វិទ្យាស្ថានស្រាវជ្រាវស៊ីព្រី៖ការចំណាយក្នុងវិស័យយោធាឆ្នំា ២០១៣ មានការថយចុះ
នៅថ្ងៃចន្ទ ទី១៤ មេសានេះ វិទ្យាស្ថានស្រាវជ្រាវស៊ីព្រីក្នុងប្រទេសស៊ុយអែតបានប្រកាសឲ្យដឹងថា ការចំណាយក្នុងវិស័យយោធាឆ្នំា ២០១៣ មានការថយចុះបន្ថែមទៀត បើធៀបនឹងឆ្នំា ២០១២។ យោងតាម ស៊ីព្រី ការថយចុះនេះត្រូវបានកត់សម្គាល់ឃើញមានច្រើននៅក្នុងប្រទេសបស្ចិមលោក ពិសេសអាមេរិក តាមរយៈការកាត់បន្ថយថវិកាយោធា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
បន្ទាប់ពីមានការថយចុះជាលើកទី១ ចំនួន ០,៤% ក្នុងឆ្នំា ២០១២ ធៀបនឹងឆ្នំា ១៩៩៨ មក ការចំណាយក្នុងវិស័យយោធាលើពិភពលោកបានបន្តធ្លាក់ចុះជាបន្តទៀតក្នុងឆ្នំា ២០១៣ ចំនួន ១,៩%។ យោងតាមវិទ្យាស្ថានស៊ីព្រី ពិភពលោកបានចំណាយលុយសម្រាប់វិស័យយោធាចំនួន ១ ៧៥០ ០០០ពាន់លានដុល្លារក្នុងឆ្នំា ២០១៣។ ជាទូទៅ ការធ្លាក់ចុះការចំណាយក្នុងវិស័យយោធាច្រើនកើតមាននៅក្នុងប្រទេសបស្ចិមលោក តាមរយៈការកាត់បន្ថយថវិកាយោធា។ ចំណែកនៅក្នុងក្រុមប្រទេសដែលកំពុងមានសេដ្ឋកិច្ចរីកលូតលាស់វិញ ការចំណាយក្នុងវិស័យយោធាបានកើនឡើងរហូតដល់ទៅទ្វេដង។
នៅសហរដ្ឋអាមេរិក រដ្ឋាភិបាលបានកាត់បន្ថយថវិកាយោធាចំនួន ៧,៨% សម្រាប់ឆ្នំា ២០១៣ បន្ទាប់ពីការបិទបញ្ចប់បេសសកម្មក្នុងប្រទេសអ៊ីរ៉ាក់ ការផ្តើមដកទ័ពអាមេរិកំាងបណ្តើរៗចេញពីប្រទេសអាហ្វហ្កានីស្ថាន និងការកាត់បន្ថយការចំណាយជាស្វ័យប្រវត្តិដែលអនុម័តដោយសភាអាមេរិកកាលពីឆ្នំា ២០១១។ នៅអឺរ៉ុប ប្រទេសបារំាងបានកាត់បន្ថយថវិកាយោធាប្រមាណជា ៤% សម្រាប់ឆ្នំា ២០១៣ ធៀបនឹងឆ្នំា ២០០៨។
ប្រទេសចិន រុស្ស៊ី និងអារ៉ាប៊ីសាអូឌីតជាប្រទេសស្ថិតមុខគេនៅក្នុងចំណោមប្រទេសទំាង ២៣ ដែលបានបង្កើនថវិកាយោធាទ្វេដងតំាងពីឆ្នំា ២០០៤។ ចិនបានបង្កើនថវិកាយោធារបស់ខ្លួនរហូតដល់ទៅ ៧,៤% ក្នុងឆ្នំា ២០១៣ ដោយសារតែខ្លួនកំពុងប្រឈមមុខនឹងជម្លោះដែនដីជាមួយបណ្តាប្រទេសអាស៊ីមួយចំនួន។ រីឯជប៉ុនដែលកំពុងបារម្ភពីមហិច្ចតាយោធារបស់ចិន រួមផ្សំនឹងនយោបាយជាតិនិយមរបស់លោកនាយករដ្ឋមន្រ្តីជប៉ុនស៊ីន ហ្សូអាបេ ក៏បានបិទបញ្ចប់ការកាត់បន្ថយថវិកាយោធារបស់ខ្លួនដែរ។ ងាកទៅប្រទេសអាហ្វហ្កានីស្ថានវិញ វិទ្យាស្ថានស៊ីព្រីបានកត់សម្គាល់ឃើញពីការបង្កើនការចំណាយក្នុងវិស័យយោធាដល់ទៅ ៧៧% នៅក្នុងក្របខណ្ឌនៃការដកទ័ពបរទេសទំាងអស់ចេញពីប្រទេសនាដំណាច់ឆ្នំា ២០១៤ នេះ។
នៅក្នុងតំបន់មជ្ឈិមបូព៌ា ថវិកាយោធាបានកើនចំនួន ៤% ក្នុងឆ្នំា ២០១៣។ តែគេមិនអាចដឹងតួលេខនៅក្នុងប្រទេសអេមីរ៉ាតអារ៉ាប់រួម អ៊ីរ៉ង់ កាតារ និងប្រទេសស៊ីរី។ នៅក្នុងប្រទេសអារ៉ាប៊ីសាអូឌីត ការចំណាយក្នុងវិស័យយោធាបានកើនលើសប្រទេសបារំាង និងប្រទេសអង់គ្លេស ដោយសារតែភាពតានតឹងជាមួយប្រទេសអ៊ីរ៉ង់ និងបារម្ភពីការបះបោរផ្ទៃក្នុង។ នៅក្នុងទ្វីបអាហ្រ្វិកឯណោះ ថវិកាយោធាក្នុងឆ្នំា ២០១៣ មានការកើនឡើងចំនួន ៨,៣% ពិសេសនៅក្នុងប្រទេសដែលមានចំណូលច្រើនពីការលក់ប្រេងកាតដូចយ៉ាងអាល់ហ្សេរី និងអង់ហ្គោឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ