អង្គការយូណេស្កូ អំពាវនាវ ឲ្យរដ្ឋាភិបាលនានា ចាប់ផ្តើមបើកសាលារៀនឡើងវិញ
អង្គការយូណេស្កូ បានបើកវេទិកាកំពូលពិភពលោកនៃការអប់រំ កាលពីថ្ងៃព្រហស្បតិ៍ទី២២តុលា។ ដោយសារតែបញ្ហាកូវីដ១៩ វេទិកាកំពូលប្រចាំឆ្នាំនេះ ត្រូវបានធ្វើតាមប្រព័ន្ធវីស្យូខុនហ្វឺរិនស៍ ដោយមានវត្តមាន តារាភាពយន្តហូលីវូដ លោកស្រី Angelina Jolie ប្រមុខរដ្ឋាភិបាលចំនួនជាង១០ប្រទេស ព្រមទាំងរដ្ឋមន្ត្រីអប់រំ ចំនួនប្រមាណ៦០នាក់ផ្សេងទៀត។ ឆ្លៀតក្នុងឱកាសនេះ លោកស្រី អូដ្រេ អាហ៊្សូឡេ អគ្គលេខាធិការអង្គការយូណេស្កូ បានអំពាវនាវ ឲ្យរដ្ឋាភិបាលប្រទេសនានា ចាប់ផ្តើមបើកសាលារៀនឡើងវិញ ដើម្បីធានាឲ្យបាននូវសិទ្ធិទទួលបានការអប់រំរបស់កុមារ ព្រមទាំងទប់ស្កាត់ការបោះបង់ចោលការសិក្សារបស់សិស្សក្រីក្រ។
ចុះផ្សាយនៅថ្ងៃ៖
ស្តាប់ - ០២:៥០
វេទិកាកំពូលនៃការអប់រំ របស់អង្គការយូណេស្កូ ប្រចាំឆ្នាំ២០២០ បានផ្តើមឡើង ជាមួយនឹងការស្មឹងស្មាតមួយនាទី ដើម្បីរំលឹកវិញ្ញាណក្ខន្ធ លោក សាមុអ៊ែល ប៉ាទី គ្រូបង្រៀនអនុវិទ្យាល័យម្នាក់នៅជាយក្រុងប៉ារីស ដែលត្រូវបានជនអ៊ីស្លាមជ្រុលនិយមម្នាក់ សម្លាប់កាត់ក កាលពីថ្ងៃទី១៦តុលា។ អង្គវេទិកាកំពូល បានឆ្លៀតឱកាស ថ្លែងសារ រំលឹកអំពីគុណឧបការៈរបស់គ្រូបង្រៀន នៅទូទាំងពិភពលោក ដែលបានបូជាកម្លាំងកាយចិត្ត ក្នុងការបណ្តុះបណ្តាលកុមារ សិស្សានុសិស្ស ដែលជាធនធានមនុស្ស មិនអាចខ្វះបានរបស់ពិភពលោក។
ឆ្លៀតក្នុងឱកាសនោះដែរ លោកស្រី Audrey Azoulay អគ្គលេខាធិការអង្គការយូណេស្កូ បានអំពាវនាវ ឲ្យរដ្ឋាភិបាលប្រទេសទាំងអស់ ចាប់ផ្តើមបើកសាលារៀនឡើងវិញ។ លោកស្រីបានលើកឡើងថា ជាមួយនឹងវិធានការបិទខ្ទប់នានា ដោយសារបញ្ហាជំងឺឆ្លងកូវីដ១៩ មានកុមារជាច្រើនដែលប្រឈមនឹងការបាក់ទឹកចិត្ត បាត់បង់ទំលាប់សិក្សា ហើយឈានទៅបោះបង់ចោលការសិក្សាជារៀងរហូត។ យោងតាមតួលេខផ្លូវការ បច្ចុប្បន្ន កុមារប្រមាណជា៦០០លាននាក់នៅទូទៅពិភពលោក គឺសាលារៀនពួកគេនៅតែបិទទ្វារនៅឡើយ ដោយសារតែកូវីដ១៩។
អង្គការយូណេស្កូ សន្និដ្ឋានថា វិបត្តិជំងឺកូវីដ១៩ នឹងបន្ថែមឲ្យមានគម្លាតគ្នាកាន់តែខ្លាំងឡើង រវាងកម្រិតនៃការអប់រំដែលទទួលបាន រវាងសិស្សកូនអ្នកមាន និងសិស្សកូនអ្នកក្រីក្រ។ កុមារយ៉ាងហោច ២៤លាននាក់ អាចនឹងត្រូវបង្ខំចិត្តលែងចូលរៀនជារៀងរហូត ដោយសារតែជីវភាពលំបាក។ យ៉ាងណាមិញ លោកអគ្គលេខាធិការអង្គការសហប្រជាជាតិ បានលើកឡើងនៅក្នុងវេទិកាកំពូលនេះថា ពិភពលោកយើងអាចនឹងជួបវិបត្តិ ដោយសារក្មេងជំនាន់ក្រោយ ជាអ្នករងថ្មបាក់ ព្រោះថាការប្រឹងប្រែងកន្លងមក ក្នុងការអប់រំ ជាពិសេសសម្រាប់កុមារនិងសិស្សភេទស្រី កំពុងតែប្រឈមនឹងការដើរថយក្រោយ។
លោកស្រីអគ្គលេខាធិការអង្គការយូណេស្កូ បានលើកឡើងថា រដ្ឋាភិបាលទាំងអស់ ត្រូវតែប្រឹងប្រែង ពិចារណា រិះរកវិធីថ្មីៗ បើកសាលារៀនឡើងវិញ នឹងដោយមិនបោះបង់ការប្រុងប្រយ័ត្ន ក្នុងការការពារសុខភាពកុមារ។ លោកស្រីបានអំពាវនាវ ឲ្យរដ្ឋត្រូវតែចំណាយប្រាក់វិនិយោគ បន្ថែមក្នុងវិស័យអប់រំសិក្សាធិការ។
គួរបញ្ជាក់ថា នៅក្នុងឱកាសវេទិកាកំពូលនេះដែរ ប្រទេសសមាជិក បានចុះហត្ថលេខា លើសេចក្តីប្រកាសរួមមួយ ដោយសន្យាផ្តល់ប្រាក់ ចន្លោះពី៤ ទៅ ៦%នៃផលិតផលដុលក្នុងស្រុកសរុប ដើម្បីប្រមូលឲ្យបានគ្រប់២០០ពាន់លានដុល្លារ ទុកជួយប្រទេសក្រីក្របំផុត។ លោកស្រី Audrey Azoulay សង្កត់ធ្ងន់ថា ការចំណាយប្រាក់បោះទុនក្នុងវិស័យអប់រំ គឺជាការវិនិយោគ កសាងអនគត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ