OMC/WTO៖ មានប្រទេសមួយចំនួននៅតែស្ទាក់ស្ទើរ មិនយល់ស្របរឿងព្យួរកម្មសិទ្ធិបញ្ញា លើវ៉ាក់សាំងកូវីដ១៩
កាលពីថ្ងៃចន្ទ ទី៣១ឧសភា អង្គការពាណិជ្ជកម្មពិភពលោក បានស្នើទៅកាន់ប្រទេសសមាជិក អំពីការចាប់ផ្តើមពិភាក្សាគ្នា លើអត្ថបទស្នើដោយឥណ្ឌា និងអាហ្វ្រិកខាងត្បូង ទាក់ទិននឹងការព្យូរ សិទ្ធិកម្មសិទ្ធិបញ្ញានៃវ៉ាក់សាំងប្រឆាំងកូវីដ១៩។ តែយ៉ាងណា ប្រភពពីអង្គការពាណិជ្ជកម្មពិភពលោក បានលើកឡើងថា នៅមានប្រទេសមួយចំនួន ដូចជប៉ុន អង់គ្លេស និងសហភាពអឺរ៉ុបជាដើម បានសំដែងការរារែក ស្ទើរស្ទាក់ មិនគាំទ្រគំនិតនេះទាំងស្រុងទេ។
ចុះផ្សាយនៅថ្ងៃ៖
ស្តាប់ - ០៣:១០
ប្រភពពីមន្ត្រីអង្គការពាណិជ្ជកម្មពិភពលោកម្នាក់ បានអះអាងថា គេបានចាប់ផ្តើមនិយាយគ្នា ក្នុងកិច្ចប្រជុំក្រៅផ្លូវការមួយ ដើម្បីឈានទៅបើកកិច្ចពិភាក្សា ស្តីពីការព្យួរសិទ្ធិកម្មសិទិ្ធបញ្ញា លើវ៉ាក់សាំងប្រឆាំងកូវីដ១៩។ ការចាប់ផ្តើមនិយាយគ្នានេះ ត្រូវបានប្រទេសទាំងអស់ រីករាយទទួលយល់ព្រម ក៏ប៉ុន្តែមានប្រទេសមួយចំនួន បានបង្ហាញនូវភាពស្ទាក់ស្ទើរ រារែក។
សហភាពអឺរ៉ុប អង់គ្លេស ស្វ៊ីស អូស្ត្រាលី ជប៉ុន ន័រវែស សិង្ហបុរី កូរ៉េខាងត្បូង និងតៃវ៉ាន់ បានបង្ហាញភាពស្ទាក់ស្ទើរ ដោយលើកឡើងថា ត្រូវការពេលវេលាគិតឲ្យបានយូរបន្តិចសិន មិននឹងចាប់ផ្តើម ធ្វើការពិភាក្សាគ្នាជាផ្លូវការ នៅក្នុងក្របខណ្ឌអង្គការពាណិជ្ជកម្មពិភពលោក។
សូមបញ្ជាក់ថា ឥណ្ឌា និង អាហ្វ្រិកខាងត្បូង បានរួមគ្នាស្នើអត្ថបទមួយ ទៅកាន់អង្គការពាណិជ្ជកម្មពិភពលោក ដើម្បីឈានទៅសម្រេចព្យួរសិទ្ធិកម្មសិទ្ធិបញ្ញា លើវ៉ាក់សាំងប្រឆាំងកូវីដ១៩ រយៈពេលយ៉ាងហោច៣ឆ្នាំ។ ធ្វើបែបនេះ គឺដើម្បីជួយឲ្យគ្រប់ប្រទេសមានសិទ្ធិអាចផលិតវ៉ាក់សាំង លក់ក្នុងតម្លៃថោក ហើយឈានទៅប្រយុទ្ធយកឈ្នះកូវីដ១៩ ឲ្យបានឆាប់។ ក្រៅពីព្យួរសិទ្ធិកម្មសិទិ្ធបញ្ញាលើវ៉ាក់សាំង អត្ថបទនេះ ចង់ពង្រីកការព្យូរកម្មសិទិ្ធបញ្ញា លើថ្នាំព្យាបាល សម្ភាៈពេទ្យក្នុងការព្យាបាលកូវីដ១៩ និងសម្ភាៈការពារ ព្រមទាំងវត្ថុធាតុដើមដែលចាំបាច់ ក្នុងការផលិតវ៉ាក់សាំង ថែមទៀតផង។ ឥណ្ឌា និងអាហ្វ្រិកខាងត្បូង អះអាងថា មានប្រទេស៦៣ បានគាំទ្រសំណើអត្ថបទនេះហើយ។
គួរបញ្ជាក់ថា ដើម្បីសម្រេចកិច្ចព្រមព្រៀងណាមួយ អង្គការពាណិជ្ជកម្មពិភពលោក ត្រូវប្រមូលឲ្យបាន នូវសម្លេងយល់ព្រមស្រុះស្រួល ពីសមាជិកទាំង១៦៤ប្រទេស។ សហរដ្ឋអាមេរិក បានអះអាងថា ខ្លួនមិនជំទាស់ និងការជជែកគ្នា ដើម្បីឈានទៅព្យួរសិទ្ធិកម្មសិទ្ធិបញ្ញា លើវ៉ាក់សាំងប្រឆាំងកូវីដ១៩ទេ ប្រសិនបើវាអាចជួយពន្លឿនចរន្តផលិតវ៉ាក់សាំងបានមែន។ តែយ៉ាងណាសហភាពអឺរ៉ុប បានលើកឡើងថា សម្រាប់កាលៈទេសៈនេះ ប្រទេសមួយចំនួន គួរតែលុបចោលនូវការហាមឃាត់ ការនាំចេញវ៉ាក់សាំង និងការនាំចេញធាតុផ្សំផលិតវ៉ាក់សាំងវិញ ទើបអាចទៅជួយ បង្កើនការផលិតវ៉ាក់សាំងបានច្រើន។ ដោយឡែក ប្រទេសស្វ៊ីស ដែលសំបូរទៅដោយសហគ្រាសផលិតឱសថ បានលើកឡើងថា អង្គការពាណិជ្ជកម្មពិភពលោក គួរតែពិចារណាប្រើប្រាស់យន្តការដែលមានស្រាប់ តាមរយៈកិច្ចព្រមព្រៀង TRIPS ជាជាងការសម្រេចប្រញ៉ាប់ទៅព្យូរសិទ្ធិកម្មសិទ្ធិបញ្ញាទាំងស្រុង។
គួរកត់សំគាល់ថា យោងតាមតួលេខរបស់ទីភ្នាក់ងារព័ត៌មានបារាំង គិតត្រឹមពេលនេះ មានវ៉ាក់សាំងប្រមាណ១៩០០លានដូស ត្រូវបានគេចាក់ជូនប្រជាពលរដ្ឋ ទូទាំងពិភពលោក។ ក៏ប៉ុន្តែ ក្នុងចំណោមនេះ គឺមាន០.៣%ប៉ុណ្ណោះ ដែលត្រូវបានចាក់នៅតាមប្រទេសក្រីក្រខ្លាំងចំនួន២៩ ខណៈដែលប្រជាជនតាមប្រទេសទាំងនេះ មានប្រមាណ៩% នៃប្រជាជនសកលលោក។ លទ្ធភាពនៃការចាក់វ៉ាក់សាំងប្រឆាំងកូវីដ១៩ បានបង្ហាញគំលាតគ្នា រវាងប្រទេសអ្នកមាន និងប្រទេសអ្នកក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ