កំណែទម្រង់បោះឆ្នោត៖ ដល់ពេលដែលបក្សទាំងពីរបញ្ចេញក្រឡាអុក!
ចុះផ្សាយនៅថ្ងៃ៖
ស្តាប់ - ០៥:១០
គណៈកម្មការចម្រុះស្តីពីកំណែទម្រង់បោះឆ្នោតនៃគណបក្សប្រជាជនកម្ពុជានិងគណបក្សសង្គ្រោះជាតិខកខានមិនបានសម្រេចលទ្ធផលអ្វីទេកាលពីថ្ងៃចន្ទម្សិលមិញ។ ភាគីទាំងពីរបាននិយាយអំពីប្រធានបទផ្សេងគ្នាដែលមិនអាចរកចំណុចរួមបាន។ នេះជាសញ្ញាបញ្ជាក់ថា បើគ្មានដំណោះស្រាយនយោបាយទេ បញ្ហាផ្សេងក៏មិនងាយដោះស្រាយបានដែរ។ ម្យ៉ាងទៀត កំណែទម្រង់ការបោះឆ្នោតត្រូវការពេលយូរ ហើយវានឹងប្រើពេលកាន់តែយូរបើវិបត្តិនយោបាយនៅតែបន្ត។ ពេលនេះ ឈានដល់ដំណាក់កាលដែលគណបក្សទាំងពីរបញ្ចេញក្រឡាអុកដាក់គ្នាហើយ។
កិច្ចចរចាស្តីពីកំណែទម្រង់បោះឆ្នោតជាលើកទី២កាលពីថ្ងៃចន្ទម្សិលមិញខកខានមិនបានសម្រេចលទ្ធផលអ្វីឡើយ។ គណបក្សប្រជាជនកម្ពុជានិយាយអំពីសុចរិតភាពនិងតម្លាភាពរបស់អង្គការសង្គមស៊ីវិល ខណៈដែលគណបក្សសង្គ្រោះជាតិនិយាយអំពីតម្លាភាពរបស់គណៈកម្មាធិការជាតិរៀបចំការបោះឆ្នោត (គ.ជ.ប) ។
ទីបំផុត គណបក្សទាំងពីរក៏មិនអាចធ្វើសេចក្តីថ្លែងការណ៍រួមគ្នាណាមួយបានដែរ។ បន្ទាប់ពីកិច្ចប្រជុំ៣ម៉ោង ភាគីទាំងពីរបានត្រឹមអះអាងថានឹងជួបគ្នាជាថ្មីនៅសប្តាហ៍ក្រោយ។ តាមពិតវាមិនមែនជារឿងចម្លែកនិងគួរឲ្យភ្ញាក់ផ្អើលទេសម្រាប់អ្នកតាមដានបញ្ហានេះ។ មិនភ្ញាក់ផ្អើលពីព្រោះម្យ៉ាងកំណែទម្រង់បោះឆ្នោតជាបញ្ហាស្មុគស្មាញដែលទាមទារពេលវេលាយូរ និងម្យ៉ាងទៀត ការចរចាក្នុងពេលដែលវិបត្តិនយោបាយកំពុងជាប់គាំងបែបនេះមិនងាយដោះស្រាយបញ្ហាបានទេ។
គួរកត់សម្គាល់ថា កាលពីមុនគណបក្សសង្គ្រោះជាតិជាអ្នកទាមទារឲ្យមានកំណែទម្រង់ ហើយគណបក្សប្រជាជនជាអ្នកឆ្លើយតប ប៉ុន្តែ ស្រាប់តែឥឡូវដល់វេនដែលគណបក្សប្រជាជនកម្ពុជាទាមទារវិញម្តង។ ជាក់ស្តែង ពេលនេះ បក្សកាន់អំណាចទាមទារឲ្យជជែកអំពីតម្លាភាពរបស់សង្គមស៊ីវិល។ មន្ត្រីជាន់ខ្ពស់គណបក្សប្រជាជន លោក ជាម យៀប ក៏ធ្លាប់បានបង្ហើបថា ការកំណត់ឲ្យមេដឹកនាំនយោបាយមានសញ្ញាតិតែមួយក៏អាចជារបៀបវារៈមួយទៀតដែរ ដែលគណបក្សប្រជាជនដាក់ជូនគូបដិបក្ខ។
ការដាក់លក្ខខណ្ឌទាំងនោះចូលក្នុងរបៀបវារៈនៃការចាពីសំណាក់បក្សកាន់អំណាចត្រូវគេមើលឃើញថា ជាក្រឡាអុកសម្រាប់ទប់ទល់ជាមួយនឹងការទាមទារដ៏ខ្ពស់របស់គណបក្សសង្គ្រោះជាតិ។ គណបក្សសង្គ្រោះជាតិដែលប្រាកដណាស់ថា នឹងទាមទារចង់បានយន្តការបោះឆ្នោតមួយដែលខ្លួនស្រមៃចង់បានពោលគឺជាយន្តការដែលខុសស្រឡះពី គ.ជ.ប បច្ចុប្បន្ន ដែលគណបក្សប្រជាជនពិបាកនឹងទទួល។
លក្ខណ្ឌទាមទារទៅវិញទៅមកមិនចេះចប់ទាំងអសើនេះនឹងក្លាយជាឧបសគ្គដែលធ្វើឲ្យកិច្ចចរចាមិនអាចចេញរួចឡើយ។ បញ្ហាមិនពិបាកយល់ទេពីព្រោះនរណាក៏ដឹងដែរថា អ្វីដែលគណបក្សប្រជាជនចង់បានបំផុតគឺការកៀងគរឲ្យគណបក្សសង្គ្រោះជាតិចូលសភា។ រីឯគណបក្សសង្គ្រោះជាតិវិញ គោលបំណងធំបំផុតគឺការបោះឆ្នោតឡើងវិញឬបោះឆ្នោតមុនអាណត្តិ។ ដូច្នេះ កំណែទម្រង់បោះឆ្នោតដែលគេកំពុងជជែកគ្នាពេលនេះមិនមែនជាអាទិភាពទី១ របស់គណបក្សទាំងពីរឡើយ។
តាមពិត ដើម្បីឲ្យដំណោះស្រាយនៃបញ្ហាអាចដំណើរការទៅដោយរលូនទៅតាមភាព«ឡូហ្សិក»របស់វា គេចាំបាច់ត្រូវដោះស្រាយបញ្ហានយោបាយជាមុន។ ប៉ុន្តែ បើពិនិត្យមើលស្ថានភាពជាក់ស្តែង គេមើលមិនឃើញទាល់តែសោះអំពីច្រកចេញពីព្រោះតែម្ខាងៗមានលក្ខខណ្ឌស្លាប់រស់របស់ខ្លួនដែលភាគីបដិបក្ខមិនអាចទទួលយកបាន។ យ៉ាងណាក៏ដោយចុះ កិច្ចចរចាអំពីកំណែទម្រង់ការបោះឆ្នោតក៏មិនអត់ប្រយោជន៍ដែរពីព្រោះទី១ វាអាចធ្វើឲ្យស្ថានការណ៍ស្ងប់ស្ងាត់ក្រោមហេតុផលថារក្សាបរិយាកាសពេលកំពុងចរចាគ្នា។ និងទី២ វាក៏អាចមានលទ្ធផលបណ្តើរៗអំពីកំណែទម្រង់បោះឆ្នោតដែរបើទោះជាមិនលឿនក៏ដោយពោលគឺ«មានតិចប្រសើរជាងគ្មានសោះ»។
ប៉ុន្តែ ការរំពឹងទុកអំពីដំណោះស្រាយបញ្ចប់វិបត្តិនយោបាយក្នុងពេលឆាប់ៗ ក៏ដូចជាការចង់ឃើញយន្តការបោះឆ្នោតមួយដូចដែលបក្សប្រឆាំងនិងសង្គមស៊ីវិលស្រមៃនោះទំនងជាមិនខុសអ្វីពីការ«ផ្កាប់បំពុងរង់ចាំទឹកភ្លៀង»នោះឡើយ។ យ៉ាងណាក៏ដោយចុះ មេឃស្រទុំរកកលចង់ភ្លៀងក៏អាចធ្វើឲ្យមនុស្សសត្វទាំងពួងទទួលអារម្មណ៍ត្រជាក់បន្តិចដែរបើទោះជាភ្លៀងមិនបង្អុចុះក្តី។ យ៉ាងណាមិញ ស្ថានការណ៍ស្ងប់ស្ងាត់ក៏អាចធ្វើឲ្យមហាជនមានអារម្មណ៍ស្ងប់ស្ងាត់ទៅតាមនោះដែរបើទោះបីជាប្រទេសកំពុងមានវិបត្តិនយោបាយក្តី។
សរុបមកវិញ កំណែទម្រង់បោះឆ្នោត បើគ្រាន់តែនិយាយទំនងជាស្រួល ប៉ុន្តែ បើជជែកគ្នាលម្អិតទៅតាមការចង់បានរបស់គ្រប់ភាគីវានឹងស្មុគស្មាញរហូតដល់គេពិបាកនឹងមើលឃើញច្រកចេញ ជាពិសេសក្នុងស្ថានភាពដែលវិបត្តិនយោបាយកំពុងជាប់គាំងបែបនេះ។ អណឹះតទៅ កិច្ចចរចាអំពីកំណែទម្រង់បោះឆ្នោតឈានដល់ដំណាក់កាលស្មុគស្មាញហើយ នៅពេលដែលគណបក្សទាំងពីរផ្តើមបញ្ចេញក្រឡាអុករៀងៗខ្លួនដើម្បីទប់ទល់គ្នានៅលើសង្វៀនតុចរចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ