OMS/WHO ចង់ពង្រឹងតួនាទី និងសមត្ថភាពខ្លួន ដើម្បីអាចដោះស្រាយវិបត្តិសុខភាព ទៅថ្ងៃអនាគត
អង្គការសុខភាពពិភពលោក បានចាប់ផ្តើមកាលពីថ្ងៃចន្ទទី២៩វិច្ឆិកា បើកអង្គសន្និបាតវិសាមញ្ញមួយ ដែលមានរយៈពេល៣ថ្ងៃ។ ជាកិច្ចប្រជុំពិសេស រវាងប្រទេសសមាជិកទាំងអស់ ដែលអង្គការកំពូលនេះ ចង់ជជែករៀបចំយន្តការ ក្នុងការពង្រឹងតួនាទី ក៏ដូចជាសមត្ថភាពរបស់ខ្លួន ឲ្យបានប្រសើរឡើង ដើម្បីអាចដោះស្រាយ ទប់ទល់នឹងវិបត្តិសុខភាពផ្សេងទៀត ទៅថ្ងៃខាងមុខ។
ចុះផ្សាយនៅថ្ងៃ៖
ស្តាប់ - ០២:៣៦
« វិបត្តិសុខភាពធ្ងន់ធ្ងរ នឹងកើតឡើងជាថ្មីទៀត ដរាបណា យើងគ្រប់គ្នា មិនរួមគ្នា និយាយក្នុងសម្លេងតែមួយថា ត្រូវតែបញ្ឈប់វាឲ្យបាន ទេនោះ »។ នេះគឺជាការលើកឡើង របស់លោក អគ្គលេខាធិការអង្គការសុខភាពពិភពលោក នៅក្នុងឱកាសបើកអង្គសន្និបាតវិសាមញ្ញ ចំពោះមុខប្រទេសសមាជិកទាំង១៩៤ប្រទេស នៅថ្ងៃចន្ទ ទី២៩វិច្ឆិកា។
លោកបានបន្តថា « ពេលវេលាដល់ហើយ ដែលយើងទាំងអស់គ្នា ត្រូវរួមគ្នាកសាងអ្វីម្យ៉ាង ដើម្បីជាកេរតំណែល សម្រាប់ក្មេងជំនាន់ក្រោយ។ ជាមួយនឹង កូវីដបំប្លែងខ្លួនថ្មី ឈ្មោះអូមីក្រុង ដែលកំពុងតែធ្វើឲ្យគ្រប់គ្នាភ័យបារម្ភនេះ គឺបានសបង្ហាញថា មិនដឹងពេលណាទេ ដែលពិភពលោកយើង នឹងអាចចេញផុត ពីវិបត្តិសកលមួយនេះ។
គួរបញ្ជាក់ថា ប្រទេសសមាជិកអង្គការសុខភាពពិភពលោក បានស្រុះស្រួលគ្នា យកឱកាសសន្និបាតវិសាមញ្ញរយៈពេល៣ថ្ងៃនេះ ដើម្បីនិយាយគ្នា អំពីការរៀបចំយន្តការផ្ដល់តួនាទី និង លទ្ធភាពបច្ចេកទេស ឲ្យអង្គការសុខភាពពិភពលោក ឲ្យបានច្រើនជាងមុន។ វិបត្តិជំងឺកូវីដ១៩ បានផ្តល់បទពិសោធន៍ថា អង្គការសុខភាពពិភពលោក នៅមានតួនាទី និងសមត្ថភាពមានកម្រិតខ្លាំងណាស់ មិនអាចដោះស្រាយបញ្ហា ឲ្យទាន់ពេលវេលា និងមានប្រសិទ្ធភាពបានទេ។ បញ្ហាទាំងនោះ មានជាអាទិ៍ កង្វះការបែងចែក ឲ្យគ្នាទៅវិញទៅមក នូវទិន្នន័យវិទ្យាសាស្ត្រ និងសុខភាព ព្រមទាំងគ្មានយន្តការបែងចែកវ៉ាក់សាំងជាដើម។ លោកអគ្គលេខាធិការអង្គការនេះ បានអំពាវនាវ ថាត្រូវតែពង្រឹងតួនាទី និងសមត្ថភាពរបស់អង្គការសុខភាពពិភពលោក។
យ៉ាងណាមិញ លោកស្រី អង់ហ្កេឡា មែរកិល ប្រមុខរដ្ឋាភិបាលអាល្លឺម៉ង់ បានលើកឡើង នៅក្នុងសន្និបាតនេះថា វិធានការចាំបាច់ ដើម្បីពង្រឹងសមត្ថភាពរបស់ស្ថាប័ននេះ គឺត្រូវតែគូសវាស នៅក្នុងសន្ធិសញ្ញាអន្តរជាតិមួយ ដែលមានកម្លាំងចាប់បង្ខំឲ្យគោរព។ ដូចគ្នាដែរ លោករដ្ឋមន្ត្រីក្រសួងសុខាភិបាលស្វ៊ីស បានលើកឡើងថា វិបត្តិកន្លងមកនេះ បានបង្ហាញថា យើងត្រូវតែមាន អង្គការសុខភាពពិភពលោកមួយ ដែលមានភាពរឹងមាំ ទើបអាចដោះស្រាយវិបត្តិទៅថ្ងៃមុខបាន។
បើតាមប្រភពស្និទ្ធនឹងសន្និសីទនេះ ជាជំហានបឋម ប្រទេសសមាជិក បានព្រមព្រៀងគ្នា បង្កើតជាអង្គភាពអន្តររដ្ឋាភិបាលមួយ ដើម្បីរួមគ្នាសរសេរ តាក់តែងសន្ធិសញ្ញាថ្មីមួយ ទាក់ទិននឹងការពង្រឹងតួនាទីរបស់អង្គការសុខភាពពិភពលោក និងដើម្បីដោះស្រាយវិបត្តិសុខភាព ឲ្យមានប្រសិទ្ធភាព។ នៅរវាងខែឧសភា ឆ្នាំ២០២៣ គេនឹងបង្ហាញរបាយការណ៍ មុននឹងយកសេចក្តីព្រាងអត្ថបទនេះ មកដាក់លើកតុពិភាក្សាគ្នា ក្នុងឱកាសមហាសន្និបាទសុខភាពពិភពលោក ខែឧសភា ឆ្នាំ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ