កិច្ចប្រជុំជាច្រើនបានធ្វើឡើង នៅមុនកិច្ចប្រជុំកំពូលអាស៊ាន
ចាប់តាំងពីដើមសប្តាហ៍នេះ កិច្ចប្រជុំរវាងមេបញ្ជាការកងទ័ពអាស៊ាន អនុរដ្ឋមន្ត្រីហិរញ្ញវត្ថុ វេទិកាសង្គមស៊ីវិល និងប្រជាជនអាស៊ាន ព្រមទាំងវេទិកាយុវជនអាស៊ាន បានបើកកិច្ចប្រជុំដាច់ដោយឡែកពីគ្នា នៅទីក្រុងភ្នំពេញ។ កិច្ចប្រជុំទាំងនោះ បានធ្វើឡើង ដើម្បីពិភាក្សាលើឯកសារជាច្រើន មុននឹងដាក់ឲ្យរដ្ឋមន្ត្រី និងប្រមុខដឹកនាំអាស៊ាន ពិនិត្យ និងអនុម័ត ក្នុងកិច្ចប្រជុំកំពូលអាស៊ាន លើកទី២០ ចាប់ពីថ្ងៃទី៣០មីនា ដល់ថ្ងៃទី៤មេសា ដែលកម្ពុជា ធ្វើជាប្រធានអាស៊ាន នៅឆ្នាំ២០១២នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៤
សន្និសីទសង្គមស៊ីវិលអាស៊ាន និងវេទិកាប្រជាជនអាស៊ាន ស្ដីពី “យើងជាប្រជាជនអាស៊ាន រួមគ្នាសម្រាប់សហគមន៍អាស៊ាន” បានធ្វើឡើងរយៈពេលបីថ្ងៃ ដោយចាប់ពីថ្ងៃទី២៨មីនានេះ នៅសាលសន្និសីទចតុមុខ ក្នុងទីក្រុងភ្នំពេញ។
អង្គការសង្គមស៊ីវិល និងប្រជាជន មកពីប្រទេសសមាជិកអាស៊ានទាំង ១០ បានចូលរួមក្នុងវេទិការយៈពេល ៣ ថ្ងៃ ដែលបានបើកធ្វើនៅមុនកិច្ចប្រជុំកំពូលអាស៊ាន។
លោក សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងរដ្ឋាភិបាលកម្ពុជា ជាម្ចាស់ផ្ទះ បានលើកឡើងថា ភាពក្រីក្រ គម្លាតនៃការអភិវឌ្ឍន៍យ៉ាងធំ ការប្រែប្រួលអាកាសធាតុ និងគ្រោះធម្មជាតិ នៅតែជាបញ្ហាប្រឈមជាចម្បងយ៉ាងសំខាន់ ដែលអាស៊ាន ត្រូវដោះស្រាយ ដើម្បីសម្រេចបាននូវសង្គមមួយ ដែលមានសន្តិសុខស្បៀង សន្តិសុខថាមពល និងសន្តិសុខធនធានទឹក ក៏ដូចជា សិទ្ធិមនុស្ស ការការពារបរិស្ថាន និងអភិបាលកិច្ចល្អ ជាដើម។
តំណាងរដ្ឋាភិបាលបានអំពាវនាវឲ្យសង្គមស៊ីវិល និងប្រជាជន ក្នុងប្រទេសអាស៊ាន ទាំង ១០ ចូលរួមទាំងអស់គ្នា ដើម្បីដោះស្រាយបញ្ហាប្រឈម ព្រមទាំងចូលរួម ដើម្បីបង្កើតសហគមន៍អាស៊ានតែមួយ នៅឆ្នាំ២០១៥។
ដោយឡែកនៅព្រឹកថ្ងៃពុធនេះ នៅទីក្រុងភ្នំពេញ ក៏មានបើកកិច្ចប្រជុំរយៈពេល ២ ថ្ងៃ រវាងអនុរដ្ឋមន្ត្រីហិរញ្ញវត្ថុ និងទេសាភិបាលរងធនាគារកណ្ដាល មកពីបណ្តាប្រទេសអាស៊ាន បូក៣ គឺកូរ៉េ ចិន និងជប៉ុន។ កិច្ចប្រជុំពិភាក្សា នឹងព្រមព្រៀងគ្នាពីជំហររបស់អាស៊ាន ពាក់ព័ន្ធនឹងការពង្រឹង និងពង្រីកយន្តការ គំនិតផ្តួចផ្តើមទីផ្សារសញ្ញាប័ណ្ណអាស៊ី យន្តការ ពហុភាគីនីយកម្មគំនិតផ្តួចផ្តើមឈៀងម៉ៃ និងការធានារ៉ាប់រងលើគ្រោះមហន្តរាយ ជាដើម។
ជាការកត់សម្គាល់ កិច្ចប្រជុំអនុរដ្ឋមន្ត្រីហិរញ្ញវត្ថុ និងទេសាភិបាលរងធនាគារកណ្តាលអាស៊ាន បានបើកធ្វើនៅទីក្រុងភ្នំពេញ កាលពីថ្ងៃទី២៧ ខែមីនា ឆ្នាំ២០១២។ កិច្ចប្រជុំនោះ បានផ្តោតការពិភាក្សាអំពីកិច្ចសហប្រតិបត្តិការហិរញ្ញវត្ថុ នៅក្នុងក្របខ័ណ្ឌអាស៊ាន ជាពិសេសដើម្បីបន្តជំរុញសមាហរ័ណកម្មវិស័យហិរញ្ញវត្ថុ និងរួមចំណែកដល់ការបង្កើតសហគមន៍សេដ្ឋកិច្ចអាស៊ាន ក្នុងឆ្នាំ២០១៥។ លទ្ធផលនៃកិច្ចពិភាក្សានេះ នឹងត្រូវដាក់ជូនកិច្ចប្រជុំរដ្ឋមន្ត្រីហិរញ្ញវត្ថុអាស៊ាន ពិនិត្យ និងអនុម័ត នៅថ្ងៃទី៣០មីនា ឆ្នាំ២០១២។
ចាប់តាំងពីថ្ងៃច័ន្ទ ទី២៦មីនា ក្រុមមេបញ្ជាការកងទ័ព អាស៊ាន បានបើកកិច្ចប្រជុំជាច្រើន ក្នុងទីក្រុងភ្នំពេញ លើកឡើងពីការពង្រឹងសហប្រតិបត្តិការ ដើម្បីរក្សាសន្តិសុខក្នុងតំបន់ និងពិភពលោក។ កិច្ចប្រជុំកងទ័ពអាស៊ាន ដែលនឹងបញ្ចប់នៅថ្ងៃទី៣០មីនា ដើម្បីត្រៀមរៀបចំកិច្ចប្រជុំរដ្ឋមន្ត្រីការពារជាតិអាស៊ាន ដែលនឹងធ្វើឡើងនៅកម្ពុជា នាខែឧសភាខាងមុខ។
វេទិកាយុវជនអាស៊ាន ក្រោមប្រធានបទ “ការចូលរួមរបស់យុវជន ក្នុងការប្រែក្លាយអាស៊ាន ទៅជាសហគមន៍មួយ ដែលយកប្រជាពលរដ្ឋជាស្នូល” ក៏ត្រូវបានរៀបចំឡើង ចាប់ពីថ្ងៃទី២៦ ដល់ថ្ងៃទី២៨មីនា។ យុវជន ១០០ នាក់ មកពីប្រទេសអាស៊ានទាំង១០ បានជជែកពិភាក្សាពីកង្វល់ ដែលពាក់ព័ន្ធនឹងការអប់រំ បរិស្ថាន ការចូលរួមពេញលេញរបស់យុវជន និងចងក្រងអនុសាសន៍ ដាក់ជូនកិច្ចប្រជុំកំពូលអាស៊ាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ