គណបក្សសង្គ្រោះជាតិបន្ទន់ឥរិយាបថមកត្រឹមការសុំឱ្យមានអ.ស.ប.ជាអ្នកសង្កេតការណ៍វិញ
គណបក្សសង្គ្រោះជាតិបាន បន្ទន់ឥរិយាបថ ពីការទាមទារឲ្យអង្គការសហប្រជាជាតិធ្វើជាអាជ្ញាកណ្តាលនៃគណៈកម្មាធិការចម្រុះ អោយមកធ្វើត្រឹមជាអ្នកសង្កេតការណ៍វិញ។ ការបន្ទន់ឥរិយាបថនេះ ត្រូវបានបង្ហាញតាមរយៈលិខិតរបស់លោក សម រង្ស៊ី ប្រធានគណបក្សសង្គ្រោះជាតិ ផ្ញើទៅលោក បាន គីមូន អគ្គលេខាធិការអង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
នៅក្នុងលិខិតចុះថ្ងៃទី៥សីហា លោក សម រង្ស៊ី បានស្នើឲ្យលោក បាន គីមូន បញ្ជូនអ្នកជំនាញ ក្នុងនាមជាអ្នកសង្កេតការណ៍ មកចូលរួមក្នុងគណៈកម្មការចម្រុះមួយ វាយតម្លៃអំពីសុពលភាពនៃលទ្ធផលបោះឆ្នោតនីតិកាលទី៥ នៅកម្ពុជា។ លោក កឹម សុខា ប្រធានស្តីទីគណបក្សសង្គ្រោះជាតិបានប្រាប់វិទ្យុបារាំង អន្តរជាតិថា ជំហរនៃការបន្ទន់ឥរិយាបថនេះគឺ ជាការសម្របសម្រួលបន្ធូរភាពតានតឹង ហើយថាស្មារតីនៃការសម្របសម្រួលនេះ បានកើតចេញពីការជជែកគ្នារវាងគណបក្សទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ។
បើតាមប្រសាសន៍របស់ លោក កឹម សុខា គឺគណបក្សទាំងពីរកំពុងបន្តធ្វើការងារជាមួយគ្នា ដើម្បីនិយាយអំពីការបង្កើតគណៈកម្មការមួយ។ ខណៈដែលលោកកឹម សុខា បានបង្ហើបអំពីការពិភាក្សាការងាររវាងគណបក្សទាំងពីរ ស្រាប់តែគណៈកម្មាធិការជាតិរៀបចំការបោះឆ្នោត បានអំពាវនាវនៅថ្ងៃ សុក្រនេះ ឲ្យគណបក្សប្រជាជនកម្ពុជា និងគណបក្សសង្គ្រោះជាតិ ចូលរួមប្រជុំ ដើម្បីសម្រេចបង្កើតគណៈកម្មការពិសេសមួយសម្រាប់ត្រួតពិនិត្យ និងផ្ទៀងផ្ទាត់របាយការណ៍នៃភាពមិនប្រក្រតីទាំងឡាយក្នុងថ្ងៃបោះ ឆ្នោត។
គួររម្លឹកថា ប៉ុន្មានថ្ងៃក្រោយការបោះឆ្នោត គ.ជ.ប. បានកោះហៅគណបក្សប្រជាជកម្ពុជា និងគណបក្សសង្គ្រោះជាតិ ម្តងរួចមកហើយ តបនឹងសំណើរបស់បក្សទាំងពីរ ដើម្បីប្រជុំឯកភាពគ្នាបង្កើតគណៈកម្មការពិសេសមួយ សម្រាប់ដោះស្រាយភាពមិនប្រក្រតី។ តែការកោះហៅប្រជុំ កាលពីថ្ងៃទី៣សីហាកន្លងទៅ ត្រូវទទួលបរាជ័យដោយសារតែគណបក្សសង្គ្រោះជាតិ មិនបញ្ជូនតំណាងចូលរួម ដោយគេអះអាងថាគណៈកម្មការខាងលើនៅមានភាពចង្អៀតនៅឡើយ ដែលមិនសមស្របទៅនឹងការស្នើសុំរបស់គណបក្សសង្គ្រោះជាតិ។
ហើយរហូតមកដល់ពេលនេះ សេចក្ដីអំពាវនាវចុងក្រោយមួយរបស់ គ.ជ.ប ចុះថ្ងៃសុក្រទី៩ សីហានេះ បង្ហាញថា កន្លងមក គ.ជ.ប បានទទួលរបាយការណ៍ជាច្រើនស្ដីអំពីភាពមិនប្រក្រតី ជុំវិញការបោះឆ្នោត។ ក្នុងនោះ គ.ជ.ប សង្ឃឹមថា គណបក្សនយោបាយទាំងពីរ នឹងមានសុឆន្ទៈ ក្នុងការចូលរួមបង្កើតគណៈកម្មការពិសេសនេះ ឱ្យបានឆាប់រហ័ស ដើម្បីដោះស្រាយបញ្ហាខាងលើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ