សាលាក្តីខ្មែរក្រហម នៅឆ្នាំ២០១៥ ត្រូវការថវិកា ៣៣,៨ លានដុល្លារ
គម្រោងចំណាយ សម្រាប់ឆ្នាំ២០១៥ របស់សាលាក្តីខ្មែរក្រហម ដែលប្រទេសម្ចាស់ជំនួយ ទើបតែអនុម័តនោះ ត្រូវបានកែសម្រួល ដោយបង្កើនចំនួនចំណាយ បើធៀបនឹងគម្រោងលើកមុន។ នោះគឺនៅឆ្នាំ២០១៥ សាលាក្តីខ្មែរក្រហម ត្រូវការថវិកា ៣៣,៨ លានដុល្លារ ដែលភាគីអន្តរជាតិ ចំនួន ២៧,១ លានដុល្លារ និង៦,៧ លានដុល្លារ សម្រាប់ភាគីជាតិ។ ភាគីជាតិ នៅខ្វះថវិកា ២,៦ លានដុល្លារទៀត សម្រាប់ឆ្នាំ២០១៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
គម្រោងថវិកាកែសម្រួលថ្មី សម្រាប់ឆ្នាំ២០១៤ និងឆ្នាំ២០១៥ សរុបចំនួន ៦១,៦ លានដុល្លារ ត្រូវបានសាលាក្តីខ្មែរក្រហម ផ្សព្វផ្សាយ កាលពីថ្ងៃ២១មេសា។ នោះគឺការចំណាយសម្រាប់ឆ្នាំ២០១៥ ត្រូវបានកែសម្រួលដោយបង្កើនចំនួនចំណាយទាំងភាគីជាតិ និងអន្តរជាតិ ចំណែកការចំណាយក្នុងឆ្នាំ២០១៤ គឺបន្ថយចុះវិញ បើធៀបនឹងគម្រោង កាលពីពេលមុន។
តាមសេចក្តីប្រកាស គម្រោងថវិកាកែសម្រួល សម្រាប់ឆ្នាំ២០១៥ នេះ សរុបមានចំនួន ៣៣,៨ លានដុល្លារ ដែលក្នុងនោះ ២៧,១ លានដុល្លារ សម្រាប់ភាគីអន្តរជាតិ និង៦,៧ លានដុល្លារ សម្រាប់ភាគីជាតិ។ ក្នុងសេចក្តីប្រកាស លោក ក្រាញ់ តូនី ប្រធានការិយាល័យរដ្ឋបាលស្តីទី និងលោក ឃ្នុត រ៉ូហ្សិនហក អនុប្រធានការិយាល័យរដ្ឋបាល នៃអ.វ.ត.ក បានអំពាវនាវដល់សហគមន៍ម្ចាស់ជំនួយទាំងអស់ ផ្តល់ជំនួយជាចាំបាច់ដល់អ.វ.ត.ក ដើម្បីធានាថា ដំណើរការនីតិវិធីតុលាការប្រព្រឹត្តទៅមុខដោយគ្មានការរអាក់រអួល។
ចំណែកលោក នេត្រ ភក្ត្រា អ្នកនាំពាក្យសាលាក្តីខ្មែរក្រហម បានលើកឡើងថា គម្រោងថវិកាចំណាយសម្រាប់ ឆ្នាំ២០១៥ គឺមានតែតួលេខទេ តែសាច់ប្រាក់ គឺខាងភាគីជាតិកម្ពុជា ទើបតែទទួលបានថវិកាជំនួយពីរដ្ឋាភិបាលកម្ពុជា ចំនួន ៤,១ លានដុល្លារ ក្នុងនោះ ២,៥ លានដុល្លារ សម្រាប់ប្រាក់ខែបុគ្គលិក សម្រាប់រយៈពេល ៦ ខែ និង ១,៦ លានដុល្លារទៀត សម្រាប់ចំណាយលើប្រតិបត្តិការទូទៅរបស់សាលាក្តី។ ដូច្នេះភាគីកម្ពុជា នៅខ្វះថវិកា ២,៦ លានដុល្លារ សម្រាប់ឆ្នាំ២០១៥។
ចាប់តាំងពីបង្កើត កាលពីឆ្នាំ២០០៦ រហូតដល់ឆ្នាំ២០១៤ សាលាក្តីចម្រុះកាត់ទោសអតីតមេខ្មែរក្រហម បង្កើតឡើងដោយអង្គការសហប្រជាជាតិ និងរាជរដ្ឋាភិបាលកម្ពុជា បានចំណាយសរុប ចំនួន ២០៤,៥ លានដុល្លារ ក្នុងនោះ ភាគីអន្តរជាតិ ចំនួន ១៥៤,៩ លានដុល្លារ និងភាគីជាតិចំណាយចំនួន ៤៩,៦ លានដុល្លារ។
រហូតដល់ពេលនេះ សាលាក្តីចម្រុះ ក្រៅពីបញ្ចប់សំណុំរឿង០០១ ដែលមានកាំងហ្កេកអ៊ាវ ហៅឌុច អតីតមេគុកទួលស្លែង សាលាក្តីចម្រុះ កំពុងដំណើរការកាត់ក្តីលើសំណុំរឿង០០២ វគ្គ ២ ដែលមានជនជាប់ចោទជាអតីតមេខ្មែរក្រហមចាស់ជរា នួនជា និងខៀវសំផន។ ចំណែកសំណុំរឿង០០៣ និង០០៤ ស្ថិតក្នុងដំណើរការស៊ើបអង្កេត ដែលធ្វើឡើងតែខាងភាគីចៅក្រមស៊ើបអង្កេតអន្តរជាតិប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ