កូវីដ១៩៖ ករណីឆ្លងនៅទូទាំងពិភពលោកកើនឡើងដល់ជិត ១លាននាក់
ជំងឺរាតត្បាតដ៏កាចសាហាវ-កូវីដ១៩ កំពុងបន្តវាយលុកខ្លាំងក្លានៅគ្រប់ទ្វីប។ គិតត្រឹមថ្ងៃព្រហស្បតិ៍ ទី២ មេសានេះ ចំនួនអ្នកឆ្លងកូវីដ១៩ កើនឡើងដល់ជិត ១ លាននាក់ នៅទូទាំងសកលលោក។ ស្របពេលជាមួយគ្នានេះ មានទារកអាយុ ៦ សប្តាហ៍ម្នាក់បានស្លាប់នៅសហរដ្ឋអាមេរិក និងបានក្លាយជាជនរងគ្រោះវ័យក្មេងជាងគេបំផុតដែលស្លាប់ ដោយសារតែកូវីដ១៩។
ចុះផ្សាយនៅថ្ងៃ៖
ស្តាប់ - ០២:២០
ការឆ្លងរាលរីករាលនៃវីរុសកូវីដ១៩ នៅតែជាវិបត្តិដ៏សែនធ្ងន់ធ្ងរមួយ ដែលពិភពលោកនៅមិនទាន់អាចដោះស្រាយបាននោះទេ។ កូវីដ១៩ ផ្ទុះឡើងដំបូង នៅក្នុងទីក្រុងវូហាន ប្រទេសចិន កាលពីចុងឆ្នាំ ២០១៩ ហើយក្នុងរយៈពេលតែជាង ៣ ខែប៉ុណ្ណោះ ប្រទេសប្រមាណពាក់កណ្តាលនៃភពផែនដី បានសម្រេចបិទខ្ទប់ទីក្រុង ឬក៏ប្រទេសទាំងមូល ដើម្បីការពារកុំឲ្យវីរុសនេះ អាចឆ្លងរាលដាលខ្លាំង និងសម្លាប់មនុស្សកាន់តែច្រើននៅក្នុងប្រទេស។
ការបិទទីក្រុង បិទប្រទេស អាចរារាំងមិនឲ្យកូវីដ១៩ ឆ្លងរាលដាលខ្លាំងបាន។ ក៏ប៉ុន្តែ ទន្ទឹមគ្នានេះ ក្រុមអ្នកជំនាញ បានព្រមានថា វិធានការរឹតបន្តឹងទាំងនេះ អាចបង្កឲ្យមានបញ្ហាខ្វះខាតស្បៀងអាហារសកលបាន ពីព្រោះតែខ្សែសង្វាក់ផ្គត់ផ្គង់ លែងអាចដំណើរការបានត្រឹមត្រូវដូចធម្មតា ហើយមនុស្សម្នាវិញមានការភ័យស្លន់ស្លោ រត់សម្រុកទៅទិញទំនិញស្តុកទុក។
រហូតមកទល់នឹងពេលេនះ ចំនួនអ្នកស្លាប់ដោយសារជំងឺកូវីដ ១៩ បន្តកើនឡើងឥតឈប់ ហើយគិតត្រឹមថ្ងៃព្រហស្បតិ៍ ទី២មេសា នេះ មានមនុស្សជាង ៤ ម៉ឺន ៧ ពាន់នាក់ បានស្លាប់នៅទូទាំងពិភពលោក ខណៈអ្នកឆ្លងកើនឡើងដល់ជិត ១ លាននាក់។
សហរដ្ឋអាមេរិក មានករណីឆ្លងវីរុសកូវីដ១៩ ខ្ពស់ជាងប្រទេសណាៗទាំងអស់ ពោលគឺមានជាង២១ ម៉ឺន ៥ពាន់ករណី។ អត្រានេះ មានចំនួនស្ទើរតែមួយភាគបួននៃករណីឆ្លងទូទាំងសកលលោក។ ចំណែកចំនួនអ្នកស្លាប់វិញ ត្រូវគេរាយការណ៍ថា កើនឡើងដល់ជា ៥ ពាន់ ១ រយនាក់។ ក្នុងចំណោមអ្នកស្លាប់នៅសហរដ្ឋអាមេរិក មានទារកម្នាក់អាយុទើបតែបាន៦ សប្តាហ៍ប៉ុណ្ណោះ និងបានក្លាយជនរងគ្រោះវ័យក្មេងជាងគេបំផុតក្នុងលោកដែលស្លាប់ដោយសារកូវីដ១៩។
ករណីនេះ បញ្ជាក់ថា មេរោគឆ្លងកូរ៉ូណាថ្មី មិនត្រឹមតែគ្រោះថ្នាក់ខ្លាំង សម្រាប់មនុស្សវ័យចំណាស់ និងមនុស្សមានស្ថានភាពសុខភាពមិនល្អស្រាប់នោះទេ ក៏ប៉ុន្តែ វាក៏អាចប៉ះពាល់ និងបង្កជាគ្រោះថ្នាក់ខ្លាំង ដល់មនុស្សគ្រប់វ័យ ស្រទាប់វណ្ណៈទាំងអស់។
ទាក់ទងរឿងនេះ ស្របពេលលើកឡើងអំពី ស្ថានការណ៍នៅក្នុងប្រទេសដែលកាន់តែមានសភាពធ្ងន់ធ្ងរទៅៗ លោកប្រធានាធិបតី ដូណាល់ ត្រាំ ក៏បានអំពាវនាវផងដែរ ឲ្យប្រជាជនអាមេរិក ត្រៀមខ្លួនប្រឈមនឹងគ្រោះអាសន្នធំជាពិសេស នៅក្នុងរយៈពេលពីរទៅបីសប្តាហ៍ខាងមុខដោយសារវិបត្តិកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ