FMI៖ វិបត្តិសេដ្ឋកិច្ចអាចផ្ទុះឡើងវិញដោយបំណុលរដ្ឋកើនឡើងខ្លាំង
មូលនិធិរូបិយវត្ថុអន្តរជាតិ( FMI ) បានព្រមានកាលពីថ្ងៃអង្គារម្សិលមិញថា វិបត្តិហិរញ្ញវត្ថុពិភពលោកអាចឈានចូលដល់វគ្គមួយថ្មី។ វគ្គថ្មីដែលគេសម្គាល់ឃើញមានប្រាក់បំណុលរបស់រដ្ឋកើនកាន់តែច្រើន ឡើងៗ។
ចុះផ្សាយនៅថ្ងៃ៖ កែប្រែថ្ងៃទី៖
ប្រាក់បំណុលរបស់រដ្ឋកើនកាន់តែច្រើនឡើងៗ នឹងធ្វើឲ្យឥណទានក្នុងវិស័យឯកជនកាន់តែរួញខើចទៅៗ ហើយនៅទីបំផុតនឹងធ្វើឲ្យសហគ្រាសឯកជនធំតូចមានការលំបាកក្នុងការ ស្វែងរកឥណទានសម្រាប់យកមកអភិវឌ្ឍសកម្មភាពពាណិជ្ជកម្មនិងសកម្មភាព ឧស្សាហកម្មរបស់ខ្លួនដែលជាកត្តាដ៏ចាំបាច់សម្រាប់ជួយអូសទាញឲ្យមាន កំណើនសេដ្ឋកិច្ច ហើយនិងជួយកាត់បន្ថយភាពឥតការងារធ្វើ។ ជួយកាត់បន្ថយភាពឥតការងារធ្វើ បានសេចក្តីថាជួយកាត់បន្ថយភាពក្រីក្រ។
ដូច្នេះឃើញថា ប្រាក់បំណុលរបស់រដ្ឋដែលកើនកាន់តែច្រើនឡើងៗគឺពិតជាគ្រោះថ្នាក់មួយ ដ៏ធំគំរាមដល់ការអភិវឌ្ឍន៍និងស្ថិរភាព ហើយវាក៏ធ្វើឲ្យវិបត្តិហិរញ្ញវត្ថុពិភពលោកឈានចូលវគ្គមួយថ្មី ទៀតដែរ។
នៅក្នុងវគ្គថ្មីនៃវិបត្តិហិរញ្ញវត្ថុពិភពលោកនេះ បើប្រសិនជារដ្ឋនៅតែបន្តខ្ចីប្រាក់កាន់តែច្រើនឡើងៗបែបនេះដើម្បី យកមកបំពេញតម្រូវការខ្វះខាតនៃឧនភាពថវិការបស់ខ្លួន នោះឥណទានដែលរក្សាបម្រុងទុកសម្រាប់អភិវឌ្ឍសេដ្ឋកិច្ចច្បាស់ជានឹង កាន់តែរួញខើចទៅៗជាពុំខាន។
តម្រូវការប្រាក់កម្ចីរបស់រដ្ឋដែល មានកាន់តែច្រើនឡើងៗ អាចនឹងបណ្តាលឲ្យឥណទានផ្នែកឯកជនស្គាល់ការខ្វះខាត ហើយនិងអាចធ្វើឲ្យអត្រាការប្រាក់កើនឡើងខ្ពស់ផងដែរ។ អត្រាការប្រាក់កើនឡើងខ្ពស់ គឺពិតជាឧបសគ្គខាឃាំងដល់ការអភិវឌ្ឍន៍នៃសកម្មភាពសេដ្ឋកិច្ចរបស់ សហគ្រាសខ្នាតតូចនិងមធ្យមដែលកំពុងតែត្រូវការឥណទាន ជាពិសេសក្នុងខណៈពេលដែលពិភពលោកកំពុងតែជួបនឹងវិបត្តិសេដ្ឋកិច្ចនិង វិបត្តិហិរញ្ញវត្ថុដ៏ធ្ងន់ធ្ងរ។
គួរកត់សម្គាល់ថា បើឧនភាពថវិការបស់សហរដ្ឋអាមេរិកកើនឡើង០,៥%នៃផលិតផលក្នុងដុល វាអាចបណ្តាលឲ្យសកម្មភាពសេដ្ឋកិច្ចពិភពលោកថយស្រុតចុះអស់០,២% ក្នុង១ឆ្នាំ។ ហើយក្រោយពីបានជួយស្រោចស្រង់ធនាគារឲ្យរួចចេញផុតពីការលិចលង់ មូលនិធិរូបិយវត្ថុអន្តរជាតិ( FMI )យល់ថា តុល្យភាពនៃហិរញ្ញវត្ថុសាធារណៈគឺជាអាទិភាពដ៏ចម្បងសម្រាប់រយៈកាល ប៉ុន្មានឆ្នាំខាងមុខនេះ។ ក៏ប៉ុន្តែ ទោះបីជាសុខភាពនៃប្រព័ន្ធហិរញ្ញវត្ថុពិភពលោកបានស្គាល់ការវិវត្តន៍ ល្អបន្តិចក្តី ក៏គេហាក់ដូចជាពុំទាន់រកលំនឹងភាពបាននៅឡើយ។
ហេតុ ដូច្នេះហើយ បានជាមូលនិធិរូបិយវត្ថុអន្តរជាតិ( FMI )បានអំពានាវឲ្យរដ្ឋាភិបាលនៃប្រទេសទាំងនោះចាត់វិធានការណ៍រៀបចំឲ្យ មានឡើងនូវផែនការមួយសម្រាប់ធ្វើឲ្យវិស័យហិរញ្ញវត្ថុសាធារណៈមាន លំនឹងភាពនិងតុល្យភាពឡើងវិញនារយៈកាលដ៏ខ្លីមធ្យមខាងមុខនេះ។
ហើយ រដ្ឋាភិបាលនៃប្រទេសទាំងនោះក៏ត្រូវផងទៀតគិតគូរពីការរៀបចំឲ្យមាន នូវ”ប្រព័ន្ធហិរញ្ញវត្ថុមួយត្រឹមត្រូវពោរពេញដោយថាមពលនិងការ ប្រកួតប្រជែង” ដែលជាមូលដ្ឋានមួយរឹងមាំចាំបាច់សម្រាប់ជួយដល់ឥណទានឯកជន ហើយដែលជាវិធីតែមួយគត់សម្រាប់ជួយជំរុញឲ្យមានកំណើនសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ