WHO/OMS៖ ប្រទេសសមាជិកស្រុះស្រួលគ្នា បើកការចរចាតាក់តែងសន្ធិសញ្ញាមួយ ដើម្បីរួមគ្នាទប់ទល់នឹងជំងឺឆ្លងសកល
អង្គការសុខភាពពិភពលោក បានបើកសន្និសីទវិសាមញ្ញរបស់ខ្លួន កាលពីថ្ងៃចន្ទ ទី២៩កញ្ញា នៅក្នុងបរិបទនៃការឆ្លងរាលដាលនៃជំងឺកូវីដ១៩ នៅទូទាំងពិភពលោក។ ឆ្លងកាត់ ការប្រជុំរយៈពេល៣ថ្ងៃមកនេះ ប្រទេសសមាជិកទាំងអស់ បានស្រុះស្រួលគ្នា ថានឹងបើកការចរចា ដើម្បីតាក់តែងអនាគតសន្ធិសញ្ញាអន្តរជាតិមួយ។ សន្ធិសញ្ញាដែលនឹងមានខ្លឹមសារ កំណត់កម្មវត្ថុ និងយន្តការនានា ដើម្បីឲ្យពិភពលោកទាំងមូល អាចប្រយុទ្ធប្រឆាំងនឹងការឆ្លងរាលដាល ជំងឺរាតត្បាតផ្សេងៗទៀត នៅថ្ងៃអនាគត។
ចុះផ្សាយនៅថ្ងៃ៖
ស្តាប់ - ០២:៥០
លោកអគ្គលេខាធិការអង្គការសុខភាពពិភពលោក បានថ្លែងថា ការសម្រេចស្រុះស្រួលគ្នារវាងប្រទេសសមាជិកទាំងអស់ នៅថ្ងៃទី១ធ្នូ ដើម្បីឈានទៅបើកការចរចា តាក់តែងសន្ធិសញ្ញាអន្តរជាតិមួយ គឺវាជាដំណឹងដ៏ល្អដែលត្រូវតែអបអរសាទរ។ លោក បានបន្ថែម វិបត្តិកូវីដ១៩ កន្លងមកជិត២ឆ្នាំមកនេះ វាបានបង្ហាញថា ពិភពលោកយើង ត្រូវតែរួមគ្នា សមគ្គីគ្នា រៀបចំយន្តការឲ្យបានរឹងមាំ ដើម្បីត្រៀម ប្រយុទ្ធប្រឆាំង នឹងជំងឺឆ្លងផ្សេងទៀត នៅថ្ងៃអនាគត។
លោកស្រី Lotte Knudsen អគ្គរដ្ឋទូតសហភាពអឺរ៉ុប ប្រចាំអង្គការសហប្រជាជាតិ បានថ្លែងថា ប្រទេសទាំងអស់ ត្រូវតែមូលគ្នា រៀបចំកសាងគ្រោងឆ្អឹងប្រព័ន្ធសុខាភិបាលពិភពលោក ឲ្យរឹងមាំ ដើម្បីធ្វើយ៉ាងណា អាចឆ្លើយតប ទប់ទល់ទៅនឹងជំងឺកាចសាហាវផ្សេងៗទៀត ដោយការសមគ្គីគ្នា ដោយប្រសិទ្ធភាព និងដោយរហ័សបំផុត។
សូមបញ្ជាក់ថា មានប្រទេសជាច្រើន និងសហភាពអឺរ៉ុប បានរួមគ្នាជំរុញ លើកជាមតិ ផ្តួចផ្តើម ឲ្យអង្គការសុខភាពពិភពលោក ដឹកនាំការចរចា តាក់តែងសន្ធិសញ្ញាអន្តរជាតិថ្មីមួយ។ ជាសន្ធិសញ្ញា ដែលនឹងភ្ជាប់ចំណងសន្យារវាងប្រទេសសមាជិក ដាក់កម្មវត្ថុ និងវិធានការ ផ្តល់លទ្ធភាព សមត្ថភាពធ្វើការ ឲ្យអង្គការសុខភាពពិភពលោក ឲ្យកាន់តែប្រសើរជាងមុន។
តែយ៉ាងណា មានមតិខ្វែងគ្នាខ្លាំង ទាក់ទិននឹងកម្លាំងចាប់បង្ខំ នៃសន្ធិសញ្ញាអន្តរជាតិនេះ។ លោកស្រីអង់ហ្កេឡា មែរកិល បានលើកឡើងថា សន្ធិសញ្ញានេះ ត្រូវតែមានកម្លាំងអំណាច ចាប់បង្ខំឲ្យសមាជិកទាំងអស់គោរព។ ផ្ទុយទៅវិញ ភាគីសហរដ្ឋអាមេរិក បានបង្ហាញការរារែក ដោយលើកឡើងថា វាមិនមែនជាដំណោះស្រាយល្អ។ ដោយឡែក ចិនមិនបានចូលរួមដាក់សំណើរចរចាសន្ធិសញ្ញានេះទេ តែបានប្រកាសថា ខ្លួននឹងចូលរួមចរចាដែរ។
តាមការគ្រោងទុក ជាជំហានដំបូង គេនឹងបង្កើត អង្គភាពអន្តររដ្ឋាភិបាលមួយ ដើម្បីបើកការចរចា លើសេចក្តីព្រាង នៃសន្ធិសញ្ញានេះ។ នៅពាក់កណ្តាលឆ្នាំ២០២៣ គេនឹងបង្ហាញរបាយការណ៍ មុននឹងយកទៅអនុម័តចុងក្រោយ នៅក្នុងមហាសន្និបាតសុខភាពពិភពលោក នៅខែឧសភា ឆ្នាំ២០២៤។
មន្ត្រីទូតបារាំងម្នាក់ បានលើកឡើងថា អ្វីដែលគេរំពឹងរងចាំបំផុត ពីខ្លឹមសារនៃសន្ធិសញ្ញានេះ គឺការផ្តល់មធ្យោបាយ និងសមត្ថកិច្ច ឲ្យទៅអង្គការសុខភាពពិភពលោក ឲ្យបានធំទូលាយ និងរឹងមាំជាងមុន ជាក់ស្តែង ដូចជាក្នុងតួនាទីស៊ើបអង្កេត ស្រាវជ្រាវ។ លោកអគ្គលេខាធិការអង្គការសុខភាពពិភពលោក ក៏បានអំពាវនាវផងដែរ ឲ្យមានការរៀបចំ បង្កើតប្រព័ន្ធរួមមួយ ជាលក្ខណៈអន្តររដ្ឋាភិបាល ក្នុងការវាយតម្លៃ ស្ថានការណ៍សុខាភិបាលពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ