អាវុធនុយក្លេអ៊ែរកាន់តែទំនើប ខណៈការគ្រប់គ្រង កាន់តែលែងត្រូវបានគេយកចិត្តទុកដាក់
ជំងឺកូវីដ១៩ បានផ្តាច់ជីវិតមនុស្ស និងបង្កឲ្យមានវិបត្តិសេដ្ឋកិច្ចដ៏ធ្ងន់ធ្ងរ ទូទាំងពិភពលោក។ តែទន្ទឹមនឹងនេះ សង្រ្គាមនុយក្លេអ៊ែរ ដែលជាអាវុធប្រល័យលោកដ៏សាហាវបំផុតនោះ ក៏នៅតែគម្រាមពិភពលោកយើងដែរ។ យោងតាមរបាយការណ៍ប្រចាំឆ្នាំ២០២០ របស់វិទ្យាស្ថានស្រាវជ្រាវអន្តជាតិដើម្បីសន្តិភាព នៅទីក្រុងស្តុកខូម ប្រទេសស៊ុយអ៊ែដ បានឲ្យដឹងថា អាវុធនុយក្លេអ៊ែរបច្ចុប្បន្ននេះ មានភាពកាន់តែទំនើប ហើយជាងនេះទៅទៀត យន្តការនៃការគ្រប់គ្រង ដើម្បីបញ្ចៀសនូវការប្រកួតប្រជែងគ្នានោះ ហាក់លែងសូវមានប្រទេសមហាអំណាចណា យកចិត្តទុកដាក់ឡើយ។
ចុះផ្សាយនៅថ្ងៃ៖
ស្តាប់ - ០២:៤៣
របាយការណ៍របស់វិទ្យាស្ថានស្រាវជ្រាវអន្តរជាតិដើម្បីសន្តិភាព ហៅកាត់ថា SIPRI ចេញផ្សាយនៅថ្ងៃទី១៥មិថុនានេះបានលើកឡើងអំពីការព្រួយបារម្ភ ទាក់ទិននឹងការប្រណាំងប្រជែងគ្នា ផ្នែកអាវុធនុយក្លេអ៊ែរ របស់ប្រទេសមហាអំណាច។ លោក Shannon Kile នាយកកម្មវិធីសិក្សាស្តីពីការគ្រប់គ្រងអាវុធនុយក្លេអ៊ែរ នៃវិទ្យាស្ថាន SIPRI បានថ្លែងថា ការដែលអាេមរិក និងរុស្ស៊ី លែងនិយាយគ្នា ស្តីពីការគ្រប់គ្រងអាវុធនុយក្លេអ៊ែរ នាពេលបច្ចុប្បន្ននេះ គែវាជារឿងគ្រោះថ្នាក់ណាស់ ព្រោះថាវានឹងធ្វើឲ្យប្រទេសទាំង២ ប្រឹងបង្កើនសមត្ថភាពតែរៀងៗខ្លួន។
របាយការណ៍បានលើកឡើងថា អាវុធនុយក្លេអ៊ែរសរុបទាំងអស់ គឺមាន៩០% ជារបស់រុស្ស៊ី និងអាមេរិក។ មហាអំណាចទាំង២នេះ បានធ្វើកិច្ចព្រមព្រៀងមួួយឈ្មោះថា New Start នៅឆ្នាំ២០១០ ដើម្បីគ្រប់គ្រងកំណត់ចំនួនអាវុធនុយក្លេអ៊ែរ មិនឲ្យលើសពីអ្វីដែលធ្លាប់មាន កាលពីជំនាន់សង្រ្គាមត្រជាក់។ កិច្ចព្រមព្រៀងនេះ នឹងអស់សុពលភាពនៅដើមឆ្នាំ២០២១ឆាប់ៗនេះហើយ។ ក៏ប៉ុន្តែតាំងតែពីឆ្នាំ២០១៩មក ការចរចារវាងមហាអំណាចទាំង២ ដើម្បីធ្វើកិច្ចព្រមព្រៀងថ្មី បានជាប់គាំងមិនទៅមុខទាល់តែសោះ។
ទន្ទឹមគ្នានេះ មហាអំណាចនុយក្លេអ៊ែរផ្សេងទៀត មានចិន ឥណ្ឌា ជាដើម កំពុងតែបង្កើនសមត្ថភាពរបស់ខ្លួន យ៉ាងពេញទំហឹង។ របាយការណ៍បានរៀបរាប់ អំពីការពង្រឹងសមត្ថភាពរបស់កងទ័ពចិន ដែលបំពាក់ដោយអាវុធនុយក្លេអ៊ែរទាំង៣មុខ មានមីស៊ីលចេញពីដី បាញ់តាមយន្តហោះ និងមីស៊ីលសមុទ្រ។ មិនត្រឹមតែប៉ុណ្ណោះ ចិនបានបដិសេធ មិនព្រមចូលរួមក្នុងការចរចា ដើម្បីធ្វើកិច្ចព្រមព្រៀង គ្រប់គ្រងអាវុធនុយក្លេអ៊ែរ ទៅតាមការអញ្ជើញរបស់អាមេរិកទេ។
សូមបញ្ញាក់ថា យោងតាមការប៉ាន់ស្មានរបស់វិទ្យាស្ថាន SIPRI គិតត្រឹមដើមឆ្នាំ២០២០ អាវុធនុយក្លេអ៊ែរ ទាំងអស់មានចំនួនប្រមាណ ១៣៤០០គ្រឿង។ ចំនួននេះ គឺវានៅតិចខ្លាំងណាស់ បើប្រៀបធៀបទៅនឹងចំនួន ៧០០០០គ្រាប់ កាលពីទសវត្សឆ្នាំ១៩៨០។ ក៏ប៉ុន្តែអាវុធដែលផលិតថ្មី គឺមានភាពកាន់តែទំនើប។
១ឆ្នាំចុងក្រោយនេះ ចំនួនគ្រាប់នុយក្លេអ៊ែរ បានថយចុះប្រមាណជា៥០០គ្រាប់ ដែលការថយចុះនេះ គឺមកពីរុស្ស៊ី និងអាមេរិក បានបន្តកាត់បន្ថយ ដោយគោរពទៅតាមកិច្ចព្រមព្រៀង។ តែទោះជាយ៉ាងនេះក្តី អ្នកជំនាញនៅតែមានការព្រួយបារម្ភ ព្រោះប្រទេសទាំង២នេះ មានសមត្ថភាព និង កម្មវិធីស្រាវជ្រាវផលិត ដ៏ទំនើបឈានមុខ និងរហ័សបំផុត។ ឆ្នាំ២០២០នេះ គឺជាថ្នាំគម្រប់ខួបទី៥០នៃសន្ធិសញ្ញាមិនរីកសាយភាពអាវុធនុយក្លេអ៊ែរ។ កាលពីខែមីនាកន្លងទៅ មហាអំណាចធំៗ មានអាេមរិក រុស្ស៊ី បារាំង អង់គ្លេស និងចិន បានអះអាងថាខ្លួន នៅតែបន្តគោរព ផ្តល់តម្លៃដល់សន្ធិសញ្ញានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ