សន្និសីទអាកាសធាតុបិទបញ្ចប់ សម្ព័ន្ធប្រឆាំងនឹងថាមពលធ្យូងថ្មត្រូវបានបង្កើត
នៅថ្ងៃសុក្រទី ១៧ វិច្ឆិកា ជាថ្ងៃបិទបញ្ចប់សន្និសីទអន្តរជាតិស្តីអំពីអាកាសធាតុលើកទី ២៣ នៅទីក្រុងប៊ន ប្រទេសអាល្លឺម៉ង់។ សន្និសីទCOP២៣ ដែលហាក់ដូចជាមានភាពស្មុគស្មាញខ្លាំង ដោយហេតុតែសហរដ្ឋអាមេរិកបានប្រកាសដកខ្លួនចេញទាំងស្រុង។ ប៉ុន្តែជាចម្លើយតបនឹងសកម្មភាពរបស់រដ្ឋបាលលោកត្រាំ ក្រុមប្រទេសជាង២០បានសម្រេចបង្កើតសម្ព័ន្ធដើរចេញពីថាមពលធ្យូងថ្ម ដោយមាន នាឱកាសសន្និសីទអន្តរជាតិនេះ។
ចុះផ្សាយនៅថ្ងៃ៖ កែប្រែថ្ងៃទី៖
ប្រតិភូជិត២០០ប្រទេស បានសម្រេចលើកសំណើជាច្រើន និងដ៏ចាំបាច់ សម្រាប់ដាក់ឱ្យដំណើរការកិច្ចព្រមព្រៀងអាកាសធាតុក្រុងប៉ារីស ចាប់ពីឆ្នាំ២០២០ទៅ ដើម្បីទប់ស្កាត់ការឡើងកម្តៅនៃភពផែនដី ដូចជា ៖ តើប្រទេសនីមួយត្រូវធ្វើដូចម្តេចដើម្បីប្រឆាំងនឹងការឡើងកម្តៅសីតុណ្ហភាព ? តើត្រូវធ្វើសកម្មភាពយ៉ាងដូចម្តេច ដើម្បីអាចទទួលជំនួយពីប្រទេសអ្នកមាន ។ល។ និង។ល។ ប៉ុន្តែគ្មានអ្វីត្រូវបានអារកាត់ទេ ព្រោះនេះជាភារៈរបស់ COP 24សន្និសីទលើកទី២៤ ឆ្នាំ២០១៨ នៅប្រទេសប៉ូឡូញ។
សន្និសីទក្រុងប៊ន ក៏ត្រូវព្រមព្រៀងគ្នា ចាប់បើកកិច្ចចរចារយៈពេល១ឆ្នាំ ស្តីពីការដំឡើងកិច្ចសន្យាជាតិកាត់បន្ថយឧស្ម័នផ្ទះកញ្ចក់ នៅឆ្នាំ២០២០។ ព្រោះបើតាមអង្គការសហប្រជាជាតិ កិច្ចសន្យារបស់រដ្ឋសមាជិកនាពេលបច្ចុប្បន្ននេះ អាចកាត់បន្ថយផ្សែងពុលបានប្រមាណមិនដល់មួយភាគបីផង។ ហើយជាចៃដន្យអាក្រក់ ឆ្នាំ២០១៧ គឺឆ្នាំដែលមានការបញ្ចេញឧស្ម័នកាបូនិក ដោយឧស្សាហកម្មថាមពលចំហេះ (ធ្យូងថ្ម ហ្កាស ប្រេងកាត) បានស្ទុះឡើងខ្លាំងជាថ្មីវិញ បន្ទាប់ពីនៅថេរអស់រយៈពេលបីឆ្នាំ។ ចិន ឥណ្ឌា ជាប្រទេសប្រើថាមពលធ្យូងថ្មខ្លាំងជាងគេ តែអាមេរិករបស់ត្រាំក៏ងាកមកបង្កើនការប្រើប្រាស់ថាមពលច្រើន គួរឱ្យកត់សម្គាល់។
ធ្យូងថ្ម ជាប្រភពទីមួយនៃការផ្តល់ថាមពលអគ្គិសនីឱ្យពិភពលោក (៤០%) ប៉ុន្តែថាមពលដែលប៉ះពាល់ខ្លាំងណាស់ដល់គុណភាពខ្យល់បរិយាកាស និងអាកាសធាតុនេះ ជាស្នូលនៃសង្គ្រាមប្រយុទ្ធប្រឆាំងនឹងការឡើងកម្តៅនៃភពផែនដី។ ហេតុដូច្នេះហើយ បានជាដើម្បីទប់ទល់នឹងអាមេរិកដែលមានចំណូលចិត្តខ្លាំងលើថាមពលធ្យូងថ្ម និងដកខ្លួនចេញពីកិច្ចព្រមព្រៀងអាកាសធាតុក្រុងប៉ារីស នាឱកាសសន្និសីទអន្តរជាតិលើកទី២៣នេះ ក្រុមប្រទេសជាង២០ ដូចជា អង់គ្លេស បារាំង អ៊ីតាលី បែលហ្ស៊ិក ព័រទុយហ្កាល់ សាល់វាដរ ព្រមទាំងរដ្ឋរបស់អាមេរិកនិងកាណាដាមួយចំនួន ដែលមានប្រើថាមពលធ្យូងថ្ម ដ៏តិចតួចបំផុត បានផ្តួចផ្តើមគំនិតបង្កើតសម្ព័ន្ធជាតិមួយដើរចេញពីថាមពលធ្យូងថ្ម។ សម្ព័ន្ធនេះ បានផ្តល់សន្ទុះថ្មីដល់ពិភពលោកក្នុងការប្រយុទ្ធប្រឆាំងនឹងធ្យូងថ្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ