លោកប្រមុខការទូតអាមេរិក ជួបជាមួយសមភាគីរុស្ស៊ី នៅម៉ូស្គូ ជុំវិញបញ្ហាស៊ីរី
តាមការប្រកាសរបស់វិមានក្រេមឡាំង លោកប្រធានាធិបតីពូទីន ថ្ងៃអង្គារទី ១៥ធ្នូ ទទួលជួប លោក John Kerry និង លោក Serguei Lavrov គឺក្រោយពីប្រមុខការទូត អាមេរិក និង រុស្ស៊ី បានធ្វើកិច្ចចរចានឹងគ្នាសិន ជុំវិញលទ្ធភាពបង្កើតឡើងជារដ្ឋាភិបាលអន្តរកាល នៅស៊ីរី មុននឹង អាចបង្កើតកិច្ចប្រជុំមួយទៀត ដែលគ្រោងប្រព្រឹត្តទៅ ថ្ងៃ១៨ធ្នូខាងមុខ នៅក្រុង ញូវយ៉ក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ទីក្រុងវ៉ាស៊ីនតោន សង្ឃឹមលើវិមានក្រេមឡាំង ដើម្បីអន្ទងសម្ព័ន្ធមិត្តប្រពៃណីរបស់ខ្លួន គឺលោកប្រធានាធិបតីស៊ីរី បាស្ហារ អាល់ អាសាដ ឲ្យចូលតុចរចា ជាមួយ ភាគីប្រឆាំងស៊ីរី ដើម្បី ខ័ណ្ឌបញ្ចប់ សង្គ្រាមស៊ីវិល ដែលបានបំផ្លិចបំផ្លាញប្រទេសស៊ីរី តាំងពីឆ្នាំ២០១១មក ទាំងផ្តាច់ ជីវិតអ្នកស្រុក អស់២សែន៥ម៉ឺននាក់ និង បង្កឲ្យមានមនុស្សផ្លាស់ទី រាប់លាននាក់ទៅហើយ។
ក្រុងវ៉ាស៊ីនតោន និង ម៉ូស្គូ ត្រូវសម្រេចឲ្យបានជាក់លាក់ អំពីការចាត់ចែង ជាកិច្ចប្រជុំអន្តរជាតិ ដែលគួរតែប្រព្រឹត្តទៅមែន នៅថ្ងៃ១៨ធ្នូ ក្នុងក្រុងញូវយ៉ក ប៉ុន្តែ នៅមិនទាន់បញ្ជាក់ជាផ្លូវការ នៅឡើយ រវាងម្ខាងគឺ បណ្តា ប្រទេសដែល គាំទ្រភាគីប្រឆាំង នៅស៊ីរី និងម្ខាងទៀត គឺ បណ្តាប្រទេសដែលគាំទ្រ របបលោក អាសាដ។
“លោកប្រមុខការទូតអាមេរិក ប្រញាប់ប្រញាល់ ពិភាក្សាជាមួយថ្នាក់ដឹកនាំរុស្ស៊ី អំពី គម្រោង បើកធ្វើកិច្ចប្រជុំនោះ នៃ ក្រុមអន្តរជាតិខាងគាំទ្រស៊ីរី “ សេចក្តីនេះ ចង្អុលឲ្យឃើញ ដោយអ្នកនាំ ពាក្យផ្លូវការ នៃក្រសួងកាបរទេសអាមេរិក លោក John Kirby។
មុននឹងមកដល់រដ្ឋធានីរុស្ស៊ីយប់មិញ លោកប្រមុខការទូតអាមេរិក John Kerry បាន ចូលរួម ម្សិលមិញ ក្នុងកិច្ចប្រជុំ នៅក្រុងប៉ារីស នៃ១០ប្រទេសអារ៉ាប់ និងបស្ចិមលោក ដែលប្រមុខការទូត របស់គេ ត្រូវបានទទួលជួប ដោយលោករដ្ឋមន្ត្រីការបរទេសបារាំង Laurent Fabius។ លោក Kerry បានពិភាក្សា នៅទីនោះ ជាមួយសមភាគី Qatar និង Jordanie។ ពិតជា Jordanie ដែល ទទួលបន្ទុក តាក់តែងឡើង ជាបញ្ជីនៃពពួកក្រុមភេរវជន ហាមប្រាម មិនឲ្យ ចូលរួមក្នុងអភិក្រមនៃកិច្ចចរចា ពាក់ព័ន្ធនឹងអនាគតស៊ីរី។
ចំណែកអ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ ដោយនិយាយពី កិច្ចចរចាថ្ងៃនេះ រវាងលោក John Kerry និង លោក Serguei Lavrov លើកឡើងជាអាទិ៍ ៖ ប្រមុខការទូតទាំងពីរ បានបញ្ជាក់ទៅហើយថា សម្រាប់កោះប្រជុំឡើងជាកិច្ចប្រជុំថ្មីស្តីអំពីដំណោះស្រាយវិបត្តិ នៅស៊ីរី គឺចាំបាច់ ត្រូវសម្របយោបល់គ្នាសិន ទៅលើបញ្ជីឈ្មោះ តើនរណាដែលត្រូវចាត់ទុក ជា “ ភាគី ប្រឆាំង” នឹងលោកប្រធានាធិបតី អាសាដ និង តើនរណា ដែលត្រូវរាប់បញ្ចូល ទៅក្នុង “ ក្រុម ភេរវជន”មែនពិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ