អាកាសធាតុពិភពលោក ខែវិច្ឆិកា២០១៩ ក្តៅខ្លាំងមិនធ្លាប់មាន ក្នុងពេល១សតវត្សរ៍កន្លះចុងក្រោយនេះ
របាយការណ៍អាកាសធាតុនៃភ្នាក់ងារឧតុនិយមរបស់អាមេរិក បញ្ជាក់ថា ខែវិច្ឆិកា២០១៩ កន្លងទៅនេះ ជាខែដែលក្តៅខ្លាំងបំផុតសម្រាប់ភពផែនដី គិតត្រឹម១៤០ឆ្នាំចុងក្រោយនេះ។ ករណីជាក់ស្តែង ប្រទេសអូស្ត្រាលី ទទួលរងកម្តៅក្តៅខ្លាំង ថ្ងៃអង្គារ៍ ទី១៧ធ្នូ គឺជាថ្ងៃដែលក្តៅបំផុត មិនធ្លាប់ជួបប្រទះសោះ នៅក្នុងប្រវត្តិសាស្ត្រអូស្ត្រាលី។ គឺសីតុណ្ហភាពកម្តៅ បានកើនឡើងដល់ទៅប្រមាណ៤៥អង្សារ។ នេះបើតាមការិយាល័យឧតុនិយមអូស្ត្រាលីដែលចេញផ្សាយនៅថ្ងៃពុធនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
របាយការណ៍អាកាសធាតុ របស់ភ្នាក់ឧតុនិយមសហរដ្ឋអាមេរិក រកឃើញថា ខែវិច្ឆិកាជាខែដែលផែនដីយើង ក្តៅខ្លាំងបំផុតនៅក្នុងប្រវត្តិសាស្ត្រមនុស្សជាតិ។ ពោលគឺសីតុណ្ហភាពកម្តៅបានកើនឡើងជាមធ្យម១អង្សារ បើធៀបនឹងសតវត្សរ៍ទី២០។
ករណីជាក់ស្តែង ថ្ងៃទី១៧ធ្នូ អូស្ត្រាលី បានជួបរលកកម្តៅ ដល់ទៅ៤០,៩អង្សារសេ បើគិតជាមធ្យម តែបើនៅត្រង់ចំណុចកណ្តាលនៃផ្ទៃប្រទេសវិញ សីតុណ្ហភាពក្តៅដល់ជាង៤៥អង្សារសេឯណោះ។ នេះបើតាមអ្នកជំនាញលោកស្រី Diana Eadie បម្រើការនៅការិយាល័យភ្នាក់ងារព្យាករណ៍ឧតុនិយមអូស្ត្រាលី។ គួររម្លឹកថា កាលពីឆ្នាំ២០១៣ នៅអូស្ត្រាលីបានជួបកម្តៅខ្លាំងបំផុតម្តង តែកាលនោះ ក្តៅត្រឹម៤០,៣អង្សារសេប៉ុណ្ណោះ។
កម្តៅខ្លាំងជាប្រវត្តិសាស្ត្រនៅអូស្ត្រាលី កត្តាធំជាងគេគឺបណ្តាលមកពីភ្លើងផ្សែងឆេះព្រៃ។ ភ្លើងឆេះកំពុងតែរាលដាលភាគកណ្តាលប្រទេសឆ្ពោះទៅរកភាគខាងកើតនិងខាងជើង ដែលព្រះអគ្គិបានលេបត្របាក់ព្រៃរាប់ពាន់ហិកតា និងបានបំផ្លាញផ្ទះសម្បែងរបស់ប្រជាជនអូស្ត្រាលី ចំនួនជាង៧០០ផ្ទះ រួចមកហើយ។
ទន្ទឹមនឹងនេះអង្គការអន្តរជាតិខាងឧតុនិយមពិភពលោក ក៏បានប្រកាសអាសន្នឱ្យថ្នាក់ដឹកនាំពិភពលោកភ្ញាក់ស្មារតីដែរថា កម្ដៅអាកាសធាតុ ស្ទុះក្តៅខ្លាំង ពី៤ទៅ៥អង្សារបន្ថែមទៀត យ៉ាងយូរបំផុតត្រឹមឆ្នាំ២១០០ ដោយសារតែការប្រែប្រួលអាកាសធាតុ និងការបញ្ចេញឧស្ម័នកាបូនិករបស់មនុស្សនិងម៉ាស៊ីនរោងចក្រ។
ផលប៉ះពាល់នៃការប្រែប្រួលអាកាសធាតុនេះ នឹងបង្កក្តីលំបាកដល់អាយុជីវិតមនុស្សជាតិទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ