ធនាគារពិភពលោក៖ ការធ្វើពាណិជ្ជកម្មឆ្លងដែននៅកម្ពុជាមានភាពងាយស្រួលជាងមុន
សាជីវកម្មហិរញ្ញវត្ថុអន្តរជាតិ និងធនាគារពិភពលោក បានប្រកាសរួមគ្នាថា ប្រទេសកម្ពុជា បានចូលរួមជាមួយប្រទេសផ្សេងៗទៀត នៅតំបន់អាស៊ីខាងកើត និងប៉ាស៊ីហ្វិក ក្នុងការកែលំអបទបញ្ញត្តិនានា ដើម្បីជួយបង្កើនឱកាសសំរាប់អាជីវកម្មក្នុងស្រុក បានល្អប្រសើរ។ ក្នុងនោះ បរិយាកាសងាយស្រួលក្នុងការធ្វើពាណិជ្ជកម្មនៅកម្ពុជា សម្រាប់ឆ្នាំ២០១១ ឈរនៅលំដាប់ លេខរៀងទី ១៤៧ ក្នុងចំណោម ១៨៣ ប្រទេស ដែលត្រូវបានគេវាយតម្លៃ។
ចុះផ្សាយនៅថ្ងៃ៖
សេចក្តីរាយការណ៍របស់លី ម៉េងហួរពីទីក្រុងភ្នំពេញ
កម្ពុជា បានកែលំអដំណើរការ នៃការនាំចេញ-នាំចូល នៅឆ្នាំ២០០៩ និងឆ្នាំ២០១០។ ចំណែកនៅឆ្នាំ២០១១ ខាងមុខ ការធ្វើពាណិជ្ជកម្មនៅកម្ពុជា ក៏កាន់តែមានភាពងាយស្រួលជាងមុន។ នេះបើយោងតាមសេចក្តីប្រកាសព័ត៌មានរួម របស់សាជីវកម្មហិរញ្ញវត្ថុអន្តរជាតិ និងធនាគារពិភពលោក។
សេចក្តីប្រកាសរួម ចេញផ្សាយ នៅថ្ងៃទី៤ ខែវិច្ឆិកា ឆ្នាំ២០១០ បានលើកឡើងថា កម្ពុជាបានធ្វើការកែទម្រង់មួយ ដោយលុបបំបាត់អធិការកិច្ច មុនពេលបញ្ជូនទំនិញ ដែលនេះជួយកាត់បន្ថយពេលវេលា និងចំនួនឯកសារ ដែលចាំបាច់សំរាប់ការនាំចេញ-នាំចូលទំនិញឆ្លងដែនរបស់កម្ពុជា។
លោកស្រី Julia Brickell តំណាងសាជីវកម្មហិរញ្ញវត្ថុអន្តរជាតិ នៅកម្ពុជា មានប្រសាសន៍ថា “យើងទទួលបានការលើកទឹកចិត្ត ដោយបានឃើញនូវការកែលំអ ដែលធ្វើឲ្យការនាំចេញ និងនាំចូលរបស់កម្ពុជា មានភាពងាយស្រួលជាងមុន”។
លោកស្រី បានបន្ថែម “ការកែលំអនីតិវិធីនាំចេញ មានសារៈសំខាន់ណាស់ សំរាប់ឲ្យរដ្ឋាភិបាលកម្ពុជា សំរេចបាននូវគោលដៅរបស់ខ្លួន ក្នុងការនាំចេញផលិតផលកសិកម្ម ឲ្យបានច្រើនជាងមុន ជាពិសេសអង្ករ ដែលរដ្ឋាភិបាល មានបំណងនាំចេញឲ្យបានដល់មួយលានតោន នៅឆ្នាំ២០១៥។
ចំណែកលោក Stephane Guimbert សេដ្ឋវិទូជាន់ខ្ពស់ របស់ធនាគារពិភពលោក ប្រចាំ ប្រទេសកម្ពុជា មានប្រសាសន៍ថា “របាយការណ៍ ស្តីពី ការធ្វើអាជីវកម្មនេះ បង្ហាញឲ្យឃើញថា បរិយាកាសអាជីវកម្ម មានការរីកចំរើនច្រើន ក្នុងប្រទេសមួយចំនួន ក្នុងតំបន់អាស៊ី ដែលជាប្រទេសជិតខាងរបស់កម្ពុជា។ នេះជាប្រផ្នូលល្អមួយសំរាប់រក្សាការងើបឡើងវិញនៃសេដ្ឋកិច្ច”។
លោកសេដ្ឋវិទូ បានបន្តថា “នៅក្នុងបរិយាកាសប្រកួតប្រជែងខ្លាំងបែបនេះ វាមានសារៈសំខាន់ខ្លាំងណាស់ សំរាប់កម្ពុជា ក្នុងការបន្តកែលំអ ដើម្បីរក្សាបាននូវភាពទាក់ទាញ និងភាពប្រកួតប្រជែង។ កំណែទម្រង់មួយចំនួន ដែលបានបញ្ចូលទៅក្នុងឯកសារគោលនយោបាយស្តីពី ការជំរុញផលិតកម្មស្រូវ និងការនាំចេញអង្ករ របស់រដ្ឋាភិបាលនឹងនាំឲ្យមានការកាត់បន្ថយចំណាយ និងហានិភ័យក្នុងការធ្វើអាជីវកម្ម”។
របាយការណ៍ស្តីពីការធ្វើអាជីវកម្ម ២០១១ ក្រោមចំណងជើងថា ធ្វើឲ្យកាន់តែប្រសើរឡើង សំរាប់សហគ្រិន ជារបាយការណ៍ទី៨ នៃរបាយការណ៍ប្រចាំឆ្នាំ បោះពុម្ពដោយក្រុមធនាគារពិភពលោក។ របាយការណ៍បង្ហាញថា ប្រទេសសិង្ហបុរី ហុងកុង និងនូវែលហ្សេឡង់ បាននាំមុខគេនៅក្នុងពិភពលោក លើភាពងាយស្រួល សំរាប់ប្រតិបត្តិការរបស់អាជីវកម្មក្នុងស្រុក។
របាយការណ៍ ក៏បានបង្ហាញថា ភាពងាយស្រួលក្នុងការធ្វើអាជីវកម្ម របស់ប្រទេសកម្ពុជា នៅឆ្នាំ២០១០ ឈរនៅលំដាប់ទី ១៤៥ ក្នុងចំណោម ១៨៣ ប្រទេស។ ចំណែកនៅឆ្នាំ២០១១ កម្ពុជា ឈរនៅលំដាប់ទី១៤៧ លើប្រទេសឡាវ ដែលមានចំណាត់ថ្នាក់ទី១៧១។ ក៏ប៉ុន្តែប្រទេសថៃ ស្ថិតនៅលំដាប់ទី១៩ និងប្រទេសវៀតណាម ឈរនៅលំដាប់ទី៧៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ