ខៀវ កាញារីទ្ធ៖ គណបក្សប្រជាជនបាន ៦៨កៅអី គណបក្សសង្រ្គោះជាតិ ៥៥កៅអី
លោកខៀវ កាញារីទ្ធិ អ្នកនាំពាក្យគណបក្សប្រជាជនកម្ពុជា បានអះអាង នៅល្ងាចថ្ងៃអាទិត្យនេះថា គណបក្សរបស់លោកជាអ្នកទទួលជ័យជម្នះ ក្នុងការបោះឆ្នោតតំណាងរាស្រ្ត លើកនេះ ដោយទទួលបានអាសនៈ ៦៨ ទល់ជាមួយនឹងគណបក្សសង្រ្គោះជាតិ ដែលទទួលបាន ៥៥អាសនៈ។
ចុះផ្សាយនៅថ្ងៃ៖ កែប្រែថ្ងៃទី៖
គិតត្រឹមល្ងាចថ្ងៃអាទិត្យនេះ គណៈកម្មាធិការជាតិរៀបចំការបោះឆ្នោត (គ.ជ.ប) នៅមិនទាន់ប្រកាសលទ្ធផលនៃការបោះឆ្នោតតំណាងរាស្រ្ត សម្រាប់អាណត្តិទី៥ ឆ្នាំ២០១៣នេះទេ។ ក៏ប៉ុន្តែ លោកខៀវ កាញារីទ្ធ បានថ្លែងប្រាប់សារព័ត៌មានបារាំង AFP ថា “យើងអាចនិយាយបានថា យើងទទួលជោគជ័យក្នុងការបោះឆ្នោតនេះ”។ មន្រ្តីអ្នកនាំពាក្យគណបក្សប្រជាជនកម្ពុជា ដែលជាគណបក្សកាន់អំណាច បានសរសេរនៅលើទំព័រហ្វេសប៊ុករបស់លោកថា បើតាមការប៉ាន់ស្មាន គណបក្សប្រជាជនទទួលបាន ៦៨អាសនៈ ចំណែកឯគណបក្សសង្រ្គោះជាតិវិញ ទទួលបាន ៥៥អាសនៈ។
ប្រសិនបើលទ្ធផលផ្លូវការ ពិតជាដូចការអះអាងរបស់លោកខៀវ កាញារីទ្ធិ មែន មានន័យថា គណបក្សប្រជាជន ដែលមាន ៩០អាសនៈ កាលពីអាណត្តិមុន ត្រូវបាត់បង់អាសនៈរហូតដល់ទៅ ២២អាសនៈ នៅក្នុងអាណត្តិថ្មីនេះ។ ចំណែកឯគណបក្សសង្រ្គោះជាតិវិញ ដែលមានត្រឹមតែ ២៩អាសនៈ (គណបក្សសមរង្ស៊ី បូកជាមួយគណបក្សសិទ្ធិមនុស្ស) មានអាសនៈកើនឡើង ២៦អាសនៈ។ ចំណែកឯគណបក្សហ៊្វុនស៊ិនប៉ិចវិញ ដែលជាគណបក្សដែលធ្លាប់ឈ្នះឆ្នោត កាលពីឆ្នាំ១៩៩៣ រៀបចំដោយអ៊ុនតាក់ មិនបានទទួលអាសនៈទាល់តែសោះ នៅឆ្នាំ២០១៣នេះ។
គួរបញ្ជាក់ថា នៅល្ងាចថ្ងៃអាទិត្យនេះដែរ លោកសម រង្ស៊ី ក្នុងនាមប្រធានគណបក្សសង្រ្គោះជាតិ បានចេញសេចក្តីថ្លែងការណ៍មួយប្រកាសថា គណបក្សរបស់លោកជាអ្នកទទួលជោគជ័យក្នុងការបោះឆ្នោតតំណាងរាស្រ្តថ្ងៃអាទិត្យនេះ។ សេចក្តីថ្លែងការណ៍នេះបានសរសេរថា៖ “ថ្ងៃនេះគឺជាទិវាជាប្រវត្តិសាស្រ្ត ដែលគណបក្សសង្រ្គោះជាតិបានឈ្នះការបោះឆ្នោតជ្រើសតាំងតំណាងរាស្រ្ត អាណត្តិទី៥ ឆ្នាំ២០១៣”។ ក៏ប៉ុន្តែ ភ្លាមៗក្រោយមក លោកសម រង្ស៊ី ក៏បានលុបចោលចេញសេចក្តីថ្លែងការណ៍នេះចេញវិញ ដោយចេញសេចក្តីថ្លែងការណ៍ថ្មីមួយ ប្រកាសត្រឹមតែអបអរសាទរ “ទិវាប្រវត្តិសាស្រ្ត ដែលប្រជាពលរដ្ឋខ្មែរបានអញ្ជើញចូលរួមយ៉ាងឱឡាឫក ក្នុងការបោះឆ្នោតជ្រើសតាំងតំណាងរាស្រ្ត”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ