G20 សន្យាពន្លឿននីតិវិធីផលិតវ៉ាក់សាំង ដើម្បីបង្ការទប់ស្កាត់ករណីជម្ងឺឆ្លង នៅថ្ងៃខាងមុខ
ក្រុមប្រទេសសេដ្ឋកិច្ចនាំមុខ G20 ដែលនឹងជួបប្រជុំគ្នា នៅទីក្រុងរ៉ូមប្រទេសអ៊ីតាលី ចាប់ពីថ្ងៃទី៣០តុលានេះទៅ មានគម្រោងសន្យាគ្នា ធ្វើយ៉ាងណា ផ្តល់ភាពងាយស្រួល ក្នុងការពន្លឿននីតិវិធីផលិតថ្នាំវ៉ាក់សាំង នៅក្នុងករណីមានវិបត្តិជម្ងឺឆ្លងថ្មីណាមួយ ទៅថ្ងៃអនាគត។ មន្ទីពិសោធន៍ឱសថ នឹងត្រូវកាត់បន្ថយរយៈពេល ៣០០ថ្ងៃ មកនៅត្រឹមតែ១០០ថ្ងៃ ដើម្បីស្រាវជ្រាវសាកល្បង និងផលិតវ៉ាក់សាំង។
ចុះផ្សាយនៅថ្ងៃ៖
ស្តាប់ - ០២:៤០
ដោយស្រង់ពិសោធន៍ ពីវិបត្តិកូវីដ១៩ នាពេលកន្លងមកនេះ ប្រទេសឧស្សាហកម្មនាំមុខ G20 មានបំណងរួមគ្នា រកវិធីបង្ការ ដោះស្រាយបញ្ហាឲ្យទាន់ពេលវេលា។ ជាទូទៅ ដើម្បីអាចផលិតវ៉ាក់សាំងបាននីមួយៗ គេត្រូវចំណាយពេល ខ្លះដល់ទៅ១០ឆ្នាំក៏មាន ដោយសារតែត្រូវឆ្លងកាត់ ការធ្វើតេស្តសាកល្បង ជាច្រើនដំណាក់។ ក៏ប៉ុន្តែ ជាមួយនឹងវិបត្តិកូវីដ១៩ ដែលបានបោកបក់ផ្ទប់មកលើសកលលោកទាំងមូល នៅឆ្នាំ២០២០ បណ្តាមន្ទីរពិសោធន៍ បានប្រឹងប្រែង ស្រាវជ្រាវផលិតចេញជាវ៉ាក់សាំង ក្នុងរយៈពេលមិនដល់មួយឆ្នាំ។
យោងតាមអត្ថបទនៃគម្រោងសេចក្តីប្រកាសរួមគ្នា ក្នុងក្របខណ្ឌកិច្ចប្រជុំG20 នៅទីក្រុងរ៉ូម គឺគេបានសរសេរថា “ក្នុងករណីបន្ទាន់ ដែលមានជម្ងឺឆ្លងកាចសាហាវ យើងសូមជំរុញ លើកទឹកចិត្ត ឲ្យផ្នែកវិទ្យាសាស្ត្រ ត្រូវកាត់បន្ថយរយៈពេលស្រាវជ្រាវ សាកល្បង និងផលិតវ៉ាក់សាំង ក៏ដូចជាថ្នាំព្យាបាល ពី៣០០ថ្ងៃ មកនៅត្រឹម១០០ថ្ងៃ។ ប៉ុន្តែ ដោយរក្សាភាពគួរឲ្យទុកចិត្ត និងប្រសិទ្ធភាព”។ ទោះយ៉ាងណាក៏ដោយ នេះគ្រាន់តែជាអត្ថបទគ្រោងប៉ុណ្ណោះ។ ប៉ុន្តែបើយោងតាមប្រភពស្និទ្ធនឹងកម្មវិធីប្រជុំ គឺប្រហែលជាគ្មានការប្រែប្រួលណាមួយទេ។ ពោលគេក្រុមប្រទេសG20 ប្រាកដជានឹងអនុម័ត។
គួរបញ្ជាក់ថា ដើម្បីកាត់បំព្រួញរយៈពេលនៃនីតិវិធីផលិត វ៉ាក់សាំង ក៏ដូចជាថ្នាំព្យាបាល គឺគេត្រូវតែរៀបចំយន្តការសហការគ្នា ជាចាំបាច់ រវាងមន្ទីរពិសោធន៍ ជាពិសេសគឺក្នុងដំណាក់កាលសាកល្បងទ្រង់ទ្រាយធំ។ ការប្រមូល ជ្រើសរើសមនុស្សស្ម័គ្រចិត្ត មកសាកល្បង គឺជារឿងលំបាកបំផុត។ ចំណុចសំខាន់មួយទៀត នោះ គឺត្រូវតែបែកចែកទិន្នន័យគ្នា រវាងមន្ទីរពិសោធន៍ឱសថ។ យ៉ាងណាមិញ សហភាពអឺរ៉ុប កំពុងតែពិចារណា ជំរុញបង្កើតបណ្ដាញរួមមួយ ដើម្បីភ្ជាប់ទំនាក់ទំនង រវាងអ្នកទទួលខុសត្រូវ ចាត់ចែងនីតិវិធិធ្វើតេស្តសាកល្បងឱសថ។
ដោយឡែក ក្រៅពីសន្យាទៅថ្ងៃអនាគត ក្នុងការជួយពន្លឿននីតិវិធីផលិតវ៉ាក់សាំង ក្រុមប្រទេសG20 ក៏បានផ្តល់ការគាំទ្រផងដែរ ដល់កម្មវត្ថុរបស់អង្គការសុខភាពពិភពលោក ដែលចង់ចាក់វ៉ាក់សាំងបង្ការកូវីដ១៩ ឲ្យបាន៧០% នៅតាមប្រទេសទាំងអស់ទូទាំងពិភពលោក ពីនេះដល់ពាក់កណ្តាលឆ្នាំ២០២២។
គួរកត់សំគាល់ថា គិតមកត្រឹមពេលនេះ អសមភាព គំលាតគ្នានៃយុទ្ធនាការចាក់វ៉ាក់សាំង គឺមានខ្ពស់ណាស់ រវាងប្រទេសអ្នកមាន និងប្រទេសអ្នកក្រ។ ខណៈដែលប្រទេសអ្នកមានសឹងទាំងអស់ បានចាក់វ៉ាក់សាំងបានជិត៧០% តែប្រទេសក្រីក្រ និងកំពុងអភិវឌ្ឍន៍វិញ កម្រិតចាក់វ៉ាក់សាំង មានជាមធ្យម មិនដល់៥%ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ