មន្ត្រីការទូតកូរ៉េខាងជើងធ្វើទស្សនកិច្ចនៅអឺរ៉ុប
យោងតាមពត៌មានផ្តល់ឲ្យដោយទីភ្នាក់ងារពត៌មាន ជប៉ុន ក្យូដូ បានឲ្យដឹងថា លោក កាង សុកហ្ស៊ូ អ្នកទទួលបន្ទុកទំនាក់ទំនងការបរទេសរបស់របបកុម្មុយនិស្តកូរ៉េខាងជើង បានចាកចេញទៅធ្វើទស្សនៈកិច្ចនៅទ្វីបអឺរ៉ុបនៅថ្ងៃសោរ៍ទី ៦ កញ្ញានេះ។ ដំណើរទស្សនៈកិច្ចនេះ ត្រូវបានគេមើលឃើញថា ជាដំណើររំកិលខ្លួនរបស់កូរ៉េខាងជើង ក្នុងការស្វែងរកទំនាក់ទំនកល្អ ជាមួយប្រទេសលោកខាងលិចដ៏ទៃផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
លោក កាង សុកហ្ស៊ូ អតីតនាយករដ្ឋមន្ត្រីស្តីទី របស់រដ្ឋាភិបាលកុម្មុយនិស្តកូរ៉េខាងជើង បានចេញទៅធ្វើទស្សនៈកិច្ចលើកទីមួយ នៅបណ្តាប្រទេសមួយចំនួននៅអឺរ៉ុប មានដូចជាប៊ែលហ្ស៊ិក និងស្វ៊ីសជាដើម។ លោក កាង ត្រូវបានតែងតាំងជាលេខាទទួលបន្ទុកកិច្ចការបរទេស របស់គណបក្សពលករកូរ៉េខាងជើង កាលពីខែមេសា។ យោងតាមការផ្តល់ពត៌មានរបស់ ទីភ្នាក់ងារពត៌មានជប៉ុនដដែល លោកកាង ប្រហែលជានឹងឆ្លៀតទៅប្រទេសចិន ផងដែរ។
លោក កាង សុកហ្ស៊ូ ត្រូវបានគេធ្លាប់ស្គាល់ថាជាអ្នកការទូតរបស់កូរ៉េខាងជើង ដែលកន្លងមក ក្នុងអំឡុងទសវត្សឆ្នំា ៩០ គាត់បានដើរតួនាទីសំខាន់ ក្នុងការសម្របសម្រួលការទូតរវាងកូរ៉េខាងជើង ជាមួយនឹងអាមេរិក ចិន និងជប៉ុន។ ដំណើរទស្សនៈកិច្ចទៅអឺរ៉ុបនាពេលនេះ សបង្ហាញអំពីឆន្ទៈរបស់កូរ៉េខាងជើង ក្នុងការវិលទៅរកទំនាក់ទំនងល្អជាមួយប្រទេសលោកសេរី។ យ៉ាងណាមិញ ជប៉ុនបានលុបចោលនូវទណ្ឌកម្មសេដ្ឋកិច្ច ទៅលើកូរ៉េខាងជើង ដើម្បីជាការលើកទឹកចិត្ត ដែលអជ្ញាធរកូរ៉េខាងជើងបានធ្វើការស៊ើបអង្កេត ពីការបាត់ខ្លួនរបស់នាយទាហានជប៉ុន កាលពីជំនាន់ឆ្នាំ៧០-៨០។
មួយវិញទៀត យោងតាមទីភ្នាក់ងារពត៌មានដដែល លោករដ្ឋមន្ត្រីក្រសួងការបរទេសកូរ៉េខាងជើង ហ្រ៊ី ស៊ូយុង នឹងទៅចូលរួមក្នុងមហាសន្និបាទរបស់អង្គការសហប្រជាជាតិ នៅក្រុងញូវយ៉ក។ បើសិនពត៌មាននេះជាការពិតមែននោះ នេះជាលើកទីមួយហើយដែល រដ្ឋមន្ត្រីក្រសួងការបរទេសកូរ៉េខាងជើង ទៅជាន់ដីអាមេរិក នារយៈពេល១៥ឆ្នាំចុងក្រោយនេះ។ យ៉ាងណាក៏ដោយ គេពិបាកស្មានចិត្ត កូរ៉េខាងជើងណាស់ ព្រោះថាម្តងក្តៅ ម្តងត្រជាក់ រកទុកចិត្តមិនបាន។ តួយ៉ាងមុននេះមួយថ្ងៃ ភ្នាក់ងារថាមពលបរមាណូអន្តរជាតិ AIEA បានចេញរបាយការណ៍មួយនៅថ្ងៃសុក្រ ទី៥ កញ្ញា ថា កូរ៉េខាងជើងទំនងជាបាន បើកឲ្យដំណើរការឡើងវិញ នូវរោងចក្រផលិតជាតិព្លុយតូនីញ៉ូម ដើម្បីធ្វើជាគ្រាប់បែកបរមាណូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ