ជំនឿលើសេវាសុខភាពនៅកម្ពុជាហាក់មិនប្រសើរឡើងឡើយ
ចុះផ្សាយនៅថ្ងៃ៖
ស្តាប់ - ០៤:៤៥
អ្នកជំងឺខ្មែរនៅតែបន្តទៅព្យាបាល និងយ៉ាងហោចណាស់ ពិនិត្យសុខភាពទូទៅនៅបរទេសដដែល។ ជារៀងរាល់ថ្ងៃ ប្រជាជនខ្មែរនៅតែធ្វើដំណើរតាមរថយន្តក្រុងទៅទីក្រុងហូជីមិញប្រទេសវៀតណាម ជិះយន្តហោះទៅទីក្រុងបាងកកប្រទេសថៃ និងទៅសិង្ហបុរីជាដើម ដើម្បីទទួលការព្យាបាលជំងឺរបស់ពួកគេ។ ទិដ្ឋភាពនេះបានបង្ហាញថា ពលរដ្ឋនៅតែគ្មានទំនុកចិត្តលើសេវាសុខភាពរបស់កម្ពុជា ដែលបង្កឡើងដោយក្រុមគ្រូពេទ្យមួយចំនួន។ ដោយសារតែបាតុភូតនេះ កម្ពុជានៅតែបាត់បង់ថវិកាយ៉ាងច្រើនដែលពលរដ្ឋខ្មែរយកទៅចាយនៅបរទេស ហើយកិត្យានុភាពក្រុមគ្រូពេទ្យខ្មែរនៅតែមិនត្រដែតឡើងឡើយ។
ការរិះគន់លើភាពកំសោយនៃសេវាសុខភាពនៅកម្ពុជា ត្រូវបានពលរដ្ឋខ្មែរលើកឡើងកាន់តែច្រើនឡើង ក្នុងពេលបច្ចុប្បន្ននេះ។ បើទោះជាការរិះគន់ត្រូវបានធ្វើឡើងយ៉ាងទូលំទូលាយជាយូរមកហើយក៏ដោយ ប៉ុន្តែ គេសង្កេតឃើញថា គុណភាពសេវាសុខភាពហាក់នៅតែមិនប្រសើរឡើងសោះ។
គេនៅតែលឺព័ត៌មានស្តីពីអ្នកជំងឺបន្ទោសក្រុមគ្រូពេទ្យខ្មែរមួយចំនួន ដែលបានផ្តល់ការពិភាក្សាដែលមិនគួរអោយទុកចិត្ត។ រហូតដល់ពេលនេះហើយ នៅពេលដែលអ្នកជំងឺទៅពិភាក្សាជាមួយគ្រូពេទ្យនៅតាមបន្ទប់ព្យាបាលជំងឺឯកជនទាំងនោះ គេនៅបន្តលឺគ្រូពេទ្យសួរមកអ្នកជំងឺវិញថា "តើចង់ធ្វើអេកូទេ?" "ចង់ចាក់ថ្នាំឬទេ?" ជាដើម ជំនួសអោយការនិយាយប្រាប់អ្នកជំងឺអំពីមូលហេតុនៃជំងឺនោះ។ សំណួរទាំងនេះដែលធ្វើអោយគេគិតថា គ្រូពេទ្យមិនដឹងធ្វើអ្វីដើម្បីព្យាបាលជំងឺ ហើយមិនបានបង្ហាញអំពីចំណេះដឹងប្រាកដប្រជា ក្នុងការធ្វើសេចក្តីសន្និដ្ឋានលើរោគវិនិច្ឆ័យច្បាស់លាស់ ដើម្បីទាក់ទាញការជឿជាក់របស់អ្នកជំងឺឡើយ។
ការប៉ាន់ស្មានទាំងប្រថុយប្រថានរបស់ក្រុមគ្រូពេទ្យមួយចំនួន មានកើតឡើងតាំងពីជំងឺតូចតាច រហូតដល់ជំងឺធ្ងន់ធ្ងរ។ ទន្ទឹមគ្នានេះដែរ យូរៗម្តង គេនៅបន្តលឺ ស្ត្រីសំរាលកូនមានគ្រោះថ្នាក់ដល់ជីវិត ដោយសារតែការខ្វះខាតការយកចិត្តទុកដាក់របស់គ្រូពេទ្យមួយចំនួនដដែល។
ហេតុដូច្នេះហើយ ជារៀងរាល់ថ្ងៃគេនៅតែសង្កេតឃើញពលរដ្ឋខ្មែរ បន្តធ្វើដំណើរចាកចេញទៅប្រទេសជិតខាង ដោយគ្មានស្រាកស្រានឡើយ។ ពិសេសនៅពេលចុងសប្តាហ៍ ឬពេលមានឱកាសឈប់សំរាកពីការងារ។ ពួកគេបន្តទៅទីក្រុងហូជីមិញប្រទេសវៀតណាម ទីក្រុងបាងកកប្រទេសថៃ ប្រទេសសិង្ហបុរី និងម៉ាឡេស៊ីជាដើម។ អ្នកមានជីវភាពមធ្យម ឬលើសនេះបន្តិច ពួកគេនិយមទៅព្យាបាលនៅប្រទេសជិតខាង រីឯអ្នកមានជីវភាពធូរធារខ្លាំង ពួកគេជ្រើសរើសការព្យាបាលនៅប្រទេសឆ្ងាយៗ ដូចជាប្រទេសបារាំង និងអាមេរិក។
អ្នកជំងឺភាគច្រើនបាននិយាយដូចៗគ្នាថា មូលហេតុដែលជំរុញឲ្យពួកគេសម្រេចចិត្តទៅព្យាបាលនៅបរទេសនោះ គឺដោយសារពួកគេបាត់បង់ជំនឿលើគ្រូពេទ្យខ្មែរមួយចំនួន នៅក្នុងប្រទេសនេះឯង។ ការបាត់បង់ជំនឿដែលបណ្តាលមកពី៖ ទី១ គ្រូពេទ្យមួយចំនួននៅតែមិនអាចប្រតិបត្តិក្រមសីលធម៌វិជ្ជាជីវៈ ដោយនៅតែប៉ុនប៉ងព្យាយាមយកថវិកាពីអ្នកជំងឺ។
ជាទូទៅគេកត់សំគាល់ថា ប្រសិនបើគ្រូពេទ្យម្នាក់ដែលគ្មានសមត្ថភាពពិនិត្យជំងឺមួយទេ គ្រូពេទ្យក៏មិនចង់ណែនាំអ្នកជំងឺអោយទៅគ្រូពេទ្យជំនាញណាទៀតឡើយ។ គ្រូពេទ្យនោះត្រូវសាកល្បងព្យាបាលអ្នកជំងឺនោះសិន។ ទី២ កង្វះខាតគ្រូពេទ្យឯកទេសក៏នៅតែជាបញ្ហា។ ទី៣ គឺកង្វះខាតគ្រឿងបរិក្ខាពេទ្យទំនើបៗ និងគ្រូពេទ្យជំនាញដែលត្រូវប្រើប្រាស់បរិក្ខាទាំងនេះ។ ការខ្វះខាតទាំងនេះ អាចល្មមអោយពលរដ្ឋខ្មែរខកចិត្ត និងសម្រេចចិត្តទៅទទួលការព្យាបាលនៅបរទេសបានហើយ។ កង្វះខាតទាំងនេះ បើទោះជាពលរដ្ឋកម្ពុជាបានរិះគន់ជាច្រើនឆ្នាំចុងក្រោយដដែលជាដដែលក៏ដោយ ក៏វាហាក់គ្មានការកែប្រែនោះឡើយ។
តើគេត្រូវរង់ចាំដល់ពេលណា ទើបត្រូវចាប់ផ្តើមកែលំអការផ្តល់សេវាសុខភាពរបស់កម្ពុជា ដែលគេអាចជឿទុកចិត្តបាន? រដ្ឋាភិបាលនិយាយរួម និងក្រសួងសុខាភិបាលនិយាយដោយ ឡែក ត្រូវឆ្លើយតបនឹងសំណួរនេះ។ ពីព្រោះថា ការបណ្តែតបណ្តោយអោយពលរដ្ឋរបស់ខ្លួនចេញទៅទទួលការព្យាបាលនៅបរទេស វាមានតែការខាតបង់ថវិកាជាតិយ៉ាងច្រើន ប៉ុណ្ណោះ។ គេអាចយល់បានហើយថា អ្នកជំងឺតែម្នាក់ដែលធ្វើដំណើរទៅបរទេស ត្រូវចំណាយលើមធ្យោបាយធ្វើដំណើរ សេវាបកប្រែ ការស្នាក់នៅ ការទទួលទាន ការចំណាយលើសេវាព្យាបាល និងរួមទាំងថ្នាំពេទ្យទៀតផង។ ថវិការបស់ប្រជាជនកម្ពុជាត្រូវធ្លាក់ទៅលើដៃពលរដ្ឋបរទេសទាំងអស់ ឬគេអាចនិយាយបានថា ពលរដ្ឋកម្ពុជាកំពុងបង្ហូរថវិកាខ្លួនចូលទៅក្នុងចរន្តសេដ្ឋកិច្ចរបស់បរទេស។
ផ្ទុយទៅវិញ ប្រសិនបើប្រជាជនខ្មែរ អាចទទួលការព្យាបាលនៅក្នុងប្រទេសវិញ ប្រាក់កាសទាំងនេះពិតជាស្ថិតនៅក្នុងដៃរបស់ប្រជាជនខ្មែរ។
មិនមែនមានតែប្រាក់កាស ដែលត្រូវខាតបង់ពីចរន្តសេដ្ឋកិច្ចខ្មែរនោះទេ ក៏ប៉ុន្តែ កិត្យានុភាពនៃវិស័យសុខាភិបាលកម្ពុជា ឬក៏កិត្តិយសនៃក្រុមគ្រូពេទ្យខ្មែរក្នុងទិដ្ឋភាពរួមនោះ ក៏ត្រូវគេទទួលស្គាល់ថា អាប់ឱនដែរ។
គេត្រូវយល់ថា ការកសាងជំនឿទុកចិត្តឡើងវិញ វាមិនមែនជាការងាយស្រួលនោះឡើយ។ ពិសេសការជឿទុកចិត្តមួយដែលប្តូរជាមួយនឹងអាយុជីវិតរបស់មនុស្ស ក៏មិនប្រាកដជាមានអ្នកហ៊ានសាកល្បងឡើយ។
ដូច្នេះ គេត្រូវការដាក់ទុនលើពេលវេលាដ៏យូរអង្វែងមួយ ដើម្បីទាញយកការជឿទុកចិត្តរបស់ពលរដ្ឋខ្មែរត្រឡប់មកវិញ។ ម្ល៉ោះហើយ ការចាប់ផ្តើមពីពេលនេះ ជាមួយនឹងវិធានការច្បាស់លាស់ ដែលត្រូវផ្តើមចេញពីគោលនយោបាយផង និងពីបុគ្គលជាក្រុមគ្រូពេទ្យផង គឺជារឿងចាំបាច់បំផុត ដើម្បីតម្លៃសេវាសុខាភិបាលរបស់កម្ពុជាក្នុងនាមជាប្រទេសមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ