របាយការណ៍៖ ទំហំព្រៃធម្មជាតិ បានថយចុះជាង៤លានហិកតាបន្ថែមទៀត ក្នុងឆ្នាំ២០២០
យោងតាមរបាយការណ៍ប្រចាំឆ្នាំ របស់អង្គការ Global Forest Watch បានឲ្យដឹងថា ទំហំព្រៃធម្មជាតិ បានថយចុះបន្ថែមទៀត ចំនួនប្រមាណ ៤លាន២សែនហិកតា ដោយសារតែការកាប់បំផ្លាញ ដុតរានរបស់មនុស្ស ក្នុងឆ្នាំ២០២០កន្លងទៅ។ ការហិនហោចនេះ គឺបានកើនឡើងចំនួន១២% បើប្រៀបធៀបទៅឆ្នាំ២០១៩។
ចុះផ្សាយនៅថ្ងៃ៖
ស្តាប់ - ០២:៤៨
ក្នុងឆ្នាំ២០២០ បើទោះបីជាពិភពលោកយើងជួបបញ្ហាជំងឺឆ្លងកូវីដ១៩ យ៉ាងធ្ងន់ធ្ងរក្តី តែមនុស្សយើងមិនបានសម្រាកទេ គឺនៅតែបន្តកាប់បំផ្លាញព្រៃធម្មជាតិ។ ទំហំព្រៃធម្មជាតិបានចុះថយចំនួន ៤លាន២សែនហិកតា ពោលគឺស្មើនឹងទំហំផ្ទៃដៃប្រទេសហូឡង់។ នេះបើផ្អែកតាមរបាយការណ៍របស់អង្គការ Global Forest Watch ដែលបានពិនិត្យលើទិន្នន័យ រូបភាពផ្កាយរណប។ ការកាប់បំផ្លាញព្រៃធម្មជាតិ ក្នុងឆ្នាំ២០២០ មានទំហំកើនឡើង លើសឆ្នាំ២០១៩ ចំនួន១២%។ ជាសរុប ក្នុងឆ្នាំ២០២០ ព្រៃឈើបានបាត់បង់ក្នុងទំហំ ១២លាន២សែនហិកតា បើរាប់បញ្ចូលទាំងព្រៃធម្មជាតិ និងព្រៃដែលគេដាំ។
មូលហេតុចំបងនៃការរួញខើចទំហំព្រៃ គឺបណ្តាលមកពីការកាប់រាន ដើម្បីធ្វើកសិកម្ម។ តម្រូវការកាហ្វេ និង គ្រាប់ធុញ្ញជាតិផ្សេងៗដូចជាសណ្តែកសៀង បានកើនឡើងខ្លាំងទូទាំងពិភពលោក ដែលនេះវាបានជំរុញធ្វើឲ្យរីកកាន់តែធំនូវផ្ទៃដីកសិកម្ម។ អ្នកជំនាញបានលើកឡើងនូវហេតុផលមួយទៀត គឺបញ្ហាភ្លើងឆេះព្រៃនៅអូស្ត្រាលី នៅតំបន់ស៊ីបេរី និងនិងនៅតំបន់ព្រៃអាម៉ាហ្សូន។ វិបត្តិសេដ្ឋកិច្ចបង្កឡើងកូវីដ១៩ ក៏ជាមូលហេតុមួយផ្នែកដែរ ក្នុងការរុញច្រានមនុស្ស ឲ្យកាប់បំផ្លាញដើមឈើ នៅតាមតំបន់អភិរក្សដែលគ្មានការការពារម៉ដ្ឋចត់។ កូវីដ១៩ក៏បានរុញច្រានឲ្យមនុស្សចាកចេញពីទីក្រុង ត្រលប់ទៅភូមិស្រុកវិញ ហើយចាប់យករបរកសិកម្ម។
លោក Frances Seymour អ្នកស្រាវជ្រាវនៅវិទ្យាស្ថាន World Resources Institute ដែលដឹកនាំរបាយការណ៍នេះ បានលើកឡើងថា ការហិនហោចព្រៃឈើ គឺជារឿងអាសន្នធំបំផុតសម្រាប់បញ្ហាអាកាសធាតុ វិបត្តិប្រព័ន្ធជីវចម្រុះ គ្រោះមហន្តរាយដល់ជីវិតមនុស្ស និងការបាត់បង់ឱកាសរកចំណូលសេដ្ឋកិច្ច។ ព្រៃឈើគឺជាប្រៀបបីដូចជាអណ្តូង ដែលអាចស្រូបបឺតយកឧស្ម័នកាបូនិកចំនួន១ភាគ៣ ដែលបញ្ចេញចោលទៅក្នុងបរិយាកាស ដោយសកម្មភាពមនុស្ស។ លោកអះអាងថា ឆ្នាំ២០២០ព្រៃធម្មជាតិបានបាត់បង់ជាង៤លានហិកតា គឺមានន័យថាឧស្ម័នកាបូនិកប្រមាណ ២.៦២ជីហ្កាតោន ត្រូវបានព្រលែងចោលទៅក្នុងបរិយាកាស ដែលស្មើនឹងទំហំផ្សែងពុលជះចេញពីរថយន្តចំនួន៥៧០លានគ្រឿង ក្នុងមួយឆ្នាំ។
យោងតាមរបាយការណ៍ ប្រទេសដែលព្រៃធម្មជាតិ បានសិករិចរិលខ្លាំងបំផុត គឺ ប្រទេសប្រេស៊ីល បន្ទាប់មកលំដាប់ទី២ គឺសាធារណរដ្ឋប្រជាធិបតេយ្យកុងហ្គោ។ ដោយឡែក ប្រទេសឥណ្ឌូណេស៊ី ការកាប់បំផ្លាញព្រៃធម្មជាតិ បានថយចុះចំនួន១៧% បើប្រៀបធៀបទៅឆ្នាំ២០១៩។ អ្នកជំនាញសង្កេតឃើញថា ៤ឆ្នាំជាប់គ្នាហើយ ដែលការកាប់បំផ្លាញព្រៃធម្មជាតិនៅក្នុងប្រទេសនេះបានថយចុះ ដែលនេះគឺអាចមានមកគោលនយោបាយរដ្ឋាភិបាល ដែលមានប្រសិទ្ធិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ