លោកហ៊ុន សែន ថាCPPកំពុងរៀបចំប្តឹងអ្នកបង្ខូចកិត្តិយសបក្សខ្លួន
ស្របពេលដែលគណបក្សប្រឆាំងដ៏ធំបំផុតនៅកម្ពុជា កំពុងតែជួបប្រសព្វនឹងរឿងអាស្រូវយ៉ាងក្តៅគគុក មជ្ឈដ្ឋានមួយចំនួន យល់ថា កំដៅនេះគឺប្រាកដជាកើតចេញពីរងើកភ្លើងរបស់គណបក្សប្រជាជនកម្ពុជា។ ចំពោះការលើកឡើងនេះ លោកនាយករដ្ឋមន្ត្រីហ៊ុន សែន បានប្រកាសសារព្រមានមួយតាមរយៈទំព័រហ្វេសប៊ុកផ្លូវការរបស់លោក នាព្រឹកថ្ងៃទី ២៥មេសានេះថា នឹងមិនមានការអត់ឱនឲ្យអ្នកណាក៏ដោយ ដែលមួលបង្កាច់បង្ខួចកិត្តិយសគណបក្សប្រជាជនកម្ពុជា។ លោកហ៊ុន សែន ថែមទាំងបានបញ្ជាក់ថា ពេលនេះ គណបក្សប្រជាជនកម្ពុជា បាននិងកំពុងរៀបចំពាក្យប្តឹងបុគ្គលទាំងនោះហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ក្នុងនាមជាប្រធានគណបក្សប្រជាជនកម្ពុជា ដែលជាបក្សកាន់អំណាច លោកនាយករដ្ឋមន្ត្រីហ៊ុន សែន បានបញ្ចេញសារព្រមានមួយតាមរយៈទំព័រហ្វេសប៊ុករបស់លោកថា នឹងមិនអត់ឱនឲ្យគ្រប់បុគ្គលណាម្នាក់ ដែលបង្កាច់បង្ខួចកិត្តិយសរបស់គណបក្សប្រជាជនកម្ពុជានោះឡើយ។ លោកនាយករដ្ឋមន្ត្រី អះអាងថា គណបក្សរបស់លោក បានគោរពសិទ្ធិបញ្ចេញមតិ ប៉ុន្តែគណបក្សដាច់ខាតគឺប្រឆាំងចំពោះអ្នកដែលបញ្ចេញមតិ ក្នុងន័យបំផ្លាញសេចក្តីថ្លៃថ្នូររបស់ខ្លួន។ ចំពោះប្រការនេះ ប្រធានគណបក្សកាន់អំណាច យល់ថា សិទ្ធិបញ្ចេញមតិ និងការមួលបង្កាច់ មានចរិតខុសគ្នាដូចមេឃ និងដី។
ក្រៅពីសារព្រមាន លោកនាយករដ្ឋមន្ត្រីហ៊ុន សែន ក៏អំពាវនាវយ៉ាងស្លូតទៅកាន់អ្នកវិភាគ អ្នកអត្ថាធិប្បាយ កុំឲ្យព្យាយាមក្លែងបន្លំ ព័ណ៌ក្រហម និងព័ណ៌ផ្កាឈូក ថាដូចគ្នា។ ហើយប្រសិនបើបំភ្លៃព័ណ៌នេះ គណបក្ស ក៏លែងអត់ឱនឲ្យទៀតឡើយ ព្រោះការអត់ឱនកន្លងមក គឺមានដែនកំណត់។ ក្នុងនោះ លោកហ៊ុន សែន ក៏អំពាវនាវឲ្យសមាជិកបក្សប្រជាជន និងថ្នាក់ដឹកនាំគ្រប់ជាន់ថ្នាក់ រៀបចំមេធាវី ដើម្បីត្រៀមប្តឹងទៅកាន់តុលាការ ក្នុងករណីមានការមួលបង្កាច់រំលោភសិទ្ធិគណបក្សរបស់ខ្លួន។
លោកសុខ ឥសាន្ត អ្នកនាំពាក្យគណបក្សប្រជាជនកម្ពុជា បានប្រាប់វិទ្យុបារាំងអន្តរជាតិថា ពេលនេះ គណបក្ស កំពុងតែរៀបចំពាក្យប្តឹងអ្នកវិភាគ ដែលមានដូចជាលោកអ៊ូ វីរៈ ប្រធានអង្គការវេទិកាអនាគត ជាជំហានដំបូង ដោយយោងតាមភស្តុងដែលលោកអ៊ូ វីរៈ បាននិយាយប្រាប់ប្រព័ន្ធផ្សព្វផ្សាយថា ចំណាត់ការតាមប្រព័ន្ធតុលាការទៅលើមន្ត្រីជាន់ខ្ពស់របស់ គណបក្សសង្គ្រោះជាតិ នាពេលកន្លងទៅ គឺជាការរៀបចំទាំងស្រុងរបស់គណបក្សប្រជាជនកម្ពុជា។ តាមលោកសុខ ឥសាន្ត មិនមែនអ្នកវិភាគតែម្នាក់ទេ ដែលគណបក្សគ្រោងប្តឹង គឺនៅមានអ្នកវិភាគមួយចំនួនទៀត ដែលបានប្រើសូរស័ព្ទស្រដៀងគ្នានេះ ទៅកាន់មហាជន។
គណបក្សកាន់អំណាច យល់ថា សម្តីរបស់អ្នកវិភាគសង្គមរបៀបនេះ ហាក់ដូចជាការបំផ្លាញរូបភាពល្អរបស់គណបក្សប្រជាជនកម្ពុជា ហើយទង្វើនេះ មិនអាចធ្វើឲ្យបក្សនៅស្ងៀម មិនបញ្ចេញសកម្មភាពដើម្បីការពារខ្លួនបាននោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ