កូរ៉េខាងត្បូងហាមការនំាចូលផលិតផលសមុទ្រពីតំបន់ Fukushima ប្រទេសជប៉ុន
នៅថ្ងៃសុក្រ ទី៦ កញ្ញាសប្តាហ៍នេះ ប្រទេសកូរ៉េខាងត្បូងបានហាមមិនឲ្យមានការនំាចូលផលិតផលសមុទ្រពីតំបន់Fukushima ប្រទេសជប៉ុន។ សេចក្តីប្រកាសនេះបានធ្វើឡើង បន្ទាប់ពីមានព័ត៌មានលេចឡើងជុំវិញការធ្លាយទឹកមានជាតិវិទ្យុសកម្មពីមជ្ឈមណ្ឌលនុយក្លេអ៊ែរ Fukushima ហូរចូលក្នុងសមុទ្រ។
ចុះផ្សាយនៅថ្ងៃ៖
ស្តាប់ - ០១:៤៩
អ្វីដែលបានជម្រុញឲ្យរដ្ឋាភិបាលកូរ៉េខាងត្បូងសម្រេចចិត្តយ៉ាងដូចនេះ គឺដោយសារតែទឹកធ្លាយចេញពីមជ្ឈមណ្ឌលនុយក្លេអ៊ែរ Fukushima មានបង្កប់ដោយអត្រាជាតិវិទ្យុសកម្មខ្ពស់។ អត្រាជាតិវិទ្យុសកម្មដែលនឹងអាចជ្រាបចូលទៅក្នុងខ្លួនពពួកសត្វសមុទ្រគ្រប់បែបយ៉ាង ពិសេសត្រី និងគ្រឿងសមុទ្រផ្សេងៗទៀត។ គួររម្លឹកជូនថា ព្រឹត្តិការណ៍ផ្ទុះមជ្ឈមណ្ឌលនុយក្លេអ៊ែរ Fukushima ក្នុងប្រទេសជប៉ុនកាលពីថ្ងៃទី១១ មីនា ឆ្នំា ២០១១ កន្លងទៅ បានក្លាយជារឿងអាស្រូវយ៉ាងផុលផុសជាថ្មីនាប៉ុន្មានសប្តាហ៍ចុងក្រោយនេះ ពាក់ព័ន្ធនឹងការធ្លាយទឹកពីមជ្ឈមណ្ឌលនោះហូរចូលក្នុងសមុទ្រ។
តាមពិតទៅ និងក្រោយព្រឹត្តិការណ៍ថ្ងៃ១១ មីនា ឆ្នំា ២០១១ នោះមក ការបរិភោគគ្រឿងសមុទ្រនៅក្នុងប្រទេសកូរ៉េខាងត្បូងមានការថយចុះ ក្នុងពេលដែលរដ្ឋាភិបាលបានកម្រិតការនំាចូលផលិតផលសមុទ្រមកពីតំបន់ Fukushima និងតំបន់ក្បែរ Fukushima មួយចំនួនទៀតក្នុងប្រទេសជប៉ុន។ តែចាប់ពីពេលនេះតទៅ និងបើទោះបីជាផលិតផលសមុទ្រពីតំបន់ Fukushima នោះមានជាតិវិទ្យុសកម្ម ឬក៏គ្មានក៏ដោយ ក៏រដ្ឋាភិបាលក្រុងសេអ៊ូលហាមមិនឲ្យនំាចូលដែរ។
ក្រសួងជលផលកូរ៉េខាងត្បូងបានពន្យល់បកស្រាយថា កំណើនក្តីបារម្ភរបស់ប្រជាជនបានកើនឡើង ដោយសារតែទឹកមានជាតិវិទ្យុសកម្មនៅមជ្ឈមណ្ឌល Fukushima រាប់សិបតោនបានហូរចូលក្នុងសមុទ្រជារៀងរាល់ថ្ងៃ និងថា ព័ត៌មានដែលរដ្ឋាភិបាលជប៉ុនបានផ្តល់ឲ្យហាក់ដូចជាមិនសូវច្បាស់លាស់សោះ។
ជាការឆ្លើយតបវិញ អ្នកនំាពាក្យរដ្ឋាភិបាលជប៉ុនបានសម្តែងការខកចិត្តចំពោះការសម្រេចចិត្តរបស់ក្រុងសេអ៊ូល និងបញ្ជាក់ថា សន្តិសុខស្បៀងអាហារនៅជប៉ុនគឺមានការត្រួតពិនិត្យតឹងតែង ដោយផ្អែកលើបទដ្ឋានអន្តរជាតិ។ ទន្ទឹមគ្នានេះ អ្នកនំាពាក្យរដ្ឋាភិបាលជប៉ុនរូបនោះដដែលក៏បានអំពាវនាវឲ្យរដ្ឋាភិបាលកូរ៉េខាងត្បូងសម្រេចចិត្តដោយផ្អែកលើលទ្ធផលវិភាគតាមបែបវិទ្យាសាស្រ្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ