្របសម្រួលគម្រោងនៃមជ្ឈមណ្ឌលសិទ្ធិមនុស្សកម្ពុជា មានប្រសាសន៍ប្រាប់វិទ្យុបារាំងអន្ដរជាតិ នៅថ្ងៃសៅរ៍ ទី០៨វិច្ឆិកានេះថា រហូតមកទល់ពេលនេះ សង្គមស៊ីវិលនៅមិនទាន់ដឹងព័ត៌មានជាផ្លូវការណាមួយ ពាក់ព័ន្ធនឹងសេចក្ដីព្រាងច្បាប់ស្ដីពីឧក្រិដ្ឋកម្មលើប្រព័ន្ធបច្ចេកវិទ្យានេះនៅឡើយទេ។ បើតាមមន្ដ្រីសិទ្ធិមនុស្សដដែល កង្វះព័ត៌មានបានធ្វើឲ្យសង្គមស៊ីវិលព្រួយបារម្ភថា ពេលដែលច្បាប់ចេញមក អាចកម្រិតសិទ្ធិសេរីភាពនៃការបញ្ចេញមតិតាមប្រព័ន្ធអ៊ីនធឺណែត របស់ប្រជាពលរដ្ឋកម្ពុជា។
កញ្ញា ឆាយ ឈុនលី ឲ្យដឹងបន្ថែមទៀតថា សង្គមស៊ីវិល គ្មានបំណងបង្អាក់ ឬរារាំងការរៀបចំបង្កើតច្បាប់របស់រដ្ឋាភិបាលកម្ពុជាឡើយ។ និងថា តាមការពិត សង្គមស៊ីវិលគាំទ្រឲ្យមានច្បាប់ស្ដីពីឧក្រិដ្ឋកម្មលើប្រព័ន្ធបច្ចេកវិទ្យា ដ៏មានសារៈសំខាន់នេះ។ គោលបំណងរបស់សង្គមស៊ីវិល បើតាមកញ្ញា ឆាយ ឈុនលី គឺចង់ឲ្យរដ្ឋាភិបាល បង្ហាញសេចក្ដីព្រាងច្បាប់ស្ដីពីឧក្រិដ្ឋកម្មលើប្រព័ន្ធអ៊ីនធឺណែតនេះ ជាសាធារណៈ មុននឹងបញ្ជូនទៅឲ្យរដ្ឋសភាអនុម័តតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ