អាចារ្យជាង៣.០០០នាក់ឆ្លងកាត់វគ្គបណ្តុះបណ្តាល
គិតចាប់ពីខែមិថុនា ឆ្នាំ២០១០ មកដល់ថ្ងៃទី១៥ខែឧសភានេះ មានអាចារ្យសរុបចំនួន ៣.២៥៥នាក់ បានឆ្លងកាត់វគ្គបណ្តុះបណ្តាល ស្តីពីតួនាទីនិងភារកិច្ចអាចារ្យក្នុងប្រពៃណីទំនៀមទម្លាប់ខ្មែរ។ ក្នុងវគ្គបណ្តុះបណ្តាលសរុបចំនួន៩វគ្គ មកនេះ មានមុខវិជ្ជាសំខាន់ៗ ចំនួន ២០ មុខវិជ្ជា ត្រូវបានលើកបង្ហាញ ក្នុងវគ្គបណ្តុះបណ្តាលនីមួយៗ ដើម្បីតម្រង់ទិសតួនាទីអាចារ្យតាមពិធីបុណ្យនានា ឲ្យមានការឯកភាពគ្នាលើទំនៀមទម្លាប់ប្រពៃណីខ្មែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
គ្រូឧទ្ទេសាចារ្យដែលមានបទពិសោធន៍ និងចំណេះដឹងពីក្រសួងធម្មការ និងសាសនា ក្រសួងវប្បធម៌ និងវិចិត្រសិល្បៈ និងក្រសួងព័ត៌មាន បានចូលរួមយ៉ាងសកម្មក្នុងការបង្ហាត់បង្រៀន ផ្ទេរចំណេះដឹង ដើម្បីបំពេញបន្ថែមនូវចំណេះដឹង និងចំណេះធ្វើដល់អាចារ្យ-អាចារិនី សរុបចំនួន ៣.២៥៥ នាក់។ អាចារ្យប្រុសស្រីទាំងនោះបានឆ្លងកាត់វគ្គបណ្តុះបណ្តាល ចំនួន ៩ វគ្គ គិតចាប់ពីខែមិថុនាឆ្នាំ២០១០។
អាចារ្យទាំងជាង ៣.០០០ នាក់បានជួបលោកនាយករដ្ឋមន្ត្រី ហ៊ុន សែន នៅព្រឹកថ្ងៃទី១៥ឧសភានេះ នៅសាលមហោស្រពកោះពេជ្រក្នុងទីក្រុងភ្នំពេញ។
តាមរបាយការណ៍ ការបណ្តុះបណ្តាលអាចារ្យធ្វើឡើងក្នុងគោលបំណងដើម្បីចែករំលែកនូវការយល់ដឹង បទពិសោធន៍ល្អៗ និងចក្ខុវិស័យ អំពីដំណើរឆ្ពោះទៅមុខនៃប្រពៃណី វប្បធម៌ និងអរិយធម៌របស់ខ្មែរ ពិសេសចែករំលែកចំណេះដឹងដើម្បីតម្រង់ទិសរបៀបរៀបចំពិធីបុណ្យផ្សេងៗ។
អាចារ្យបុណ្យ អាចារ្យដឹកនាំពិធីបូជាសព និងអាចារ្យដឹកនាំពិធីអាពាហ៍ពិពាហ៍ជាដើមត្រូវបានគេប៉ាន់ស្មានថា មានចំនួនជាង ២០.០០០ នាក់ នៅទូទាំងប្រទេសនៅក្នុងវត្តជាង៤.០០០ វត្ត។ កន្លងមក លោកនាយករដ្ឋមន្ត្រីបានប្រកាសពីវិបត្តិអាចារ្យដោយហេតុតែមិនមានការឯកភាពគ្នាក្នុងការរៀបចំពិធីបុណ្យផ្សេងៗពិសេសពិធីមង្គលការ។
ក៏ប៉ុន្តែក្នុងពិធីជួបជុំនៅព្រឹកមិញ លោកនាយករដ្ឋមន្ត្រី ហ៊ុន សែន បានថ្លែងអំពាវនាវជាថ្មីទៀត ឲ្យអាចារ្យទូទាំងប្រទេសត្រូវមានការឯកភាពគ្នា និងអនុវត្តតាមតួនាទីនិងភារកិច្ចរបស់អាចារ្យ ដូចដែលក្រសួងធម្មការ និងសាសនាបានរៀបចំឯកសារនិងវគ្គបណ្តុះបណ្តាលកន្លងមក។
កម្រងឯកសារស្ដីពីតួនាទីភារកិច្ចរបស់អាចារ្យក្នុងការរៀបចំពិធីបុណ្យផ្សេងៗ ក៏ត្រូវបានរៀបចំឡើងដោយមានចំណុចខ្លឹមសារសំខាន់ៗកំណត់ពីការរៀបចំពិធីសូត្រមន្តពិធីរៀបចំអាពាហ៍ពិពាហ៍ និងពិធីបុណ្យបូជាសពជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ