គ.ជ.ប ប្រកាសឲ្យគណបក្សនយោបាយតម្កល់ប្រាក់ ១៥លានរៀល
ខណៈដែលការចុះឈ្មោះបេក្ខជន និងគណបក្សនយោបាយសម្រាប់ការបោះឆ្នោតជិតចូលមកដល់ គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសឲ្យគណបក្សនយោបាយដែលចង់ចូលរួមការបោះឆ្នោតត្រូវតម្កល់ប្រាក់ ១៥លានរៀល។ ការតម្រូវឲ្យបក្សនយោបាយតម្កល់ប្រាក់នេះត្រូវបានអង្គការសង្កេតការណ៍បោះឆ្នោតចាត់ទុកថា ជាសម្ពាធទៅលើគណបក្សតូចៗ ខណៈដែលរដ្ឋមិនបានជួយគាំទ្រថវិកាទាល់តែសោះដល់បក្សនយោបាយ។
ចុះផ្សាយនៅថ្ងៃ៖
ស្តាប់ - ០២:២៦
គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសជូនដំណឹងនៅចុងខែមីនានេះ ឲ្យគណបក្សនយោបាយដែលមានបំណងចូលរួមការបោះឆ្នោតត្រូវតម្កល់ប្រាក់១៥លានរៀលនៅឯរតនាគារជាតិ។ ការតម្រូវឲ្យគណបក្សនយោបាយតម្កល់ប្រាក់ជាមុនបែបនេះធ្វើឡើង ដោយយោងទៅតាមច្បាប់បោះឆ្នោតជ្រើសតាំងអ្នកតំណាងរាស្ត្រ។ ប្រាក់តម្កល់ ១៥ លានរៀល ឬស្មើនឹងជាង ៣ ៧០០ដុល្លារអាមេរិកនឹងត្រូវបង្វិលជូនទៅកាន់គណបក្សសាម៉ីវិញ ដរាបណាគណបក្សនោះដណ្តើមបានការគាំទ្រយ៉ាងតិច ៣% នៃសំឡេងឆ្នោតសរុប ឬបានទទួលកៅអីយ៉ាងតិចមួយនៅក្នុងរដ្ឋសភា។ ប្រសិនបើទទួលបានសំឡេងតិចជាងនេះ ប្រាក់នោះនឹងមិនត្រូវបានបង្វិលជូនវិញឡើយ។ បទបញ្ញត្តិនេះត្រូវបានអង្គការសង្កេតការណ៍បោះឆ្នោតមួយចំនួនហៅថា ជាសម្ពាធទៅលើគណបក្សតូចៗ។
លោកគល់ បញ្ញា នាយកអង្គការ Comfrel បានប្រាប់វិទ្យុបារាំងអន្តរជាតិនៅថ្ងៃនេះថា ការតម្រូវឲ្យតម្កល់ប្រាក់ជាមុននេះ គឺជាឧបសគ្គធ្វើឲ្យគណបក្សនយោបាយជាច្រើនមិនអាចចូលរួមបោះឆ្នោតបាន។ ជាក់ស្តែង គណបក្សនយោបាយដែលចុះឈ្មោះនៅឯក្រសួងមហាផ្ទៃមានដល់ទៅជាង៤០ ប៉ុន្តែ មានតែគណបក្សប្រហែល ១០ ប៉ុណ្ណោះដែលបានចូលរួមក្នុងការបោះឆ្នោត។ លោកកត់សម្គាល់ទៀតថា នៅកម្ពុជា រដ្ឋមិនបានផ្តល់ការគាំទ្រថវិកាដល់បក្សនយោបាយទេ តែបែរជាដាក់សម្ពាធទៅលើគណបក្សទាំងនោះទៅវិញ។
គេនៅមិនទាន់ដឹងថា មានគណបក្សនយោបាយប៉ុន្មានទេដែលនឹងចូលរួមក្នុងការបោះឆ្នោតនៅថ្ងៃទី២៨ កក្កដាខាងមុខនេះ។ ការចុះឈ្មោះគណបក្សនយោបាយ និងបេក្ខជនសម្រាប់ការបោះឆ្នោតនឹងចូលមកដល់ក្នុងខែមេសានេះហើយ។ អង្គការ Comfrel គ្រោងនឹងពង្រាយអ្នកសង្កេតការណ៍ ៦០០០នាក់នៅថ្ងៃទី២៧ និង២៨ កក្កដា ដើម្បីពិនិត្យមើលដំណើរការបោះឆ្នោតនេះ។
លោកអ៊ឹម សួស្តី ប្រធាន គ.ជ.ប បានថ្លែងប្រាប់វិទ្យុបារាំងអន្តរជាតិកាលពីថ្ងៃសៅរ៍ម្សិលមិញថា លោកមិនសង្ឃឹមថានឹងមានអ្នកសង្កេតការណ៍អន្តរជាតិចូលរួមច្រើនទេសម្រាប់ការបោះឆ្នោតនៅកម្ពុជាលើកនេះ ពីព្រោះកម្ពុជាចេះរៀបចំខ្លួនឯងបានល្អហើយ។ ប៉ុន្តែគណបក្សប្រឆាំងបានចាត់ទុកថា អវត្តមាននៃអ្នកសង្កេតការណ៍អន្តរជាតិ គឺដោយសារតែអវត្តមានលោកសម រង្ស៊ី ពីក្នុងការបោះឆ្នោតនេះ។
យ៉ាងណាក៏ដោយ គណបក្សសង្គ្រោះជាតិដែលជាការរួមបញ្ចូលគ្នារវាងគណបក្សសម រង្ស៊ី និងគណបក្សសិទ្ធិមនុស្សកំពុងត្រៀមខ្លួនដើម្បីចូលរួមការបោះឆ្នោត។ ការតម្កល់ប្រាក់ ១៥លានរៀល និងអវត្តមានលោកសម រង្ស៊ី ទំនងជាមិនមែនជាហេតុផលធ្វើឲ្យគណបក្សនេះធ្វើពហិការមិនចូលរួមការបោះឆ្នោតនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ