កូរ៉េខាងត្បូង៖លោកស្រីប៉ាក់ គុនហេ ត្រៀមខ្លួនចុះពីអំណាច
ថ្ងៃអង្គារនេះ ប្រធានាធិបតីកូរ៉េខាងត្បូង ប៉ាក់ គុនហេ បានប្រកាសត្រៀមខ្លួនចុះពីអំណាច ដោយបានសុំអោយសភារៀបចំរកមធ្យោបាយអោយលោកស្រីអាចចុះពីតំណែង។ បក្សប្រឆាំងមើលឃើញថា លោកស្រីប៉ាក់ គុនហឺ ប្រកាសដូច្នេះ ដើម្បីចៀសវាងអោយផុតពីនិតិវិធីដកលោកស្រីពីតំណែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៥
ទីបំផុត ប្រធានាធិបតីកូរ៉េខាងត្បូង ប៉ាក់ គុនហេ សម្រេចចិត្តថា ព្រមចុះពីអំណាចហើយ។ ថ្ងៃអង្គារនេះ លោកស្រីប៉ាក់ បានស្នើសភាអោយរកមធ្យោបាយអនុញ្ញាតអោយលោកស្រីបានចុះពីអំណាច អោយរកថ្ងៃខែ ដែលលោកស្រីត្រូវចុះពីអំណាច។
លោកស្រីលើកឡើងថា៖”ខ្ញុំនឹងចុះពីតំណែងស្របតាមច្បាប់ នៅពេលដែលមានការរៀបចំរួចរាល់ នូវ អន្តរកាលនយោបាយ មួយដែលនឹងនរ។ ខ្ញុំទុកអោយសភារៀបចំកិច្ចការទាក់ទងនឹងការកាត់បន្ថយពេលវេលានៃអាណត្តិរបស់ខ្ញុំ”។ ប្រធានាធិបតីកូរ៉េខាងត្បូងប្រគល់កិច្ចការដោះស្រាយវិបត្តិនយោបាយទៅអោយសភា។ សភាកូរ៉េខាងត្បូងពេលនេះ សំបូរសមាជិកបក្សប្រឆាំង ដោយសារតែបក្សកាន់អំណាចបានចាញ់ឆ្នោតសភា កាលពីខែមេសា ដើមឆ្នាំ។
តាមធម្មតា លោកស្រី ប៉ាក់ គុនហេ ត្រូវផុតអាណត្តិនៅខែកុម្ភៈ ឆ្នាំ២០១៨។ លោកស្រីពោរពេញទៅដោយរឿងអាស្រូវជាប់ពាក់ព័ន្ធនឹងអំពើមន្តអាគម ជាមួយស្ត្រីម្នាក់ ឈ្មោះឆយ ស៊ុនស៊ីល ដែលរឿងរ៉ាវនេះរាលដាលទៅជាអំពើពុករលួយ និងការប្រើប្រាស់អំណាច ដើម្បីប្រយោជន៍ផ្ទាល់ខ្លួន។ ប្រជាជនកូរ៉េបានចុះបាតុកម្មទាមទារអោយលោកស្រីប៉ាក់ ចុះពីអំណាចច្រើនលើកមកហើយ តែលោកស្រីមិនដែលធ្វើដឹងលឺទេ កន្លងមក។
បក្សប្រឆាំងមើលឃើញថា លោកស្រីប៉ាក់ គុនហេ ព្រមចុះពីអំណាចពេលនេះ គឺដើម្បីចៀសអោយផុតពីនិតិវិធីដកលោកស្រីចេញពីតំណែងតែប៉ុណ្ណោះ។ ទោះយ៉ាងនេះក្តី បក្សប្រឆាំងប្រាប់ថា នឹងប្រឹងប្រែងដើម្បីដកហូតតំណែងលោកស្រីអោយបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ