ក្រុមហ៊ុនចិនបានព្យួរគម្រោងជំនួញរបស់ខ្លួននៅក្នុងប្រទេសស៊ីរី
ប្រទេសចិន គឺសម្ព័ន្ធមិត្តម្នាក់របស់ប្រទេសស៊ីរី។ តែនៅចំពោះមុខវិបត្តិវឹកវរដែលស៊ីរីកំពុងជួបប្រទះបច្ចុប្បន្ន រដ្ឋាភិបាលក្រុងប៉េកំាងបានស្នើឲ្យក្រុមហ៊ុនចិនដែលរកស៊ីនៅស៊ីរីដកខ្លួនចេញពីទីនោះមួយរយៈ។ យោងតាមស្ថាទូតចិនប្រចំាក្រុងដាម៉ាសឲ្យដឹងថា សព្វថ្ងៃ នៅសល់ក្រុមហ៊ុនចិនតែ២គត់ដែលកំពុងមានវត្តមាននៅក្នុងប្រទេសស៊ីរី។
ចុះផ្សាយនៅថ្ងៃ៖
ស្តាប់ - ០១:៤៣
សេចក្តីសម្រេចរបស់រដ្ឋាភិបាលក្រុងប៉េកំាងយ៉ាងដូច្នេះ មកពីចិនមិនចង់ឃើញសេណារីយ៉ូនៅក្នុងប្រទេសលីប៊ីកើតមានជាថ្មីនៅក្នុងប្រទេសស៊ីរី។ ចិនធ្លាប់បានទទួលបទពិសោធន៍យ៉ាងជូរចត់នៅក្នុងការជម្លៀសជនជាតិចិនប្រមាណជា ៣៦ ០០០នាក់ចេញពីលីប៊ីកាលពីនិទាឃរដូវ ឆ្នំា ២០១១។ « ព្រឹត្តិការណ៍បច្ចុប្បន្ននៅស៊ីរីកំពុងជះឥទ្ធិពលយ៉ាងអាក្រក់លើកិច្ចសហប្រតិបត្តិការណ៍សេដ្ឋកិច្ចជាមួយចិន។ ចិនមិនជម្រុញឲ្យក្រុមហ៊ុនរបស់ខ្លួនឲ្យទៅបោះទុនរកស៊ីនៅស៊ីរីទេ » នេះជាការថ្លែងរបស់លោក Zhong Maning នាយកការិយាល័យទទួលបន្ទុកកិច្ចការអាស៊ីខាងលិច និងអាហ្រ្វិកនៃក្រសួងការបរទេសចិនកាលពីថ្ងៃទី២៩ សីហា។
យោងតាមលោក Fang Min អ្នកទទួលខុសត្រូវនៅស្ថានកុងស៊ុលនៃស្ថានទូតចិនប្រចំាក្រុងដាម៉ាសឲ្យដឹងថា សព្វថ្ងៃ មានជនជាតិចិនចំនួន ៤៦នាក់កំពុងមានវត្តមាននៅក្នុងប្រទេសស៊ីរី ដែលភាគច្រើន ជាអ្នកការទូត និងអ្នកកាសែត ព្រមទំាងក្រុមហ៊ុនចិនចំនួន ២ដែលរកស៊ីផ្នែកទូរគមនាគមន៍ជាមួយនឹងបុគ្គលិកតែប៉ុន្មាននាក់ប៉ុណ្ណោះ។ ចំណែកអ្នកផ្សេងទៀតបានចាកចេញពីប្រទេសស៊ីរីអស់ហើយ។ មុនគេគឺ China National Petroleum Corporation ដែលបានបោះទុនរកស៊ីនៅស៊ីរីតំាងពីឆ្នំា ២០០២ និងដែលមានភាគហ៊ុនរហូតដល់ទៅ ៣៥% នៅក្នុងក្រុមហ៊ុនប្រេង Syria Shell ក្នុងឆ្នំា ២០១០។
យ៉ាងណាក៏ដោយសម្រាប់ប្រទេសចិន គេមិនអាចប្រៀបប្រដូចស៊ីរី ទៅនឹងប្រទេសលីប៊ីបានទេ ព្រោះថានៅស៊ីរី ចិនទទួលបានផលប្រយោជន៍តិចជាងនៅលីប៊ីទំាងផ្នែកថាមពល និងសេដ្ឋកិច្ច។ យោងតាមលោក Zhong Maning ការដោះដូរពាណិជ្ជកម្មរវាងចិន និងស៊ិរីមិនសូវជាមានទំហំធំធេងទេ និងថា បើទោះបីជាស្ថានការណ៍នៅស៊ីរីបន្តធ្លាក់ដុនដាបក៏ដោយ ក៏ចិនមិនខ្វះថាមពលប្រើដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ