ក្រុមប្រទេសG20 សម្រេចពន្យារការសងបំណុលពីប្រទេសក្រីក្រ រហូតដល់ពាក់កណ្តាលឆ្នាំ២០២១
ក្រុមប្រទេសសេដ្ឋកិច្ចនាំមុខ G20 បានសម្រេចកាលពីថ្ងៃពុធទី១៤តុលា ថានឹងពន្យារការយកការប្រាក់ពីប្រទេសក្រីក្រ ចំនួន៦ខែទៀត ពោលគឺរហូតដល់ពាក់កណ្តាលឆ្នាំ២០២១ ដើម្បីជួយប្រទេសទាំងនោះ ខណៈដែលសេដ្ឋកិច្ចពិភពលោក កំពុងរងគ្រោះខ្លាំង ដោយវិបត្តិជំងឺកូវីដ១៩។ តែយ៉ាងណាក៏ដោយ អ្នកជំនាញនិងអង្គការក្រៅរដ្ឋាភិបាលខ្លះ បានលើកឡើងថា វិធានការនេះ នៅស្តួចស្តើងណាស់ មិនអាចជួយប្រទេសក្រីក្របានទេ ព្រោះដល់ពេលកំណត់ ពួកគេ នៅតែត្រូវសងការប្រាក់សរុប ដដែលជាដដែល។
ចុះផ្សាយនៅថ្ងៃ៖
ស្តាប់ - ០២:៣២
រដ្ឋមន្ត្រីក្រសួងហិរញ្ញវត្ថុ នៃប្រទេសសេដ្ឋកិច្ចនាំមុខG20 បានប្រជុំគ្នាពីចំងាយ កាលពីថ្ងៃទី១៤តុលា។ ក្រោយការប្រជុំនេះ រដ្ឋមន្ត្រីហិរញ្ញវត្ថុអារ៉ាប៊ីសាអូឌីត ដែលជាប្រធានវិលជុំ បានប្រកាសថា ក្រុមប្រទេសG20 បានយល់ស្របគ្នា ពន្យារការសងការប្រាក់ពីប្រទេសក្រីក្រ ចំនួន៦ខែបន្ថែមទៀត។ ដែលមានន័យថា គឺរហូតទាល់តែដល់ដាច់ខែមិថុនា ឆ្នាំ២០២១។ រដ្ឋមន្ត្រីហិរញ្ញវត្ថុអារ៉ាប៊ីសាអូឌីត បន្ថែមទៀតថា ការពន្យារនេះ អាចនឹងបន្តដល់ដាច់ឆ្នាំ២០២១ បើសិនជាមានការត្រូវរ៉ូវគ្នា នៅក្នុងពេលប្រជុំលើកក្រោយ ជាមួយមូលនិធិហិរញ្ញវត្ថុអន្តរជាតិ និងធនាគារពិភពលោក។
ក្រៅពីនេះទៀត រដ្ឋមន្ត្រីហិរញ្ញវត្ថុអារ៉ាប៊ីសាអូឌីត បានឲ្យដឹងថា ក្រុមប្រទេសសេដ្ឋកិច្ចនាំមុខទាំង២០ ក៏កំពុងតែពិចារណា អំពីការពិនិត្យសើររើឡើងវិញ នូវអត្រាការប្រាក់ ព្រមទាំងបំណុល របស់ប្រទេសក្រីក្របំផុតមួយចំនួន ដោយពិនិត្យលើករណីជាក់ស្តែងនីមួយៗ។ ក្រមខណ្ឌរួមនៃការ ពិនិត្យសើររើបំណុលឡើងវិញនេះ អាចនឹងត្រូវអនុម័តនៅក្នុងការប្រជុំនៅខែវិច្ឆិកាខាងមុខ។
សូមបញ្ជាក់ថា មូលនិធិហិរញ្ញវត្ថុអន្តរជាតិ និងធនាគារពិភពលោក បានអំពាវនាវឲ្យប្រទេសអ្នកមាន ដែលជាម្ចាស់បំណុល ព្រមទាំងក្រុមហ៊ុនឯកជនដែលជាម្ចាស់បំណុល ត្រូវតែរួមគ្នាជួយប្រទេសក្រីក្របំផុត ឲ្យឆ្លងផុតវិបត្តិសេដ្ឋកិច្ច បង្កឡើងដោយកូវីដ១៩។
ទោះជាយ៉ាងនេះក្តី ការជួយត្រឹមតែពន្យាការយកការប្រាក់ ពីប្រទេសក្រីក្រ គឺត្រូវបានអ្នកជំនាញខ្លះ លើកឡើងថា មិនគ្រប់គ្រាន់ទេ។ អង្គការក្រៅរដ្ឋាភិបាលមួយចំនួន បានអំពាវនាវ ថាត្រូវតែលុបបំណុលខ្លះចោលតែម្តង សម្រាប់ប្រទេសដែលក្រីក្របំផុត។ លោក Jaime Atienza តំណាងអង្គការ Oxfam បានលើកឡើងថា ការពន្យារពេលយកការប្រាក់ គឺមានន័យថាប្រទេសក្រីក្រនៅតែត្រូវសងការប្រាក់ដដែលទេ។ ជាងនេះទៀត រហូតមកទល់ពេលនេះ ក្នុងចំណោមប្រទេសក្រីក្របំផុតចំនួន៧៣ គឺមានតែ៤៦ទេ ដែលបានទទួលការយល់ព្រម ឲ្យពន្យារពេលសងបំណុល។
យោងតាមតួលេខរបស់ បណ្តាញEurodad គិតត្រឹមពេលនេះ វិធានការពន្យារការសងបំណុលនេះ មានត្រឹមតែ១,៦៦% នៃចំនួនបំណុលសរុប នៃប្រទេសក្រីក្រតែប៉ុណ្ណោះ ដោយសារតែវិធានការនេះ មិនត្រូវបានម្ចាស់បំណុលឯកជន ចូលរួមឡើយ។ ដោយឡែក តួលេខរបស់ធនាគារពិភពលោកបង្ហាញថា ក្នុងឆ្នាំ២០១៩ ប្រទេសក្រីក្របំផុតចំនួន៧៣ ដែលភាគច្រើននៅអាហ្វ្រិក គឺបំណុលពួកគេ បានឡើងដល់ទៅ៩,៥% ពោលគឺសរុបចំនួន ៧៤៤ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ