អាជ្ញាធរអប្សរា៖ កន្លែងសម្រាប់ជិះដំរីត្រូវបានរុះរើចេញពីតំបន់អង្គរជាបណ្តើរៗ
ទីតាំងសម្រាប់ជិះសត្វដំរីនៅក្នុងតំបន់អង្គរ ត្រូវបានរុះរើជាបណ្តើរៗហើយ បន្ទាប់ពីមានការប្រកាសហាមមិនឲ្យមានការបំរើសេវាកម្មជិះដំរីនៅក្នុងតំបន់អង្គរ នៅដើមឆ្នាំ២០២០ខាងមុខនេះ។ នេះបើតាមការបញ្ជាក់របស់អ្នកនាំពាក្យអាជ្ញាធរអប្សរា។ ការបញ្ឈប់សេវាកម្មជិះដំរីនេះ ធ្វើឡើងបន្ទាប់ពីមានការដាក់ញ្ញតិ្តពីក្រុមអ្នកស្រឡញ់សត្វ កាលពីដើមខែមិថុនាកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
អ្នកនាំពាក្យអាជ្ញាធរជាតិអប្សរា លោក ឡុង កុសល បានថ្លែងប្រាប់វិទ្យុបារាំងអន្តរជាតិនៅថ្ងៃទី៣០ ខែមិថុនាថា អាជ្ញាធរអប្សរាបានតាំងចិត្តមុតមាំណាស់ ក្នុងការបញ្ឈប់សេវាកម្មដឹកជញ្ជូនដោយសត្វដំរីនៅក្នុងតំបន់អង្គរ ហើយម្យ៉ាងចង់ឲ្យសត្វដំរីអាចរស់នៅតាមបែបធម្មជាតិរបស់វា។ ហេតុដូច្នេះហើយទើបទាំងអាជ្ញាធរ និងក្រុមហ៊ុន បានឯកភាពគ្នាក្នុងការបញ្ឈប់ការផ្តល់ជូនសេវាកម្មជិះដំរីក្នុងតំបន់អង្គរ។
បើតាមលោក ឡុង កុសល គម្រោងបញ្ឈប់សេវាកម្មជិះដំរីនេះ បានដើរមួយជំហានធំហើយ ជាក់ស្តែងរោងដំរីនៅក្នុងរមណីយដ្ឋានអង្គរត្រូវបានរុះរើជិតអស់ហើយ ដើម្បីបញ្ឈប់សេវាកម្មនេះ នៅដើមឆ្នាំ២០២០ខាងមុខ។ លោកអះអាងថាដំរីនៅក្នុងតំបន់រមណីយដ្ឋានអង្គរមានចំនួន១៤ក្បាល ប៉ុន្តែមិនមែនដំរីទាំងអស់ត្រូវបានប្រើសម្រាប់ដឹកភ្ញៀវទេសចរទេ។
កាលពីដើមខែមិថុនាកន្លងទៅ ក្រុមអ្នកស្រឡាញ់សត្វបានធ្វើញ្ញតិ្តមួយ ដែលមានអ្នកគាំទ្រប្រមាណ១៨ម៉ឺននាក់ ដើម្បីដាក់ទៅអាជ្ញាធរអប្សរា ទាមទារឲ្យមានការបញ្ឈប់នូវសកម្មភាពជិះដំរីនៅក្នុងតំបន់អង្គរ។ ពួកគេបានចាត់ទុកសកម្មភាពជិះដំរី គឺជាសកម្មភាពព្រៃផ្សៃមួយ ដែលអាចធ្វើឲ្យប៉ះពាល់ដល់វិស័យទេសចរណ៍នៅក្នុងតំបន់អច្ឆរិយៈនេះទៀតផង។
ជាការឆ្លើយតប គណៈកម្មាធិការដំរីអង្គរ បានប្រកាសថា នៅដើម ឆ្នាំ២០២០ សមាគមនេះនឹងបញ្ចប់ការប្រើប្រាស់ដំរី ដើម្បីដឹកភ្ញៀវទេសចរ ប៉ុន្តែភ្ញៀវទេសចរនៅតែអាចមើលសត្វដំរី និងថតរូបពួកគេនៅក្នុងមណ្ឌលអភិរក្ស និងមជ្ឈមណ្ឌលបង្កាត់ពូជបាន។ នេះជាការបញ្ជាក់របស់ លោក អ៊ាន គីរី ប្រធានគណៈកម្មាធិការដំរីអង្គរ។
នៅក្នុងប្រទេសកម្ពុជាគេប៉ាន់ប្រមាណថា មានសត្វដំរីសរុបចំនួនជាង៣០០ក្បាល ក្នុងនោះដំរីស្រុកមានចំនួនតែ៧២ក្បាលប៉ុណ្ណោះ ខណៈដំរីព្រៃនៅសល់ប្រហែល២៥០ក្បាល។ នេះបើតាម សមាគមមូលនិធិអភិរក្សដំរីខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ