សង្គមស៊ីវិលបង្ហាញក្តីបារម្ភពីការការពារសិទ្ធមនុស្ស ខណៈលោកស្រីរ៉ូណា ស្មីតទស្សនៈកិច្ចនៅកោះកុង
សង្គមស៊ីវិលដែលធ្វើការងារខាងជួយការពារសិទ្ធមនុស្សប្រចាំនៅក្នុងខេត្តកោះកុង បានបង្ហាញពីក្តីកង្វល់របស់ខ្លួនទៅកាន់លោកស្រី រ៉ូណា ស្មីត អ្នករាយការណ៍ពិសេសថ្មីរបស់អង្គការសហប្រជាជាតិ នៅល្ងាចថ្ងៃសុក្រម្សិលមិញនេះ។ ការបង្ហាញពីនេះត្រូវបានធ្វើឡើងនៅខណៈដែលលោកស្រីធ្វើដំណើរទៅកាន់ខេត្តកោះកុង ដើម្បីសាកសួរនិងប្រមូលព័ត៌មាននានា ទាក់ទងនឹងការគោរពច្បាប់ សិទ្ធិមនុស្ស និងការវិនិយោគ។
ចុះផ្សាយនៅថ្ងៃ៖
ស្តាប់ - ០១:៥៧
លោកអ៊ិន កុងជិត មន្ត្រីការពារសិទ្ធិមនុស្សអង្គការលីកាដូ ប្រចាំនៅខេត្តកោះកុង បានបញ្ជាក់ប្រាប់វិទ្យុបារាំងនៅថ្ងៃទី ១៩ កញ្ញានេះថា ក្រុមសង្គមស៊ីវិលបានបង្ហាញពីក្តីកង្វល់របស់ខ្លួន ក្នុងការបំពេញការងារជាអ្នកការពារសិទ្ធិមនុស្ស ទៅកាន់លោកស្រីរ៉ូណា ស្មីត នៅខណៈដែលលោកស្រីទៅបំពេញការងារនិងប្រមូលព័ត៌មានស្តីពីបញ្ហាសិទ្ធិមនុស្សនៅទីនោះ។
ក្តីកង្វល់ដែលមន្ត្រីការពារសិទ្ធមនុស្សរូបនេះថ្លែងទៅកាន់អ្នករាយការណ៍ពិសេសថ្មីរបស់អង្គការសហប្រជាជាតិ រួមមានការហាមឃាត់ និងរារាំងពីសមត្ថកិច្ច និងអាជ្ញាធរ ដែលមិនឲ្យក្រុមមន្ត្រីការការពារសិទ្ធមនុស្សមកពីអង្គការក្រៅរដ្ឋាភិបាលបំពេញការងាររបស់ពួកគេបានដោយរលូន។
សូមរំលឹកជូនថាកាលពីថ្ងៃទី ២ កញ្ញាកន្លងទៅនេះ ព្រះរាជអាជ្ញាខេត្តកោះកុង បានដាក់បញ្ជាឲ្យឃាត់ខ្លួនមនុស្ស១៧នាក់ ដែលរួមមានមន្ត្រីការពារសិទ្ធមនុស្ស សិស្សនិស្សិត និងប្រជាសហគមន៍ អស់ជាច្រើនម៉ោង។ ហើយការឃាត់ខ្លួននេះត្រូវបានលោក អ៊ិន កុងជិតហៅថាជាការរារាំងមិនឲ្យពួកគាត់ អាចឃ្លាំមើលពីហេតុការណ៍និងសកម្មភាពរបស់អាជ្ញាធរ និងសមត្ថកិច្ចនៅពេលដែលចុះទៅបំបែកហ្វូងរបស់ប្រជាសហគមន៍ដែលតែងតែធ្វើការតវ៉ាពីរឿងបញ្ហាដីធ្លីនានា។
ស្របពេលជាមួយគ្នានេះ មន្ត្រីការពារសិទ្ធិមនុស្សអង្គការលីកាដូរូបនេះក៏សង្ឃឹមថាលោកស្រីរ៉ូណា ស្មីត និងនាំយកក្តីកង្វល់របស់ពួកគាត់ទៅជម្រាបជូនលោកអភិបាលខេត្តកោះកុង និងរដ្ឋាភិបាលកម្ពុជាផងដែរ។ ហើយលោកក៏បានសំណូមពូរឲ្យអាជ្ញាធរ និងតុលាការខេត្តចាត់ទុក មន្ត្រីការពារសិទ្ធិមនុស្សរបស់អង្គការក្រៅរដ្ឋាភិបាល ជាដៃគូដ៏ល្អ ដើម្បីជួយបំពេញការងារមនុស្សធម៌ជូនដល់ប្រជាពលរដ្ឋ ដោយមិនត្រូវរារាំងមិនឲ្យឃ្លាំមើលហេតុការណ៍ណាមួយនោះទេ។
សូមជម្រាបជូនថា លោកស្រីរ៉ូណា ស្មីត គឺជាអ្នករាយការណ៍ពិសេសថ្មីស្តីពីស្ថានភាពសិទ្ធមនុស្សនៅកម្ពុជា ដែលជំនួសតំណែងរបស់លោកសូរិយា ប្រាសាទ ស៊ូប៊ែឌី។ នេះគឺជាដំណើរទស្សនៈកិច្ចលើកទី១ របស់លោកស្រីរ៉ូណា ស្មីតមកកាន់កម្ពុជា ដែលផ្តើមឡើងចាប់ពីថ្ងៃទី ១៦ ដល់ថ្ងៃទី ២៤កញ្ញាខាងមុខនេះ។ មុននឹងចាកចេញពីកម្ពុជា លោកស្រីក៏នឹងធ្វើសន្និសីទកាសែត បង្ហាញពីការប្រមូលព័ត៌មានស្តីពីស្ថានភាពសិទ្ធមនុស្សនៅកម្ពុជានៅថ្ងៃទី ២៤ កញ្ញាផងដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ