អ្នកជំនាញជាង២០នាក់ចេញលិខិតចំហ ទាមទារឲ្យស៊ើបអង្កេតស៊ីជំរៅ គ្រប់សម្មតិកម្មនៃប្រភពកូវីដ១៩
កាលពីថ្ងៃ១៣ឧសភា ទស្សនាវត្តី Science បានចុះផ្សាយលិខិតមួយ របស់អ្នកជំនាញមួយក្រុម ស្តីអំពីប្រភពនៃមេរោគជំងឺកូវីដ១៩។ ក្នុងលិខិតនោះ អ្នកជំនាញបានលើកឡើងថា រហូតមកទល់ពេលនេះ ពុំទាន់មានធាតុផ្សំអ្វី មកអះអាងឲ្យជាក់ច្បាស់ ថាកូវីដ១៩ មានប្រភពចេញពីធម្មជាតិ ឬក៏ជាការបែកធ្លាយ ចេញពីមន្ទីរពិសោធន៍នោះទេ។ ដូច្នេះ ត្រូវតែបន្តការស្រាវជ្រាវ លើគ្រប់សម្មតិកម្មទាំងអស់ មិនត្រូវបោះបង់ចោលមួយណាឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
អ្នកជំនាញផ្នែកស្រាវជ្រាវមេរោគ ចំនួនជាង២០នាក់ ដែលសុទ្ធតែត្រូវបានគេទទួលស្គាល់សមត្ថភាពពាសពេញពិភពលោក បានរួមគ្នា ចេញលិខិតចំហរមួយ អំពាវនាវ ឲ្យរៀបចំបង្កើតក្រុមការងារស្រាវជ្រាវ ស្តីពីប្រភពនៃមេរោគកូរ៉ូណាវីរុសថ្មី (Sars-CoV-2) ដែលបង្កជំងឺកូវីដ១៩ ដោយផ្អែកលើគ្រប់សម្មតិកម្មទាំងអស់។
ក្រុមអ្នកជំនាញ បានលើកឡើងថា ជាការពិតថ្វីបើ សម្មតិកម្មដែលថា កូវីដ១៩ បានឆ្លងចេញពីសត្វប្រចៀវ ហើយឆ្លងទៅសត្វមួយប្រភេទទៀត មុននឹងឆ្លងមកមនុស្ស គឺជាសម្មតិកម្ម ដែលគេគិតថាអាចទៅរួចច្រើនក្តី ក៏ប៉ុន្តែសម្មតិកម្ម ទាក់ទិននឹងការធ្លាយចេញមេរោគ ចេញពីមន្ទីរពិសោធន៍ នៅវូហាន គឺមិនត្រូវបានគេយកពិចារណា ស្រាវជ្រាវឲ្យបានស៊ីជំរៅទេ។ យ៉ាងណាមិញ លទ្ធផលអង្កេតរបស់ក្រុមអ្នកជំនាញអង្គការសុខភាពពិភពលោក សហការជាមួយអ្នកជំនាញចិន កាលណពីខែកុម្ភៈ គឺនៅតែមិនអាចបំភ្លឺចំងល់ទាំងនេះបានទេ។
លិខិតនេះ បានអះអាងថា ក្រុមអ្នកជំនាញនៃអង្គការសុខភាពពិភពលោក មិនបានធ្វើការអង្កេតស្រាវជ្រាវ ប្រកបដោយតុល្យភាព ទាក់ទិននឹងសម្មតិកម្ម ដែលថាកូវីដ១៩ អាចមានប្រភពធ្លាយចេញពីមន្ទីរពិសោធន៍។ អ្នកជំនាញដែលសរសេរលិខិតចំហរនេះ បានសង្កត់ធ្ងន់ថា គេត្រូវយកមកពិចារណា ស្វែងយល់ឲ្យបានគ្រប់ជ្រុងជ្រោយ និងប្រមូលទិន្នន័យ ឲ្យបានច្រើនបំផុត ទាក់ទិននឹងសម្មតិកម្មទាំងអស់ មិនថាសម្មតិកម្មថាឆ្លងចេញពីធម្មជាតិ ឬ សម្មតិកម្មថាឆ្លងចេញពីមន្ទីរពិសោធន៍នោះទេ។
គួររំលឹកថា រដ្ឋាភិបាលចិន បានប្រកែកជាច្រើនលើកច្រើនសា ថាកូវីដ១៩ មិនមានប្រភពធ្លាយចេញពីមន្ទីរពិសោធន៍នៅវូហាននោះទេ។ អ្នកជំនាញចិន ធានាអះអាងថា ពុំអាចទៅរួចទេ ដែលថាមេរោគបានបែកធ្លាយចេញពីមន្ទីរពិសោធន៍។ ក៏ប៉ុន្តែ កន្លងមកអ្នកស្រាវជ្រាវអនាមិកម្នាក់ បានទំលាយឯកសារស្រាវជ្រាវចំនួន៣ បង្ហាញថា មន្ទីរពិសោធន៍ក្រុងវូហាន បានស្រាវជ្រាវ និងធ្វើពិសោធន៍ផ្លាស់ប្តូរ បំលែងភ្នាក់ងារជំងឺ នៃមេរោគកូរ៉ូណាវីរុសមួយចំនួន។
តែយ៉ាងណាក៏ដោយ នៅក្នុងលិខិតចំហរ ចុះផ្សាយដោយទស្សនាវត្តី Science កាលពីថ្ងៃទី១៣ឧសភា អ្នកជំនាញទាំងជាង២០នាក់ បានទាមទារថា ត្រូវតែមានការស៊ើបអង្កេតដោយឯករាជ្យ ប្រកបដោយតម្លាភាព ឥតលម្អៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ