បក្សជាប់ឆ្នោតទាំងពីរមិនទាន់ហ៊ាននិយាយពីភាពធូរស្រាល
មន្ត្រីជាន់ខ្ពស់គណបក្សប្រជាជនកម្ពុជា និងគណបក្សសង្គ្រោះជាតិនៅទាន់ហ៊ានអះអាងអំពីភាពធូរស្រាលនៃបរិយាកាសនយោបាយនៅឡើយទេ បើទោះជាការបើកកញ្ចប់សុវត្ថិភាព"ក" នៃការបោះឆ្នោត បានចាប់ផ្តើមហើយក៏ដោយ។ គណបក្សប្រជាជនកម្ពុជានិយាយថាស្ថានភាពនៅផុយស្រួយនៅឡើយ ខណៈពេលដែលគណបក្សសង្គ្រោះជាតិទាមទារអោយមានការបើកកញ្ចប់សុវត្ថិភាពនៃការបោះឆ្នោតនៃខេត្តជាច្រើនទៀត។
ចុះផ្សាយនៅថ្ងៃ៖
ស្តាប់ - ០១:២៨
ការផ្ទៀងផ្ទាត់លទ្ធផលឆ្នោតតាមរយៈការបើកកញ្ចប់សុវត្ថិភាពរបស់ គ.ជ.ប គឺជាស្នូលនៃភាពតានតឹងនៃបរិយាកាសនយោបាយ នៅក្រោយថ្ងៃបោះឆ្នោត។ ប៉ុន្តែ បើតាមការអះអាងរបស់ លោក សុន ឆ័យ មន្ត្រីជាន់ខ្ពស់របស់គណបក្សសង្គ្រោះជាតិ ការបើកកញ្ចប់សុវត្ថិភាពនៃការបោះឆ្នោតដែលអនុញ្ញាតអោយមានការផ្ទៀងផ្ទាត់លទ្ធផលបោះឆ្នោតតែមួយករណី នៅក្នុងខេត្តក្រចេះនោះ វាមិនមែនជាកត្តាកំណត់នៃការថមថយភាពតានតឹងនោះឡើយ។
មន្ត្រីគណបក្សសង្គ្រោះជាតិដដែលបន្តប្រាប់វិទ្យុបារាំងអន្តរជាតិ នៅព្រឹកថ្ងៃអាទិត្យនេះថា ក្រុមប្រឹក្សាធម្មនុញ្ញត្រូវបញ្ជាអោយគ.ជ.ប បើកកញ្ចប់សុវត្ថិភាពនៃការបោះឆ្នោតនេះ យ៉ាងហោចណាស់នៅ១០ខេត្តដែរ។ ចំពោះលោកសុន ឆ័យ គឺការស៊ើបអង្កេតជាទូទៅមួយ និងការទទួលស្គាល់អំពីកំហុសរបស់ គ.ជ.ប និងគណបក្សប្រជាជនកម្ពុជា ទើបជាកត្តាដែលធ្វើអោយប្រជាជនកម្ពុជាស្ងប់ចិត្ត និងធានាអំពីបរិយាកាសធូរស្រាលនោះ។
ទំនងជាការទាមទាររបស់គណបក្សសង្គ្រោះជាតិនៅរឹងត្អឹងដដែលនេះហើយ បានជាអ្នកនាំពាក្យគណបក្សប្រជាជនកម្ពុជា លោក ខៀវ កាញារីទ្ធ បញ្ជាក់ថា ស្ថានភាពទូទៅនៅផុយស្រួយនៅឡើយ។ តែលោកខៀវ កាញារីទ្ធិ ក៏អះអាងផងដែរថា គណបក្សទាំងពីរបានមើលឃើញពន្លឺនៃការដោះស្រាយសម្រាប់ពេលខាងមុខហើយ។
មន្ត្រីជាន់ខ្ពស់របស់គណបក្សប្រជាជនកម្ពុជាមួយរូបទៀត គឺលោកជាម យៀប លោកជាម យៀប បានដាក់ការទទួលខុសត្រូវនៃបរិយាកាសតានតឹងផ្នែកនយោបាយ ទៅលើគណបក្សសង្គ្រោះជាតិវិញ។ សមាជិកការិយាល័យនយោបាយរបស់គណបក្សប្រជាជនកម្ពុជារូបនេះ បានអះអាងប្រាប់វិទ្យុបារាំងថា ប្រសិនបើគណបក្សសង្គ្រោះជាតិមានសុឆន្ទៈក្នុងការធ្វើអោយស្ថានភាពធូរស្រាលនោះ គណបក្សប្រជាជនកម្ពុជារបស់លោកបានត្រៀមលក្ខណៈរួចហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ