លោកកឹម សុខា និងមន្ត្រីបក្សប្រឆាំងមួយចំនួនទៀតចេញទៅបាងកកថ្ងៃនេះដើម្បីដង្ហែលោកសម រង្ស៊ី
លោក កឹម សុខា អនុប្រធានគណបក្សសង្គ្រោះជាតិ និងថ្នាក់ដឹកនាំរបស់គណបក្សប្រឆាំងមួយនេះមួយចំនួនទៀត នឹងធ្វើដំណើរទៅទីក្រុងបាងកកនៅថ្ងៃរសៀលថ្ងៃព្រហស្បតិ៍នេះ ដើម្បីអមដំណើរ លោក សម រង្ស៊ីប្រធានគណបក្ស មកកាន់ព្រលានយន្តហោះអន្តរជាតិភ្នំពេញនៅព្រឹកថ្ងៃសុក្រស្អែក។ គណបក្សសង្គ្រោះជាតិបានរៀបចំការទទួលស្វាគមន៍ប្រធានគណបក្សយ៉ាងហ្មត់ចត់ ដោយគេរំពឹងថា មានអ្នកគាំទ្រច្រើនម៉ឺននាក់ នៅរង់ចាំទទួលលោកសម រង្ស៊ី ដែលបាននិរទេសខ្លួនពីសាលដីកាតុលាការកម្ពុជាក្នុងសំណុំរឿងព្រំដែន ជាងជិត៤ឆ្នាំមកហើយនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៨
បើមិនមានការប្រែប្រួល នៅថ្ងៃស្អែកនេះ ក្រុមអ្នកគាំទ្រគណបក្សសង្គ្រោះជាតិនឹងបានឃើញវត្តមានលោកសម រង្ស៊ី ជាលើកដំបូងក្រោយពេលដែលលោកបានរស់នៅនិរទេសខ្លួនជាង៤ឆ្នាំប្រទេសបារាំងនោះ នឹងត្រូវអមដំណើរដោយលោក កឹម សុខា និងថ្នាក់ដឹកនាំគណបក្សសង្គ្រោះជាតិមួយចំនួនតូចទៀត ចុះពីលើយន្តហោះនៅម៉ោង៩ ព្រឹក នៅព្រលានយន្តហោះអន្តរជាតិភ្នំពេញ។
ក្រុមអ្នកគាំទ្រក៏អាចនឹងស្រម៉ៃមើលឃើញរូបភាពលោកប្រធាន សម រង្ស៊ី និងលោក កឹម សុខា អនុប្រធានគណបក្សសង្គ្រោះជាតិចុះពីលើយន្តហោះ ដូចរូបភាព ចាប់ដៃរួមគ្នាលើកឡើងលើរបស់ថ្នាក់ដឹកនាំទាំងពីរនៅផ្លាកសញ្ញាឃោសនារបស់គណបក្សសង្គ្រោះជាតិ ក្រោយពីធ្វើដំណើររួមគ្នានៅក្នុងយន្តតែមួយចេញពីទីក្រុងបាងកកមកនោះ។
លោកស្រី មួរ សុខហួរ ប្រធានការិយាល័យទំនាក់ទំនងកិច្ចការសាធារណៈ នៃគណបក្សសង្គ្រោះជាតិ បានប្រាប់វិទ្យុបារាំងអន្តរជាតិនៅព្រឹកថ្ងៃព្រហស្បតិ៍នេះថា លោក កឹម សុខា អនុប្រធានគណបក្សសង្គ្រោះជាតិនិងថា្នក់ដឹកនាំក្នុងជួរបក្សមួយចំនួនទៀតនឹងធ្វើដំណើរទៅកាន់ទីក្រុងបាងកក នៅរសៀលថ្ងៃនេះ ដើម្បីត្រៀមទទួល និងអមដំណើរការវិលត្រឡប់របស់លោក សម រង្ស៊ីមកកាន់ប្រទេសកម្ពុជាវិញ។
កម្មវិធីទាំងឡាយសម្រាប់ការវិលត្រឡប់របស់លោក សម រង្ស៊ីត្រូវបានត្រៀមរួចរាល់ ខណៈដែលអ្នកគាំទ្រដែលត្រៀមទទួលលោកប្រធានរូបនេះ ត្រូវបានជូនដំណឹងឲ្យរក្សាសណ្តាប់ធ្នាប់ឲ្យបានល្អ ហើយ ការរក្សាសន្តិសុខសុវត្ថិភាពសម្រាប់លោក សម រង្ស៊ី ក៏ត្រូវបានអាជ្ញាធរប្រកាសថា បានត្រៀមរួចរាល់ហើយផងដែរនោះ។ នេះបើតាមការអះអាងរបស់លោកស្រី មួរ សុខហួរ។
សេចក្តីជូនដំណឹង របស់គណបក្សសង្គ្រោះជាតិ ចុះថ្ងៃទី១៦ ខែកក្កដានេះឲ្យដឹងថា ដើម្បីសម្រួលកុំឲ្យមានការស្ទះចរាចរណ៍ នៅថ្ងៃលោក សម រង្ស៊ី ធ្វើមាតុភូមិនិវត្តន៍ គណបក្សសង្គ្រោះជាតិ ស្នើឲ្យអ្នកចូលរួមទាំងអស់ ធ្វើយ៉ាងណាឲ្យមានរបៀបរៀបរយ និងមានសណ្តាប់ធ្នាប់នៅថ្ងៃនោះ។ ក្នុងនោះស្នើឲ្យអ្នកធ្វើដំណើរកង់បី និងរថយន្តសូមរង់ចាំនៅទីលានប្រជាធិបតេយ្យជិតវត្តភ្នំ។
ចំណែកអ្នកថ្មើរជើង ឬអ្នកធ្វើដំណើរដោយម៉ូតូ មកជួបជុំគ្នានៅសួនច្បារស៊ិនជូរីផ្លាហ្សា និងនៅសួនច្បារ មុខព្រលានយន្តហោះអន្តរជាតិភ្នំពេញ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានឱ្យដឹងថា ក្រសួងមហាផ្ទៃបានប្រជុំសម្រេចដាក់ពង្រាយកម្លាំងការពារសុវត្ថិភាព ចំពោះការវិលត្រឡប់របស់លោក សម រង្ស៊ី រួចរាល់អស់ហើយ។
តាមគម្រោង មានមនុស្សប្រមាណ ៤ម៉ឺននាក់ នឹងចាំទទួលស្វាគមន៍ លោក សម រង្ស៊ី ប្រធានគណបក្សប្រឆាំង ដែលព្រះមហាក្សត្រទើបនឹងលើកលែងទោសថ្មីៗនេះ។
លោក សម រង្ស៊ី ដែលរស់នៅនិរទេសជាង៤ឆ្នាំ ដើម្បីគេចពីការផ្តន្ទាទោស១២ឆ្នាំ ត្រូវបានប្រទានការលើកលែងទោសដោយព្រះមហាក្សត្រ នរោត្តម សីហមុនី កាលពីថ្ងៃសុក្រសប្តាហ៍មុនដើម្បីត្រួសត្រាយផ្លូវអនុញ្ញាតឲ្យមេបក្សប្រឆាំងលេចធ្លោនៅកម្ពុជារូបនេះ អាចចូលរួមការបោះឆ្នោតដើម្បីប្រកួតប្រជែងជាមួយជាមួគណបក្សប្រជាជនកម្ពុជា ដែលបានគ្រប់គ្រងប្រទេសជាង៣០ឆ្នាំមកហើយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ