វិបត្តិកូវីដ១៩ កំពុងបំផ្លាញ សិទ្ធិទទួលបានការរៀនសូត្ររបស់កុមារ
ការឆ្លងរាលដាលកូវីដ១៩ នៅទូទាំងពិភពលោក ប្រមាណជាង១ឆ្នាំមកនេះ បានបង្កផលប៉ះពាល់ យ៉ាងធ្ងន់ធ្ងរ ទៅលើសិទ្ធិកុមារ ពោលគឺសិទ្ធិទទួលបានការរៀនសូត្រ។ នេះបើផ្អែកតាមការលើកឡើង របស់អង្គការ KidsRights។ ការបិទសាលារៀន និងការមិនយកចិត្តទុកដាក់ ផ្តល់មធ្យោបាយដល់ការរៀនសូត្រ របស់កុមារ មិនត្រឹមតែបំផ្លាញអនាគតរបស់ពួកគេ តែថែមទាំងអាចជះផលអវិជ្ជមាន ទៅលើសុខភាពផ្លូវចិត្តរបស់កុមារថែមទៀតផង។
ចុះផ្សាយនៅថ្ងៃ៖
ស្តាប់ - ០២:៣៦
លោក Marc Dulleart នាយកអង្គការ KidsRights ដែលមានទីតាំងនៅក្រុងអាំស្ទែរដាំ បានលើកឡើងថា ផលវិបាកបង្កឡើងដោយកូវីដ១៩ មានទៅលើកុមារ គឺធ្ងន់ធ្ងរហួសពីការរំពឹងទុក។ ថ្វីបើមិនរងគ្រោះដោយផ្ទាល់ ដោយសារជម្ងឺនេះមែន តែកុមារបានរងនូវផលអវិជ្ជមាន ដោយសារតែភាពខ្ជីខ្ជា មិនយកចិត្តទុកដាក់ ពីសំណាក់អាជ្ញាធររដ្ឋាភិបាល នៅទូទាំងពិភពលោក។
យោងតាមតួលេខរបស់អង្គការ KidsRights កុមារប្រមាណ១៦៨លាននាក់ មិនអាចទៅសាលារៀនបាន ដោយសារតែវិធានការបិទខ្ទប់នានា។ ទន្ទឹមនឹងនេះ កុមារម្នាក់ ក្នុងចំណោម៣នាក់ គឺមិនអាចមានមធ្យោបាយទទួលបានការរៀនសូត្រ ពីចំងាយបានទេ នៅក្នុងអំឡុងពេលដែលសាលារៀនត្រូវបិទទ្វារ។ កុមារ ១៤២លាននាក់បន្ថែមទៀត ត្រូវស្ថិតក្នុងស្ថានភាព គ្មានសម្ភារៈសិក្សា ខណៈដែលកូវីដ១៩បានវាយបំបាក់សេដ្ឋកិច្ច។ ហើយយ៉ាងហោចណាស់ កុមារ ៣៧០លាននាក់ លែងអាចហូបចំណីអាហារ នៅសាលារៀនបានទៀត។
លោកនាយកអង្គការ KidsRights បានសង្កត់ធ្ងន់ថា រដ្ឋាភិបាលប្រទេសទាំងអស់ ត្រូវតែផ្តល់អាទិភាព ដល់ការរៀនសូត្ររបស់កុមារ តាមរយៈការផ្តល់សន្ទុះ បើកសាលារៀនឡើងវិញ ពង្រឹងវិស័យអប់រំ និងផ្តល់មធ្យោបាយឲ្យបានច្រើនបំផុត ដល់ការរៀនសូត្ររបស់កុមារ។ ពុំនោះទេ ទៅថ្ងៃអនាគត សង្គមប្រាកដជាជួបវិបត្តិ ដោយសារតែគម្លាតនៃចំណេះដឹង។ សាលារៀនមិនមែនត្រឹមតែជាថ្នាលបណ្តុះចំណេះវិជ្ជាប៉ុណ្ណោះទេ តែវាជាទីកន្លែងនៃការពង្រឹងភាពរឹងមាំ នៃកាយសម្បទារ និងសតិស្មារតីរបស់កុមារ។
អង្គការ KidsRights បានអបអរសាទរ ចំពោះវិធានការមួយចំនួន ដែលរដ្ឋជួយដល់ការរៀនសូត្រដល់កុមារ នៅក្នុងអំឡុងពេលវិបត្តិកូវីដ១៩។ ជាក់ស្តែងប្រទេស បង់ក្លាដែស បានប្រើប្រាស់ស្ថានីយ៍ទូរទស្សន៍ជាតិ ដើម្បីធ្វើកម្មវិធីផ្សាយបង្រៀនដល់កុមារ នៅតាមផ្ទះ។ ចំណែកប្រទេសស៊ុយអែត និង ប៊ែលហ្សុិកវិញ បានបន្តបើកសាលារៀនរហូត ក្នុងអំឡុងពេលវិបត្តិកូវីដ១៩។
គួរបញ្ជាក់ថា យោងតាមចំណាត់ថ្នាក់ KidsRights Index 2021 ក្នុងចំណោមប្រទេសទាំងអស់១៨២ ប្រទេសដែលគោរពសន្ធិសញ្ញាអន្តរជាតិស្តីពីសិទ្ធិកុមារ បានល្អបំផុត គឺមាន ប្រទេសអ៊ីស្លង់ ស្វ៊ីស និងហ្វាំងឡង់។ សេរ៉ាឡេអូន អាហ្វហ្កានីស្ថាន និង ឆាដ ជាប្រទេសដែលមានចំណាត់ថ្នាក់អាក្រក់ជាងគេបំផុត ក្នុងវិស័យគោរពសិទ្ធិកុមារ។ បារាំងស្ថិតនៅលំដាប់ទី៦ រីឯកម្ពុជាស្ថិតនៅលំដាប់ ទី១២៧ ក្នុងចំណោម ១៨២ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ