គណបក្សសង្គ្រោះជាតិ ផ្លាស់ប្ដូរកន្លែងប្រារព្ធពិធីវេទិកាសាធារណៈ នៅខេត្តកំពង់ធំ
នៅថ្ងៃចន្ទនេះ វេទិកាសាធារណៈដែលលោកកឹម សុខា គ្រោងធ្វើនៅភូមិទួលដំណាក់ ឃុំចុងដូង ស្រុកបារាយណ៍ ខេត្តកំពង់ធំ ត្រូវប្ដូរទៅធ្វើនៅទីស្នាក់ការគណបក្សសង្គ្រោះជាតិ នៅទីរួមខេត្តកំពង់ធំវិញ។ បើតាមមន្ដ្រីគណបក្សសង្គ្រោះជាតិប្រចាំខេត្តកំពង់ធំ វេទិកាសាធារណៈ របស់បក្សប្រឆាំងនៅថ្ងៃនេះ បានប្រព្រឹត្តទៅក្រោមការឃ្លាំមើលយ៉ាងដិតដល់ពីសំណាក់អាជ្ញាធរ មានសមត្ថកិច្ច ព្រមទាំងការបើកឡានក្រឡឹងទៅមក របស់អ្នកគាំទ្រគណបក្សប្រជាជនកម្ពុជា។ ទោះជាយ៉ាងនេះក្ដី មិនមានការប្រឈមមុខដាក់គ្នា ឬការប៉ះទង្គិចណាមួយកើតមានឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
នៅថ្ងៃចន្ទ ទី២៧មករានេះ លោកកឹម សុខា បានចុះទៅជួបសកម្មជនគាំទ្រគណបក្សសង្គ្រោះជាតិ នៅខេត្តកំពង់ធំ។ ការចុះជួបសកម្មជនរបស់លោកកឹម សុខានេះ ធ្វើឡើងតែមួយថ្ងៃប៉ុណ្ណោះ បន្ទាប់ពីលោកត្រូវបានសកម្មជនគាំទ្រគណបក្សប្រជាជនកម្ពុជា ឡោមព័ទ្ធនៅសណ្ឋាគារដែលលោកស្នាក់នៅ ក្នុងខេត្តកំពង់ចាម កាលពីថ្ងៃអាទិត្យ ទី២៦មករា។
លោក ស៊ុន ចន្ធី មន្ដ្រីគណបក្សសង្គ្រោះជាតិប្រចាំខេត្តកំពង់ធំ មានប្រសាសន៍ប្រាប់វិទ្យុបារាំងអន្ដរជាតិ នៅរសៀលថ្ងៃចន្ទនេះថា វេទិកាសាធារណៈដែលបក្សប្រឆាំងគ្រោងធ្វើនៅភូមិទួលដំណាក់ ឃុំចុងដូង ស្រុកបារាយណ៍ ខេត្តកំពង់ធំ ត្រូវប្ដូរទៅធ្វើនៅទីស្នាក់ការគណបក្ស នៅទីរួមខេត្តកំពង់ធំវិញ។ មូលហេតុនៃការផ្លាស់ប្ដូរទីតាំងប្រារព្ធពិធី ត្រូវបានលោកស៊ុន ចន្ធី ឲ្យដឹងថា គឺដោយសារតែអាជ្ញាធរមិនអនុញ្ញាតឲ្យគណបក្សប្រារព្ធធ្វើវេទិកាសាធារណៈ នៅឃុំចុងដូង។
បើតាមមន្ដ្រីបក្សប្រឆាំងប្រចាំខេត្តកំពង់ធំនេះដដែល វេទិកាសាធារណៈរបស់លោកកឹម សុខា បានប្រព្រឹត្តទៅក្រោមការឃ្លាំមើលយ៉ាងដិតដល់ពីសំណាក់អាជ្ញាធរខេត្ត ព្រមទាំងការបើកឡានក្រឡឹងទៅមក របស់អ្នកគាំទ្រគណបក្សប្រជាជនកម្ពុជា។ ក្នុងនោះ ក៏មានការពង្រាយកងកម្លាំង ប្រដាប់ដោយខែល និងដំបង ពាសពេញទីរួមខេត្តកំពង់ធំផងដែរ។ បើទោះជាយ៉ាងនេះក្ដី លោក ស៊ុន ចន្ធី អះអាងថា មិនមានការប្រឈមមុខដាក់គ្នា ឬការប៉ះទង្គិចណាមួយកើតមានឡើយ។
ប្រធានស្ដីទីគណបក្សសង្គ្រោះជាតិ លោកកឹម សុខា បានថ្លែងទៅកាន់អ្នកគាំទ្ររបស់ខ្លួនជាច្រើនរយនាក់ អំពីគោលនយោបាយរបស់គណបក្សសង្គ្រោះជាតិ។ លោកបានលើកឡើងពីជំហររបស់គណបក្សសង្គ្រោះជាតិផងដែរ។ ជាជំហរទាមទារយុត្តិធម៌ ជូនប្រជាពលរដ្ឋម្ចាស់ឆ្នោត តាមរយៈការស៊ើបអង្កេតលើភាពមិនប្រក្រតីនៃការបោះឆ្នោត និងបោះឆ្នោតឡើងវិញជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ