ក្រុមប្រទេសផលិតប្រេង បើកកិច្ចប្រជុំដើម្បីសម្រេច ថាត្រូវបន្តការកាត់បន្ថយការផលិត ឬយ៉ាងណា
ក្រុមប្រទេសផលិតប្រេង សមាជិកអង្គការ OPEP ព្រមទាំងប្រទេសដៃគូផ្សេងទៀត បានបើកកិច្ចប្រជុំពិសេសមួយ ពីចំងាយ នៅរសៀលថ្ងៃទី៣វិច្ឆិកា។ កម្មវត្ថុនៃការប្រជុំនេះ គឺពិភាក្សាគ្នា ថាតើត្រូវបន្តការកាត់បន្ថយ ការផលិតប្រេងឆៅ ឬយ៉ាងណា ខណៈដែលតម្រូវការទីផ្សារនៅតែទាបខ្លាំង ដោយសារតែវិបត្តិកូវីដ១៩។
ចុះផ្សាយនៅថ្ងៃ៖
តើកិច្ចប្រជុំលើកនេះ ក្រុមប្រទេសមាជិក អង្គការ OPEP/OPEC និងប្រទេសសម្ព័ន្ធមិត្តដែលផលិតប្រេងឆៅ អាចនឹងស្វែងរកការត្រូវរូវគ្នា ឬទេ ទាក់ទិននឹងកម្រិតនៃការផលិត? ដោយសារតែកូវីដ១៩ តម្រូវការប្រេងឆៅនៅទូទាំងពិភពលោក បានធ្លាក់ចុះយ៉ាងគំហុក ហើយប្រការនេះ បានធ្វើឲ្យចំនួនស្តុកប្រេងឡើងចាល់ខ្លាំង។ ស្តុកឡើងចាល់ វាបានទាញតម្លៃប្រេងឲ្យធ្លាក់ចុះខ្លាំង។ កាលពីខែមេសា អត្រាតម្លៃប្រេងឆៅ នៅលើទីផ្សារអាមេរិក បានធ្លាក់ក្រោមសូន្យដុល្លារ ក្នុងមួយធុងបារីល។ បច្ចុប្បន្ននេះ អត្រាតម្លៃ នៅទីផ្សារប្រេងខ្មៅសមុទ្រខាងជើងគឺ ៤៨,១៥ដុល្លារ មួយធុងបារីល ហើយនៅទីផ្សារ WTI អាមេរិក គឺ៤៥,១២ដុល្លារក្នុងមួយធុងបារីល។
ដើម្បីទប់តម្លៃប្រេងកុំឲ្យធ្លាក់ចុះខ្លាំងពេក ក្រុមប្រទេសផលិតប្រេង បានសន្យារួមគ្នាកាត់បន្ថយការផលិត ឲ្យបានខ្ទង់៧,៧លានធុងបារីលក្នុងមួយថ្ងៃ។ ការសន្យានេះ នឹងត្រូវចប់សុពលភាព នៅចុងខែធ្នូនេះហើយ។ ក៏ប៉ុន្តែ ស្ថានការណ៍ឆ្លងរាលដាលកូវីដ១៩ នៅពុំទាន់ប្រសើរ ដែលធ្វើឲ្យតម្រូវការប្រេងឆៅ នៅតែទាបខ្លាំងដដែល។
យោងតាមកកិច្ចព្រមព្រៀងដែលសម្រេចកាលពីលើកមុន នៅថ្ងៃទី១មករា ឆ្នាំ២០២១ ប្រទេសផលិតប្រេង អាចបន្ថែមការផលិតរបស់ខ្លួនបន្តិចវិញ ក្នុងចំនួនសរុប ប្រមាណ២លានធុងបារីល ក្នុងមួយថ្ងៃ។ តែយ៉ាងណា កាលៈទេសៈពេលនេះ មានប្រទេសខ្លះ បានទាមទារ ឲ្យរៀបចំ ផែនការបន្ថែមការផលិត បន្តិចម្តងៗ ជាច្រើនដំណាក់ កុំឲ្យទីផ្សារចាល់ភ្លាម មួយថ្ងៃដល់ទៅ២លានធុង។ ប្រទេសផលិតប្រេងធំដូចជា អារ៉ាប៊ីសាអូឌីតជាដើម មានបំណង ចង់ឲ្យប្រទេសផលិតប្រេងទាំងអស់ បន្តការកាត់បន្ថយការផលិតតទៅទៀត ចន្លោះពី៣ ទៅ ៦ខែ។
តែយ៉ាងណា សម្រាប់ប្រទេសខ្លះ ការកាត់បន្ថយការផលិត គឺជាការលំបាកបំផុត សម្រាប់ថវិកាជាតិ។ អង្គការOPEP ក៏ត្រូវពិចារណាឡើងវិញផងដែរ ក្នុងករណីប្រទេសខ្លះ ដូចជាប្រទេសលីប៊ី ដែលសឹងតែពេញមួយឆ្នាំ២០២០ សង្វាក់ផលិតកម្មប្រេងឆៅ បានរាំងស្ទះទាំងស្រុងដោយសារតែសង្រ្គាមស៊ីវីល។ តែចាប់ពីខែតុលា ការផលិតប្រេងរបស់លីប៊ី បានកើនឡើងខ្លាំង ក្នុងកម្រិតប្រមាណ១លានធុងបារីល ក្នុងមួយថ្ងៃ។ ចំណុចមួយទៀតដែរ ទៅថ្ងៃខាងមុខ ក្នុងករណីរដ្ឋាភិបាលថ្មី របស់អាមេរិក បន្ធូរបន្ថយទណ្ឌកម្មខ្លះពីអ៊ីរ៉ង់ នោះមាននន័យថា អ៊ីរ៉ង់ នឹងអាចបញ្ចេញប្រេង ចូលក្នុងទីផ្សារវិញ រាប់សែនធុងបារីលក្នុងមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ