រាជទាយាទអារ៉ាប៊ីសាអូឌីត យាងមកបំពេញទស្សនកិច្ចបីថ្ងៃនៅប៉ារីស
ក្នុងវ័យ៣២ឆ្នាំ ព្រះអង្គម្ចាស់ ម៉ូហាម៉េត បេន សាល់ម៉ាន ឬMBS ស្តេចស្នងរាជអារ៉ាប៊ីសាអូឌីត បានយាងមកដល់ក្រុងប៉ារីសហើយ នៅថ្ងៃអាទិត្យទី ៨មេសា ដោយមានរដ្ឋមន្ត្រីក្រសួងការបរទេសបារាំងទៅធ្វើគារកិច្ចទទួលដល់ព្រលានយន្តហោះ។ កម្មវត្ថុនៃដំណើរទស្សនកិច្ចផ្លូវការរយៈពេលបីថ្ងៃនេះ នៅប្រទេសបារាំង ផ្តោតទៅសំខាន់ទៅលើការរឹតចំណងទំនាក់ទំនងរវាងបារាំង-អារ៉ាប៊ីសាអូឌីតឡើងវិញ បន្ទាប់ពីបានឆ្លងកាត់ភាពតានតឹងដោយសារវិបត្តិក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
នៅក្នុងដំណើរទស្សនកិច្ចនៅប៉ារីសនេះ ទំនងជាគ្មានទេកិច្ចសន្យាពាណិជ្ជកម្មធំៗល្អៗនោះ។ ប្រធានាធិបតីបារាំងចង់បានជាបឋម ការស្តារកិច្ចសហប្រតិបត្តិការល្អជាមួយនឹងរាជាណាចក្រប្រេងកាត ដែលកំពុងធ្វើកំណែទម្រង់ សង្គម និងសេដ្ឋកិច្ច តាំងពីរាជបុត្រស្នងរាជឡើងកាន់អំណាចមក និងប្រើឱកាសនេះសម្រាប់រឹតចំណងទំនាក់ទំនងទ្វេភាគី ដែលស្មុគស្មាញនឹងគ្នាខ្លាំង នារយៈពេលចុងក្រោយនេះ ព្រោះតែអារ៉ាប៊ីសាអូឌីតបានលូកដៃច្រើនពេកក្នុងវិបត្តិដែលកំពុងអង្រន់តំបន់ដើមបូព៌ា។នេះបើតាមប្រភពស្និទ្ធនឹងវិមានប្រធានាធិបតី។
ប៉ុន្តែទស្សនកិច្ចរបស់រាជបុត្រសាល់ម៉ាន នឹងត្រូវផ្តោតខ្លាំងទៅវិស័យវប្បធម៌ ទេសចរណ៍ និងវិនិយោគនាពេលអនាគត ព្រមទាំងវិស័យបច្ចេកវិទ្យា ដោយព្រះអង្គម្ចាស់មានគម្រោងនឹងទៅទស្សនាមជ្ឈមណ្ឌលបច្ចេកវិទ្យាថ្មី Start-up ប៉ារីស ដ៏ធំជាងគេនៅលើពិភពលោក។ បើតាមប្រភពស្និទ្ធនឹងប្រតិភូអារ៉ាប៊ីសាអូឌីត ពិធីសារកិច្ចព្រមព្រៀងចំនួន១៨ ក្នុងវិស័យទេសចរណ៍ ថាមពល និងដឹកជញ្ជូន នឹងត្រូវចុះហត្ថលេខា នាឱកាសទស្សនកិច្ចនេះ។ គម្រោងកិច្ចសហប្រតិបត្តិការផ្នែកបុរាណវិទ្យា នឹងត្រូវប្រកាសឱ្យដឹងដែរ។
ចំណែកវិបត្តិនៅក្នុងតំបន់ ដូចជា សង្គ្រាមនៅស៊ីរី កិច្ចព្រមព្រៀងនុយក្លេអ៊ែរអ៊ីរ៉ង់ សង្គ្រាមនៅយ៉េមែន ដែលអារ៉ាប៊ីសាអូឌីតដឹកនាំធ្វើអន្តរាគមន៍យោធា ព្រមទាំងស្ថានភាពប្រទេសលីបង់ដែលបារាំងធ្លាប់បានធ្វើអន្តរាគមន៍នយោបាយដោយផ្ទាល់ នឹងត្រូវលើកមកពិភាក្សា ក្នុងជំនួបជាមួយនឹងប្រធានាធិបតីបារាំងលោកម៉ាក្រុង នារសៀលថ្ងៃអង្គារ។ ទាក់ទងនឹងប្រទេសយ៉េមែន និងឆ្លៀតពេលដែលរាជបុត្រស្នងរាជ សាល់ម៉ាន កំពុងបង្ហាញវត្តមាននៅក្រុងប៉ារីស ក្រុមអង្គការក្រៅរដ្ឋាភិបាល ចង់បញ្ចេញសំឡេងឱ្យខ្ទរលាន់ឡើង ដើម្បីពញ្ញាក់ស្មារតីបារាំងឱ្យឈប់នាំអាវុធទៅលក់ឱ្យអារ៉ាប៊ីសាអូឌីត។ ប្រតិបត្តិការយោធាអារ៉ាប៊ីសាអូឌីត នៅយ៉េមែន តែងរងការរិះគន់ជាញឹកញយថាបាន សម្លាប់ជនស៊ីវិល។
សូមបញ្ជាក់ថា ដំណើរទស្សនកិច្ចរបស់ព្រះរាជបុត្រស្នងរាជ MBS ស្ថិតក្នុងក្របខ័ណ្ឌនៃដំណើរចែចង់ក្រុមប្រទេសបស្ចឹមលោក ឱ្យបានឃើញអំពីរូបភាពថ្មីនៃអារ៉ាប៊ីសាអូឌីត ដែលល្បីឈ្មោះជាប្រទេសផ្តាច់ការ អភិរក្ស មកជាប្រទេសបើកចំហសេរីនិយមជាងមុន។ មុននឹងមកដល់បារាំង ព្រះអង្គម្ចាស់បានយាងទៅអង់គ្លេស និងចំណាយពេលបីសប្តាហ៍នៅអាមេរិក ជាមួយនឹងការចុះកិច្ចសន្យា និងកិច្ចព្រមព្រៀងវិនិយោគក្នុងស្រុកជាច្រើន។ អារ៉ាប៊ីសាអូឌីត ហាក់កំពុងត្រៀមខ្លួនពង្រឹងសេដ្ឋកិច្ចដោយមិនរំពឹងតែលើធនធានធម្មជាតិប្រេងកាត ក្រោមដីទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ