ឆ្នាំ២០២១ ចំនួនអ្នកសារព័ត៌មានត្រូវគេចាប់ដាក់ឃុំ មានច្រើនជាងឆ្នាំណាៗទាំងអស់
យោងតាមរបាយការណ៍ របស់គណកម្មាធិការការពារអ្នកសារព័ត៌មាន គឺក្នុងឆ្នាំ២០២១នេះ អ្នកកាសែតដែលត្រូវបានគេចាប់ដាក់ឃុំ មានចំនួនដល់ទៅជិត៣០០នាក់ នៅទូទាំងពិភពលោក។ នេះគឺជាចំនួនកើនឡើងខ្លាំងបំផុត មិនធ្លាប់មាន ដែលបង្ហាញអំពីការធ្លាក់ចុះខ្លាំង នៃសិទ្ធិសេរីភាពសារព័ត៌មាន។
ចុះផ្សាយនៅថ្ងៃ៖
ស្តាប់ - ០២:០៩
គិតត្រឹមថ្ងៃទី១ធ្នូ ឆ្នាំ២០២១ មានអ្នកសារព័ត៌មាន យ៉ាងហោច ២៩៣នាក់ ត្រូវបានគេចាប់ដាក់ឃុំ។ យោងតាមរបាយការណ៍ ក្រៅពីអ្នកកាសែតដែលត្រូវគេចាប់ដាក់ឃុំ ក្នុងឆ្នាំ២០២១ មានអ្នកកាសែតចំនួន ២៤នាក់ ត្រូវបានគេសម្លាប់ ដោយសារមូលហេតុ ពួកគេបានធ្វើបទយកការណ៍ លើប្រធានបទរសើបមួយចំនួន។ បន្ថែមពីនេះ មានករណីស្លាប់ អ្នកកាសែតចំនួន១៨នាក់ផ្សេងទៀត តែដោយមិនអាចកំណត់បានឲ្យច្បាស់ ថាបណ្តាលមកពីមូលហេតុការងារសារព័ត៌មាន ឬយ៉ាងណា។
ចិន គឺជាប្រទេសឈានមុខគេ ដោយបានចាប់អ្នកកាសែតដាក់ឃុំ ចំនួនយ៉ាងហោច ៥០នាក់ នៅក្នុងឆ្នាំ២០២១។ បន្ទាប់មកទៀត គឺភូមា មានចំនួន២៦នាក់ វៀតណាម២៣នាក់ បេឡារុស ១៩នាក់។ ដោយឡែក ហុងកុង បានលេចមុខជាលើកទីមួយ នៅក្នុងរបាយការណ៍របស់ CPJ បន្ទាប់ពីច្បាប់សន្តិសុខជាតិចិន បានចូលជាធរមាន ហើយធ្វើឲ្យអ្នកកាសែតឯករាជ្យជាច្រើននាក់ ត្រូវគេចាប់ដាក់ឃុំ។
ដោយឡែក ប្រទេសមិចស៊ិក គឺជាប្រទេសតែមួយគត់ នៅទ្វីបអាេមរិក ដែលការងារសារព័ត៌មាន ប្រឈមគ្រោះថ្នាក់បំផុត។ អ្នកកាសែតនៅមិចស៊ិក អាចប្រឈមនឹងការធ្វើឃាត បើពួកគេហ៊ានធ្វើបទយកការណ៍ ស៊ើបអង្កេត ទាក់ទិននឹងបណ្តាញឧក្រិដ្ឋកម្ម ឬក៏អ្នកនយោបាយពុករលួយ។ នៅឥណ្ឌា ក្នុងឆ្នាំ២០២១ អ្នកកាសែតចំនួនយ៉ាងហោច ៤នាក់ ត្រូវបានគេសម្លាប់។
លោក Joel Simon នាយកប្រតិបត្តិនៃគណកម្មារធិការការពារអ្នកសារព័ត៌មាន CPJ បានលើកឡើងថា នេះគឺជាឆ្នាំទី៦ជាប់គ្នាហើយ ដែលចំនួនអ្នកសារព័ត៌មាន ត្រូវគេចាប់ដាក់ឃុំ បានឡើងខ្ពស់ខ្លាំងបែបនេះ នៅទូទាំងពិភពលោក។ លោកបានបន្ថែមថា ការកើនឡើង នៃចំនួនអ្នកកាសែតដែលត្រូវគេចាប់ដាក់ឃុំនេះ ព្រមទាំងករណីធ្វើឃាតអ្នកកាសែត គឺវាបានបង្ហាញឲ្យឃើញ អំពីការតាំងចិត្ត ដ៏រឹងរូស របស់របបផ្តាច់ការ និងអាជ្ញាធររដ្ឋាភិបាលប្រទេសមួយចំនួន ក្នុងការរារាំងសិទ្ធិសេរីភាពសារព័ត៌មាន។ វាគឺជាទំនោរគោលនយោបាយ វាយបំបាក់បណ្តាញព័ត៌មានឯករាជ្យ នៅតាមប្រទេសដែលប្រើអំណាចផ្តាច់ការ។ ជាក់ស្តែង ក្នុងឆ្នាំ២០២១ ប្រទេសដូចជាភូមា អេត្យូពី បានបិទទ្វារបង្ឃាំងសិទ្ធិសេរីភាពសារព័ត៌មាន គួរឲ្យព្រួយបារម្ភបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ