Cafe Society ភាពយន្តបែបស្នេហា អ្នកបើកកម្មវិធីមហោស្រពភាពយន្តលើកទី៦៩
ហូលីវ៉ូតសម័យឆ្នាំ១៩៣០ ស្នេហាខកខាន សមិទ្ធិករជាតិអាមេរិកដ៏ល្បីល្បាញ លោក វ៉ូឌី អាឡែន Woody Allen អាយុ៨០ឆ្នាំ បាននាំអារម្មណ៍ទស្សនិកជនឱ្យត្រលប់ទៅរកអនុស្សាចាស់ តាមរយៈភាពយន្តបែបរ៉ូម៉ង់ទិក “Сafe Society”។ ជាស្នាដៃចុងក្រោយរបស់សមិទ្ធិករ វ៉ូតឌី អាឡែន Cafe Society ត្រូវបានជ្រើសរើសយកមកចាក់បញ្ចាំងជាកិច្ចបើកមហោស្រពកានលើកទី ៦៩ និងក៏ត្រូវផ្តើមចាក់បញ្ចាំងនៅតាមរោង ក្នុងប្រទេសបារាំងចាប់ពីថ្ងៃពុធនេះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ដោយសារវ័យចំណាស់ មិនអាចដើរតួខ្លួនឯងក្នុងសាច់រឿងក៏ដោយ តែសមិទ្ធិករដ៏មានបទពិសោធន៍រូបនេះ បានប្រើសំឡេងផ្ទាល់ខ្លួន ធ្វើអត្ថាធិប្បាយ និទានអំពីរឿងថ្មីរបស់លោក រឿងរបស់យុវជនជ្វីហ្វ Bobby Dorfman អ្នកញូវយ៉ក ដែលស្រមៃចង់ទៅផ្សងព្រេងនៅហូលីវ៉ូត។ ជារឿងពិត ក្នុងទសវត្សរ៍នោះ អ្នកមាន មានឥទ្ធិពលខ្លាំងលើវិស័យសិល្បៈ លើមូដ ហើយគ្រប់គ្នាស្រមៃចង់ផ្សងព្រេងនៅទីនោះ។
គ្មានអ្វីចម្លែក ក្នុងគ្រួសារអ្នកជួញដូរជាតិជ្វីហ្វដ៏សាមញ្ញមួយ ដែលម៉ែឪឈ្លោះគ្នារាល់ថ្ងៃព្រោះប្រចាំគ្នាធ្វើការរកស៊ី។ មានកូនបីនាក់ កូនស្រីរៀបការជាមួយបញ្ញាវន្តកុម្មុយនិស្ត កូនប្រុសពៅ Bobby ស្រមៃចង់ចាកចេញពីញូវយ៉ក ទៅឃើញហូលីវ៉ូត។ ទីដែលឪពុកមា ឈ្មោះ Phil រកស៊ីមានបាន មានឈ្មោះបោះសំឡេង មានក្រុមហ៊ុនគ្រប់គ្រងតារាល្បីៗ។ តែBobby មិនបានទទួលជោគជ័យដូចមាឯណា ! នេះក៏ដោយសារស្នេហា ! Bobbyលង់ខ្លួនស្រលាញ់ស្ត្រីម្នាក់ ដោយមិនដឹងថា Vonnie ជាកំណាន់ចិត្តរបស់ឪពុកមាហ្វីលឡើយ។
នៅពេលហ្វីលនិងវរនី ត្រូវរ៉ូវគ្នាវិញ និងរៀបការ បុបប៊ីបានត្រលប់មកញូវយ៉កវិញ និងដោយមានជំនួយពីបងប្រុស បានបើកហាងរង្គសាលពេលរាត្រី ដែលក្រោយមកបានក្លាយទីកំសានដ៏ពេញនិយម។ បុបប៊ី ក្លាយជាថៅកែមានបាន មានប្រពន្ធ មានឈ្មោះដូចសង្សារចាស់ វីរ៉ូនីកា តែបុបប៊ីហៅតែវរនី។
នៅពេលមាហ្វីលនាំប្រពន្ធក្មេងមកលេងញូវយ៉ក មកលេងកាហ្វេសុសាយធី បុបបានជួបវរនី ជាថ្មី អនុស្សាវរីយ៍និងស្នាមស្នេហ៍បានរស់ឡើងវិញ ! ជាស្នេហ៍ដែលមិនអាចទៅរួច តែសមិទ្ធិករដ៏ប៉ិនប្រសព្វម្នាក់នេះ ចេះធ្វើបង្ហាញឱ្យឃើញថាតួប្រុសគិតដល់ស្នេហ៍គ្រាដំបូងជារៀងរាល់ថ្ងៃក្នុងជីវិត និងដោយប្រាកដក្នុងចិត្តថាខាងស្រីក៏គិតមកខ្លួនវិញដែរ។ បច្ចេកទេសប្រើបង្វិលកាមេរ៉ា តែបន្តិច តែពិតជាបង្កប់អត្ថន័យយ៉ាងជ្រាលជ្រៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ