ជិតពាក់កណ្តាលនៃមនុស្សទូទាំងពិភពលោក បរិភោគចំណីអាហារមិនត្រឹមត្រូវ
យោងតាមរបាយការណ៍ Global Nutrition Report ដែលទើបតែចេញផ្សាយនៅថ្ងៃអង្គា ទី២៣វិច្ឆិកា គឺជិតពាក់កណ្តាល នៃមនុស្សទូទាំងពិភពលោកយើង កំពុងជួបនឹងបញ្ហាបរិភោគចំណីអាហារមិនត្រឹមត្រូវ។ ខណៈដែលមនុស្សមួយចំនួន មានចំណីអាហារបរិភោគមិនគ្រប់គ្រាន់ មួយចំនួនទៀតវិញ បរិភោគលើសចំណុះ។
ចុះផ្សាយនៅថ្ងៃ៖
ស្តាប់ - ០២:៥៩
បាយការណ៍ប្រចាំឆ្នាំ "Global nutrition report" (GNR) ចេញដោយអង្គការសហប្រជាជាតិ សហការជាមួយ អង្គការFAO អង្គការUnicef និងអង្គការសុខភាពពិភពលោក បានបង្ហាញថា ៤៨% នៃប្រជាជនទូទាំងពិភពលោក កំពុងតែជួបបញ្ហាចំណីអាហារ ដោយការបរិភោគមិនគ្រប់គ្រាន់ ឬបរិភោគលើសតម្រូវការ។ ស្ថិតក្នុងបរិបទនេះ អ្នកជំនាញរំពឹងថា នៅរវាងឆ្នាំ២០២៥ ពិភពលោកយើង នឹងមិនអាចសម្រេចកម្មវត្ថុទាំង៩ ស្តីអំពីការបរិភោគចំណីអាហារ ដែលត្រូវបានដាក់ចេញដោយអង្គការសុខភាពពិភពលោកទេ។ កម្មវត្ថុដែលមានជាអាទិ៍ ការកាត់បន្ថយចំនួនកុមារស្គមស្គាំង ក្រិន ធំធាត់មិនត្រូវតាមអាយុ ស្គមជ្រុល ធាតុជ្រុល និងចំនួនមនុស្សពេញវ័យ ដែលមានបញ្ហាធាត់លើសទំងន់ជាដើម។
មានកុមារអាយុក្រោម៥ឆ្នាំ យ៉ាងហោច១៥០លាននាក់ កំពុងជួបបញ្ហាជំងឺក្រិន រាងកាយធំធាត់យឺតយ៉ាង ៤៥លាននាក់ទៀត ស្គមខ្លាំងមិនត្រូវនឹងកំពស់ និងយ៉ាងហោច៤០លាននាក់ ដែលធាត់ជ្រុលលើសទំងន់។ របាយការណ៍នេះលើកឡើងផងដែរថា ៤០%នៃមនុស្សពេញវ័យ ទាំងប្រុសទាំងស្រី ពោលគឺប្រមាណ ២២០០លាននាក់ មានបញ្ហាធាត់លើសទំងន់ ឬ ធាត់ចុកខ្លាញ់។
បើគិតចាប់ពីឆ្នាំ២០១០មក ករណីស្លាប់ ដោយសារតែបញ្ហាបរិភោគចំណីអាហារមិនត្រូវនេះ បានកើនឡើង ប្រមាណជា១៥%។ លោកស្រី Renata Micha ប្រធានក្រុមអ្នកជំនាញសរសេររបាយការណ៍នេះ បានអះអាងថា បច្ចុប្បន្ននេះ ១ភាគ៤ នៃករណីមរណភាព របស់មនុស្សធំពេញវ័យ គឺបណ្តាលមកពីបញ្ហាការបរិភោគមិនត្រឹមត្រូវ។ លោកស្រីបន្ថែមថា ១០ឆ្នាំមកនេះ គុណភាពចំណីអាហារ នៅទូទាំងពិភពលោក មិនបានប្រសើរឡើងទេ ដែលនេះវាគឺជាការគំរាមមួយដ៏ធំ មកលើសុខភាព របស់មនុស្សទាំងអស់។
របាយការណ៍អះអាងថា ជាទូទៅប្រជាជន មិនបានបរិភោគចំណីអាហារ ឲ្យត្រឹមត្រូវតាមចំនួន បរិមាណ ដែលអ្នកជំនាញផ្តល់អនុសាសន៍ទេ ជាក់ស្តែងដូចជាការបរិភោគ បន្លែ និងផ្លែឈើមិនគ្រប់គ្រាន់។ ភាគច្រើន ប្រទេសក្រីក្រ ដែលមានចំណូលទាប ប្រជាជនបរិភោគចំណីអាហារសំខាន់ៗទាំងនេះ ក្នុងបរិមាណមិនគ្រប់គ្រាន់។
ផ្ទុយទៅវិញ នៅតាមប្រទេសអ្នកមាន ប្រជាជនបរិភោគប្រភេទចំណីអាហារ ដែលអាចបង្កផលវិបាកដល់សុខភាព ច្រើនជ្រុលខ្លាំងទៅវិញ តួយ៉ាងដូចជា សាច់ក្រហម ទំនិញផលិតចេញពីទឹកដោះគោ ភេសជ្ជៈដែលមានជាតិស្ករខ្លាំង។ កត្តាទាំងនេះ ដែលធ្វើឲ្យមនុស្សមានបញ្ហាធាត់លើសទំងន់ នៅតាមប្រទេសអ្នកមាន។ ការបរិភោគចំណីអាហារ ដែលមានប្រភពចេញពីសត្វ ច្រើនជ្រុល គឺមិនត្រឹមតែអាចបង្កហានិភ័យដល់សុខភាពនោះទេ តែចំណីអាហារប្រភេទនេះ ក៏បានចូលរួមខ្លាំងផងដែរ ក្នុងការបំពុលបរិស្ថាន និងបញ្ចេញឧស្ម័នផ្ទះកញ្ចក់ បើប្រៀបធៀបទៅនឹងចំណីអាហារ ដែលជាបន្លែផ្លែឈើ។
ជាងនេះទៀត វិបត្តិកូវីដ១៩ បានរុញច្រានមនុស្ស ប្រមាណ១៥៥លាននាក់បន្ថែមទៀត ឲ្យធ្លាក់ទៅក្នុងភាពក្រីក្រតោកយ៉ាកខ្លាំង ហើយដែលពួកគេ កាន់តែប្រឈមនឹងបញ្ហាស្បៀងអាហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ