គណៈប្រតិភូអាហ្វហ្កានីស្ថានទៅប៉ាគីស្ថានដើម្បីនិយាយពីបញ្ហាសន្តិភាពរវាងភាគីជម្លោះ
គណៈប្រតិភូអាហ្វហ្កានីស្ថានមួយក្រុមដែលជាសមាជិកនៃឧត្តមក្រុមប្រឹក្សាអាហ្វហ្កានីស្ថានដើម្បីសន្តិភាពបានទៅប្រទេសប៉ាគីស្ថាននៅថ្ងៃច័ន្ទ ទី១២ វិច្ឆិកាម្សិលមិញ។ បេសកកម្មរយៈពេល ៣ថ្ងៃរបស់គណៈប្រតិភូអាហ្វហ្កានីស្ថានក្នុងទីក្រុងអ៊ីស្លាម៉ាបាតពេលនេះ គឺដើម្បីរៀបចំកិច្ចចរចាលើកដំបូងរវាងរដ្ឋអំណាចនៃប្រទេសជិតខាងទំាងពីរ ពិសេសក្នុងគោលដៅជួយជ្រោមជ្រែងឲ្យមានការផ្សះផ្សារវាងភាគីជម្លោះអាហ្វហ្កានីស្ថាននៅក្រោយការដកទ័ពអូតង់ចំនួន ១០០ ០០០នាក់ ពីប្រទេសអាហ្វហ្កានីស្ថាននាឆ្នំា ២០១៤។
ចុះផ្សាយនៅថ្ងៃ៖
ស្តាប់ - ០១:៣៣
បើគ្មានការចូលរួមពីប្រទេសប៉ាគីស្ថានទេ គេពិតជាមិនអាចរកឃើញនូវកិច្ចព្រមព្រៀងសន្តិភាពណាមួយនៅក្នុងតំបន់ឡើយ។ ជានិច្ចជាកាល ប្រទេសប៉ាគីស្ថានតែងតែទទួលការចោទប្រកាន់ពីបទបានផ្គាប់ចិត្ត គំាទ្រក្រុមឧទ្ទាមតាលីបង់អាហ្វហ្កានីស្ថាននៅលើទឹកដីរបស់ខ្លួន មានន័យថា តិច ឬច្រើន ទីក្រុងអ៊ីស្លាម៉ាបាតបានជះឥទ្ធិពលទៅលើក្រុមយុទ្ធជនអ៊ីស្លាមនិយមជ្រុលមួយនេះ។
គឺនៅក្នុងបរិបទនេះហើយ ទើបឧត្តមក្រុមប្រឹក្សាអាហ្វហ្កានីស្ថានដើម្បីសន្តិភាពបានចេញមុខសុំអន្តរាគមន៍ពីទីក្រុងអ៊ីស្លាម៉ាបាតដើម្បីផ្តើមទំនាក់ទំនងជាមួយក្រុមឧទ្ទាមតាលីបង់អាហ្វហ្កានីស្ថានដែលមានមេកើយមួយចំនួនកំពុងជ្រកកោនក្នុងទឹកដីប៉ាគីស្ថាន។ តែយ៉ាងណាក៏ដោយ ក្រុមអ្នកវិភាគមិនបានរង់ចំាលទ្ធផលអ្វីជាដុំកំភួននៅក្នុងកិច្ចចរចារវាងឧត្តមក្រុមប្រឹក្សាអាហ្វហ្កានីស្ថាន និងថ្នាក់ដឹកនំានយោបាយ និងយោធាប៉ាគីស្ថានទេ។
គួរជម្រាបជូនថា ជាទូទៅ ទំនាក់ទំនងរវាងប៉ាគីស្ថាន និងអាហ្វហ្កានីស្ថានមិនសូវជាល្អប៉ុន្មានទេ និងពេលខ្លះ តានតឹងទៀតផង។ ប្រទេសជិតខាងទំាងពីរតែងតែចោទគ្នាទៅវិញ ទៅមកពីបទបានផ្តល់ទីជម្រកឲ្យក្រុមយុទ្ធជនអ៊ីស្លាមនិយមជ្រុលដែលបានបង្កឲ្យមានអស្ថិរភាពនៅក្នុងតំបន់។ ទន្ទឹមគ្នានេះ និងជួនចំពេលដែលកម្លំាងទ័ពអូតង់គ្រោងនឹងចាកចេញពីប្រទេសអាហ្វហ្កានីស្ថាននៅក្នុងឆ្នំា ២០១៤ ខាងមុខនោះ ការបន្តមិនទុកចិត្តគ្នារវាងទីក្រុងកាប៊ូល និងអ៊ីស្លាម៉ាបាតនឹងរឹតតែបង្កការលំបាកថែមទៀតនៅក្នុងកិច្ចខិតខំប្រឹងប្រែងស្វែងរកការចរចាសន្តិភាពដើម្បីបិទបញ្ចប់វិបត្តិផ្ទៃក្នុងរបស់ប្រទេសអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ