GOOGLE បង្កើតកម្មវិធីវ័យឆ្លាតអាចបិទខ្ទប់សាររើសអើង
ក្រុមហ៊ុនអ៊ីនធ័រនែតអាមេរិកដ៏ល្បីល្បាញ Google បានប្រកាស នៅថ្ងៃព្រហស្បតិ៍ម្សិលមិញ បង្កើតកម្មវិធីថ្មី "Perspective" ដែលជាកម្មវិធីដ៏វ័យឆ្លាត អាចជួយប្រព័ន្ធឃោសនាព័ត៌មានឱ្យបិទខ្ទប់ជាស្វ័យប្រវត្តិតែម្តង ការធ្វើអត្ថាធិប្បាយ និងសរសេរសារដែលមានស្អប់ខ្ពើមគ្នា។ កម្មវិធីថ្មីនេះ អាចចម្រោះសារស្អប់ខ្ពើម និងចាកប្រធានបានលឿនជាមនុស្សទៅទៀត។
ចុះផ្សាយនៅថ្ងៃ៖
ស្តាប់ - ០១:៥៩
កម្មវិធីថ្មីនេះ នឹងផ្តល់ឱ្យប្រើដោយឥតគិតថ្លៃ សម្រាប់ឱ្យក្រុមអ្នកបោះផ្សាយយកទៅប្រើប្រាស់ជាកម្មវិធីវាស់វែងកំរិតបំពុលរបស់សារឆ្លើយឆ្លងនីមួយៗក្នុងForum ផង និងកំណត់កំរិតអនុគ្រោះនៃភាពស្អប់ខ្ពើមគ្នាបង្កប់ក្នុងសារនោះផង។
កាសែតអាមេរិក New york Times កាសែតអង់គ្លេស The Guardian និងវិបសៃត៍ Wikipedia បានសាកល្បងកម្មវិធី Perspective រួចហើយ ដោយបង្រៀនម៉ាស៊ីនឱ្យស្គាល់ភាសា (Machine Learning) តាមរយៈសារដែលមានន័យរើសអើង-ស្អប់ខ្ពើម ឬសារដែលក្រុមការងារយល់ថាចាកប្រធាន។
គោលបំណងនៃការបង្កើតកម្មវិធីនេះ គឺដើម្បីជួយសម្រួលក្រុមការងារត្រួតពិនិត្យ ដែលហួសសមត្ថភាពមើលលែងសព្វ ព្រោះការបង្ហោះសារអត្ថាធិប្បាយរិះគន់ រើសអើង និងសារស្អប់ខ្ពើមគ្នា ធ្លាក់មកច្រើនជ្រុល រហូតពេលខ្លះកាសែតខ្លះត្រូវបង្ខំចិត្តបិទទំព័រប្រតិកម្មតែម្តង។
ប្រព័ន្ធឃោសនាព័ត៌មានចង់លើកទឹកចិត្តឱ្យអ្នកអានអ្នកស្តាប់បញ្ចេញមតិយោបល់លើខ្លឹមសារអត្ថបទបង្ហោះផ្សាយ ប៉ុន្តែការជម្រុះញែកសារប្រតិកម្ម ការបញ្ចេញទស្សនៈត្រឹមត្រូវ ក្នុងចំណោមសាររាប់លាន ពិតជាការខាតបង់ពេលវេលា ការងារ និងលុយកាក់ច្រើនណាស់។
តាមរយៈ “Perspective” កម្មវិធីដ៏វៀងវ័យ អាចជួយចម្រោះនិងបិទខ្ទប់សារដែលមានលក្ខណៈរើងអើងស្អប់ខ្ពើមគ្នាបានលឿនជាងមនុស្សទៅទៀត។ មានតែប្រព័ន្ធឃោសនាជាសមាជិក « Digital News Initiative » របស់Google និងប្រព័ន្ធសង្គម Twitter Facebook Youtubeទេ ដែលអាចប្រើកម្មវិធីនេះបាន។ Twitter ក៏ធ្លាប់បានប្រកាសមុនGoogleទៀត កាលពីដើមខែកុម្ភៈថានឹងផ្តើមវាយប្រហារសារស្អប់ខ្ពើម ដែលមិនចេញឈ្មោះ ដោយបញ្ចេញអត្តសញ្ញាណម្ចាស់សំណេរ និងហាមប្រាមមិនឱ្យបង្កើតគណនីថ្មីទៀត ឬបាំងមិនឱ្យអ្នកប្រើប្រាស់អ៊ីនធ័រនែតរកឃើញ។
កាលពីឆ្នាំ Google Facebook Twitter ទៅព្រមទាំងMicrosoft បានចុះហត្ថលេខា លើក្រមសីលធម៌ ជាមួយគណៈកម្មការអឺរ៉ុប ដោយសន្យាថានឹងត្រួតពិនិត្យក្នុងរយៈ២៤ម៉ោង យ៉ាងយូរនូវរាល់ខ្លឹមសារសារស្អប់ខ្ពើម និងលុបចោលតែម្តងបើចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ